Foto: Konstıtýsııalyq sot, telegram
Konstıtýsııalyq sottyń tóraǵasy Elvıra Azımova Konstıtýsııalyq komıssııanyń aldynda aıryqsha mıssııa turǵanyn atap ótti.
«2025 jylǵy 8 qyrkúıekte Prezıdent «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty halyqqa Joldaýynda jasandy ıntellekt dáýirinde elimizdiń áleýmettik-ekonomıkalyq damýyna eleýli oń yqpal etetin jańa saıası reformany jarııalady.
Memleket basshysy «Kúshti Prezıdent – yqpaldy Parlament – esep beretin Úkimet» tujyrymdamasy negizinde elimizde bir palataly Parlament qurý bastamasyn kóterdi.
О́zderińizge belgili, parlamenttik reformany ázirleý jónindegi jumys toby 2025 jylǵy qazan aıynan bastap belsendi jumys atqardy. Onyń quramyna belgili zańgerler men sarapshylar, saıası partııalar jáne qoǵamdyq uıymdardyń ókilderi kirdi. Osy ýaqyt aralyǵynda jumys toby barlyq usynymdardy muqııat zerdelep, júıeledi, sondaı-aq azamattardan kelip túsken usynystardy jan-jaqty taldady.
Azamattar óz usynystarynda tek bir palataly Parlament máselesin ǵana kótergen joq. Osyǵan oraı, Memleket basshysy Konstıtýsııalyq reforma jónindegi komıssııa qurý týraly sheshim qabyldady», dedi ol.
Elvıra Azımovanyń aıtýynsha, jumys tobynyń múshelerinen bólek, azamattardan eki myńnan astam usynys kelip túsken.
«Keńeıtilgen quramdaǵy Konstıtýsııalyq komıssııanyń qurylýy osy ýaqytqa deıin atqarylǵan jumystyń qısyndy jalǵasy, sondaı-aq birneshe aıǵa ulasqan pikirtalastar barysynda qalyptasqan aýqymdy qoǵamdyq suranysqa berilgen jaýap boldy. Prezıdent usynǵan memlekettik bılikti bir palataly Parlamentke – Quryltaıǵa ótkizý, Halyq keńesin qurý, Vıse-Prezıdent laýazymyn engizý jáne basqa da máseleler jan-jaqty ári keshendi túrde zerdelep, pysyqtaýdy qajet etedi.
Qazaqstan saıası jańǵyrýdyń jańa kezeńine qadam basyp jatyr. Memleket basshysy ári qaraıǵy damýdyń ınstıtýsıonaldyq tepe-teńdikti nyǵaıtý, zań shyǵarýshy bıliktiń tıimdiligin arttyrý, tejemelik tepe-teńdik júıesin kúsheıtý, sondaı-aq qoǵamnyń memlekettik basqarýǵa qatysýyn qamtamasyz etetin konstıtýsııalyq mehanızmderdi jańartý arqyly ǵana múmkin ekenin aıqyn atap kórsetti», dedi E.Azımova.
Eske salaıyq, buǵan deıin atalǵan otyrystyń ótetini týraly habarlaǵan edik.
