Memleket basshysy Qasym-Jomart Toqaevtyń tapsyrmasymen elimizde 2025–2027 jyldary 1 300 mektep jańǵyrtýdan ótkizilýi kerek bolatyn. Osy tapsyrma aıasynda Batys Qazaqstan oblysynda 86 mektep renovasııadan ótedi. 2025 jyly oblysta alǵashqy 6 mektep jańǵyrtýdan ótip úlgerdi. Sonyń biri – Bazarsholan aýylyndaǵy Ǵabdolla Mahambetov atyndaǵy orta mektep ǵımaraty.
Atyna zaty saı, jańarǵan mekteptiń ǵımaraty ǵana kúrdeli jóndelip qoımaı, búkil jabdyǵy túgelimen jańadan alynyp, zamanaýı keıipke engen. О́tken jyldyń naýryz aıynan beri ár jerde oqýǵa májbúr bolǵan aýyl balalarynyń qýanyshynda shek joq. Jobanyń jalpy quny – 772,2 mln teńge bolypty. Kúrdeli jóndeý jumysyn almatylyq «NSK «MBM Construction» JShS atqarǵan.
– Jóndeý jumysynyń sapasyna kóńilimiz toldy. Qurylysshylar bizdiń talap-tilegimizdi eskerip, mektep ishindegi keıbir kabınetti óz qalaýymyzsha jasattyq. Qazir bizde 232 oqýshy bilim alyp jatyr. Mektepaldy daıarlyq synybynda 16 bala tárbıelenedi. Ujymda 40 pedagog bar, – deıdi mektep dırektory Oraz Naýryzbaıuly.
– 2026 jyly Aqjaıyq aýdanynda taǵy 4 mektep – Taıpaq aýylyndaǵy Baısyqov mektebi, Qaraýyltóbe aýylyndaǵy Taıpaq mektebi, aýdan ortalyǵyndaǵy M.Áýezov atyndaǵy gımnazııa jáne Jańabulaq mektebi jańǵyrtýdan ótedi. 2027 jyly taǵy 7 mektep jańarady. Sonda bir ǵana Aqjaıyq aýdanynda úsh jylda 12 mektep jańǵyrtylady, – deıdi oblystyq bilim basqarmasynyń basshysy Eldos Safýllın.
Jańartylǵan mektep zamanaýı talaptarǵa saı jabdyqtalǵan. Pándik kabınetterde dáristerdi teorııalyq jáne praktıkalyq turǵyda ótkizýge barlyq jaǵdaı jasalǵan. Al kompıýterlik tehnologııalar jáne bıologııa kabınetterinde ornatylǵan qurylǵylar tipten keremet – zamanaýı kompıýterler, aýdıo-vızýal tehnologııalar, sıfrlyq mıkroskop, t.b. bári bar. Memleket basshysy aıtyp júrgen áleýmettik teńsizdik – aýyl balasy men qala balasynyń birdeı sapaly bilim alýyna kedergi joıylǵan deýge bolady.
Mektep ǵımaratynyń qaıta ashylýyna oraı ótken saltanatty sharada oblystyq bilim basqarmasynyń basshysy Eldos Safýllın men Aqjaıyq aýdanynyń ákimi Murat Serdalın óńir basshysy atynan mektep dırektoryna sý jańa «GAZel» avtokóliginiń kiltin tabystady. Bul mıkroavtobýs okrýg aýmaǵyndaǵy Baıantóbe aýylynan qatynap oqıtyn balalardy tasıtyn bolady.
О́ńirde keıingi jyldary bilim salasyna jasalyp jatqan qamqorlyq kóp. Máselen, 2023 jyldan beri oblysta 30 jańa mektep salynǵan eken. Onyń 9-y – «Keleshek mektepteri» ulttyq jobasy aıasynda boı kóterdi. Jańa bilim oshaqtarynyń 22-si aýylda ashylǵan. «Sebebi aýylǵa jaǵdaı jasaý – aýyl balalaryna qala oqýshylarymen teń múmkindik berý degen sóz. Atqarylǵan júıeli jumystyń nátıjesinde óńirde 11 apattyq, 6 úsh aýysymdy jáne 12 beıimdelgen mektep ǵımaratynyń máselesi tolyq sheshildi. Bıyldyń ózinde oblysta 8 jańa mekteptiń qurylysy júrip jatyr. Budan bólek ótken jyly jergilikti bıýdjet pen «Qazaqstan halqyna» qoǵamdyq qory esebinen 7,8 mlrd teńgege 514 pándik kabınet satyp alyndy», deıdi óńir basshysy Narıman Tóreǵalıev.
Batys Qazaqstan oblysy
