Foto: Ashyq derekkóz
Qujatqa sáıkes, Prezıdent halyq pen memlekettik bılik birliginiń, Konstıtýsııanyń myzǵymastyǵynyń, adam jáne azamat quqyqtary men bostandyqtarynyń nyshany ári kepili bolyp qala beredi. Kezekten tys saılaý ınstıtýty alynyp tastalýyna baılanysty, ony saılaý rásimin, ant berý tártibin jáne ókilettikterdi oryndaý kezeńin retteıtin normalarǵa naqtylaý engizildi.
Zańda Memleket basshysynyń birqatar mańyzdy taǵaıyndaý ókilettikteri de bekitilgen. Atap aıtqanda, Prezıdent Bas Prokýrordy, Konstıtýsııalyq Sottyń, Ulttyq qaýipsizdik komıtetiniń, Joǵary aýdıtorlyq palatanyń, Ortalyq saılaý komıssııasynyń, Ulttyq Banktiń tóraǵalaryn, Adam quqyqtary jónindegi ýákildi jáne Memlekettik kúzet qyzmetiniń bastyǵyn jeke taǵaıyndaý quqyǵyn bekitedi.
Joǵary Sot Keńesiniń usynysy boıynsha Joǵarǵy Sot Tóraǵasyn taǵaıyndaıdy. Quryltaıdyń kelisimi boıynsha Prezıdent Vıse-Prezıdentti, Premer-Mınıstrdi, Konstıtýsııalyq Sottyń 10 sýdıasyn, Joǵary aýdıtorlyq palatanyń 8 múshesin, Ortalyq saılaý komıssııasynyń 6 múshesin, sondaı-aq Joǵarǵy Sottyń sýdıalaryn taǵaıyndaıdy jáne saılaıdy.
Sonymen birge Vıse-Prezıdent ınstıtýtyn engizý kózdelip, onyń quqyqtyq mártebesi aıqyndaldy. Vıse-Prezıdent Quryltaı, Úkimet jáne ózge de memlekettik organdarmen ózara is-qımyl jasaıdy.
Qujatta Prezıdenttiń Adam quqyqtary jónindegi ýákilge qatysty ókilettikteri de rettelip, memlekettik organdar arasyndaǵy ókilettikterdiń arajigin ajyratý jáne tejemelik ári tepe-teńdik júıesin kúsheıtý kózdelgen.
Aıta keteıik, 8 mamyrda Májilis depýtattary «Prezıdent týraly» konstıtýsııalyq zańdy birinshi oqylymda qabyldaǵan bolatyn.
