Aqmola oblystyq sotynda óndiristik jaraqat alǵan jumysshynyń paıdasyna moraldyq zııandy óndirý týraly azamattyq is qaraldy. Is materıaldaryna sáıkes, slesar-jóndeýshi A. eńbek mindetterin oryndaý kezinde óndiristik jaraqat alǵan. Medısınalyq qorytyndyǵa saı, oǵan bas jáne moıyn tusyndaǵy súıekterdiń synýy dıagnozy qoıylyp, úshinshi toptaǵy múgedektik belgilengen. Sonymen qatar, kásibı eńbekke qabilettiligin joǵaltý deńgeıi 55 paıyz dep tanylǵan.
Jazataıym oqıǵa týraly aktimen jumys berýshiniń kinási 100 paıyz ekeni anyqtalǵan. Bul eńbek qaýipsizdigi talaptarynyń óreskel buzylǵanyn kórsetedi. Jábirlenýshi sotqa júginip, jumys berýshiden tólenbegen jalaqy somasyn jáne moraldyq zııandy óndirýdi talap etken. Birinshi satydaǵy sot talapty ishinara qanaǵattandyryp, jábirlenýshiniń paıdasyna 3 mıllıon teńge kóleminde moraldyq zııan ótemaqysyn óndirip berdi. Al, joǵaltqan jalaqy somasyn óndirý annýıtettik saqtandyrý shartyna sáıkes jábirlenýshige 1 mıllıon teńge tólengenine baılanysty qanaǵattandyrylǵan joq.
Sonymen qatar, sot eńbek zańnamasynyń jumys berýshi tarapynan buzylǵanyn nazarǵa alyp, Memlekettik eńbek ınspeksııasy komıteti departamentiniń atyna jeke uıǵarym shyǵardy. Bul sheshim Memleket basshysy júktegen aldyn alý qaǵıdatyna saı, zań buzýshylyqtarǵa jol bergen sýbektilerdiń jaýapkershiligin arttyrýǵa baǵyttalǵan.
Oblystyq sot alqasynyń qaýlysymen birinshi satydaǵy sottyń sheshimi ózgerissiz qaldyrylyp, sot aktisi zańdy kúshine endi.
Aıta keteıik, 2026 jylǵy 6 qańtarda Qostanaı oblysyndaǵy shahtada jarylys bolyp, jumysshy jaraqat alǵan edi.
