Foto: parlam.kz
«Búgin bizdiń kóz aldymyzda álemdik tártip ózgerip jatyr. Biz uzaq jyldar boıy turaqtylyq pen boljamdylyqty qamtamasyz etken halyqaralyq quqyq normalarynyń álsirep jatqanyn kórip otyrmyz. Álem kúnnen kúnge tynyshsyz jáne boljaýǵa kelmeıtin bolyp barady», dedi ol.
Marat Bashımovtyń sózinshe, syrtqy turaqtylyq myqty ishki negizsiz múmkin emes, sondyqtan Qazaqstanda konstıtýsııalyq ornyqtylyqty qamtamasyz etý erekshe mánge ıe bolyp keledi.
Mańyzdy qadamdardyń biri retinde ol bir palataly Parlamentke kóshý dep kórsetti, bul joǵary ókildi organnyń jumys tıimdiligin arttyrady dep kútilip otyr. Budan basqa depýtat sheteldik zańdy tulǵalardyń, sheteldikterdiń jáne azamattyǵy joq adamdardyń, shet memleketter men halyqaralyq uıymdardyń, sondaı-aq sheteldik qatysýy bar otandyq zańdy tulǵalardyń saıası partııalardy qarjylandyrýyna jol bermeý mańyzdy ekenin atap ótti.
«2026 jylǵy Konstıtýsııalyq reforma adamnyń mańyzdy ekenin, memlekettik saıasattyń ortasynda naqty adam, onyń quqyqtary, bostandyqtary men qadir-qasıeti turatyn baǵytty jalǵastyrady. Quqyqtar men bostandyqtar adamǵa týa beriledi, olar memleket tarapynan berilmeıdi. Reformanyń negizgi maqsaty – azamattardyń konstıtýsııalyq quqyqtaryn naqty qorǵaýdy qamtamasyz etý jáne memlekettik basqarý sapasyn arttyrý», dep qosty Marat Bashımov.
Reformanyń negizgi baǵdarlaryn atap óterde, ol Ulttyq Quryltaıda Prezıdent jarııalaǵan jalpyulttyq qundylyqtardy atap ótti: táýelsizdik pen patrıotızm, birlik pen yntymaqtastyq, ádilettilik pen jaýapkershilik, zań men tártip, eńbekqorlyq, kásibılik, jańashyldyq pen shyǵarmashylyq.
Marat Bashımovtyń pikirinshe, Konstıtýsııalyq reforma Qazaqstannyń progressıvti damýyna jaǵdaı týǵyzady, memleket pen qoǵam arasyndaǵy senimdi nyǵaıtady, sondaı-aq azamattardyń Konstıtýsııalyq quqyqtaryn tıimdi qorǵaýǵa múmkindik beredi.
