Shaǵyn sharýashylyqtardyń irilengeni durys

Keshe Ortalyq kommýnıkasııalar qyzmetinde Ulttyq kásipkerler palatasy AО́K komıteti hatshylyǵynyń hatshysy Myrzahmet О́ksikbaev pen palatanyń AО́K komıtetiniń tóraǵasy Ivan Saýer brıfıng ótkizdi. Úkimettiń keńeıtilgen otyrysynda Memleket basshysynyń aýylsharýashylyq ónimderin tolyq óńdeýge qatysty bergen tapsyrmalary jóninde áńgimelegen spıkerler, keıbir baǵdarlamalardyń oryndalý barysy kóńil kónshitpeı turǵanyn da jasyrmady. Áıtkenmen, negizgi jumys atqarylyp jatqan kórinedi. Máselen, qazir Májilis qaraýynda jatqan zań jetildirilip, ábden pysyqtalypty. Nátıjesinde, 5 birdeı zań bir arnada túıistirilip, sharýashylyqtardyń erkin jumys isteýine qolaıly etilipti. Jeke sharýashylyqtar kooperasııa­syn júrgizýdi eń aldymen óńdeýshi ónerkásip salasynan bastaý qajet eken. «Májiliste kooperasııalar týraly zań jobasy qaralyp jatyr. Búgingi kúni kooperasııalar jumysyn retteıtin 5 zań bar. Sol zańdardyń barlyǵy biriktirilip 1 ǵana zań bolady. Onyń ústine qazir jeke kásipkerler salyǵy da ósý ústinde. Komıtetke oǵan qatysty da suraqtar kóp kelip jatyr. О́zge de máseleler bar. Hatshylyq pen komıtet birlese otyryp, salyqqa qatysty óz usynystaryn joldady. Al, shaǵyn jeke sharýashylyqtar kooperasııasyn júrgizýdi eń aldymen óńdeýshi ónerkásip salasynda qolǵa alǵan durys dep oılaımyn», dedi M.О́ksikbaev. Onyń sózine sensek, álemde aýylsharýashylyq ónimin óndirip, ony naryqqa shyǵarýda basqa jol joq kórinedi. Ondaı jaqsy tájirıbe óz elimizde de bar eken. «Qaraǵandy oblysynda sút óńdeýshiler shaǵyn kásipkerlerge ózderi baryp, mal basyn kóbeıtip, jem-shóbin jetkizip berip, sonyń arqasynda sút alyp jatyr. Ol da kooperasııanyń bir túri dep oılaımyn», dedi hatshy. Al, «Agrobıznes-2020» baǵdarlamasyn júzege asyrýǵa birqatar ákimshilik kedergiler kóldeneń tur eken. «AО́K salasyn damytý úshin bizge tolyq kólemdegi memlekettik qoldaý qajet. «Agrobıznes-2020» baǵdarlamasy búgingi kúni jetkilikti kólemde, ári tolyq qarjylandyrylyp otyrǵan joq. Bul tusta, ıaǵnı memlekettik qoldaýdy alý barysynda tap bolatyn belgili bir ákimshilik tosqaýyldar bar», dedi M.О́ksikbaev. Onyń pikirin qoldaǵan komıtet tóraǵasy I.Saýer baǵdarlamanyń negizgi baǵyttarynyń 33-37 paıyzy tolyq qarjylandyrylmaı otyrǵanyn aıtty. Ol «Agrobıznes-2020» baǵdarlamasynyń eki jyldyq jumys qorytyndysy osyny kórsetip otyrǵanyn jetkizdi. Sóıtip, bul másele atalǵan jobany tolyq júzege asyrýda negizgi problemaǵa aınalǵanyna ókinish bildirdi. Dese de, jalpy alǵanda AО́K-tiń bıýdjeti turaqty kórinedi. Sondaı-aq, saladaǵy barlyq baǵdarlamalar, sýbsıdııalar men normalar saqtalǵan. «Endi 40 mlrd. teńge kóleminde bólinetin qosymsha bıýdjet qarjysyn kútip otyrmyz. Ol qarjy búgingi talaptarǵa oraı naqty sektorǵa baǵyttalady», dedi I.Saýer. Nurbaı ELMURATOV, «Egemen Qazaqstan».