Foto: Ashyq derekkóz
Qoǵam belsendisi Sergeı Snegırev Qazaqstanda qoǵamdyq tamaqtaný oryndaryna arnalǵan ıt etin jasyryn daıyndaıtyn kóleńkeli bıznes jyldar boıy jumys istep kelgenin málimdedi. Onyń aıtýynsha, Astanadaǵy birqatar tanymal franshızalar quramyna ıt eti aralastyrylǵan farshty satyp alǵan.
Belsendiniń sózinshe, bul is boıynsha júrgizilgen baqylaý satyp alý kezinde satýshy eń az partııa retinde 100 keli et usynǵan. Keıin onyń úıinde júrgizilgen tintý barysynda 750 keli ıt eti tárkilengeni aıtyldy. Tergeý nusqasyna sáıkes, ol et basqa ónimderge aralastyrý úshin daıyndalǵan.
Sonymen qatar zoobelsendi Temirlan Tospaev Oral qalasynda qańǵybas janýarlardy aýlaý tenderin jergilikti et óńdeý kásiporny jeńip alǵanyn aıtty. Qala ákimdigi muny memlekettik satyp alý týraly zań talaptarymen túsindirgen. Resmı málimetke sáıkes, ıt aýlaýmen aınalysýǵa nıet bildirgen jalǵyz mekeme osy bolǵan.
Podkast qatysýshylary birneshe jyl buryn Almaty oblysy aýmaǵynda bolǵan oqıǵany da eske aldy. Ol kezde eriktiler ıtterdi jappaı óltirgen oryndy anyqtaǵan. Onda qańǵybas jáne úı janýarlary aralas ustalǵan, keıbiriniń moınynda qarǵybaýy da bolǵan. Áıelderdiń biri sol jerden óz ıtine uqsas janýardy tanyǵany aıtyldy.
Snegırev sondaı-aq qańǵybas janýarlardy evtanazııalaýdy belsendi túrde qoldaǵan depýtat Edil Jańbyrshın týraly pikir bildirdi. Ol depýtattyń adam ómiri ıtten mańyzdyraq ekenin jáne qańǵybas janýarlar kóbinese áıelder men balalarǵa shabýyl jasaıtynyn birneshe ret aıtqanyn tilge tıek etti.
Belsendi depýtattyń janýarlarǵa jaýapkershilikpen qaraý týraly zańǵa ózgerister engizý jumysyn basqarýyna kúmán keltirip, ony bul salada quzyretti emes dep esepteıtinin jetkizdi.
Eske salaıyq, Almatyda tanymal dámhananyń birinde samsanyń ishinen veterınarlyq chıp tabylǵan bolatyn.
