Atap aıtqanda, Nıderland Koroldiginiń «Travel Book» jýrnalyna Mańǵystaý oblysy men Astana qalasy týraly arnaıy maqala jarııalady. Ásirese Qyzylqup shatqalynyń ǵajaıyp kórinisi jýrnaldyń jańa sanynyń negizgi vızýaldy sánine aınalǵan. Maqalada Bozjyra, Torysh, Qyzylqup shatqaldarynyń sulýlyǵyna basa mán berilgen. Basylym Nıderland pen Belgııa aýmaǵyna keńinen taralady.
Maqala avtory óz saıahatynan alǵan áserin bylaısha jetkizedi: «Mańǵystaýdy Mars nemese Aı bederimen jıi salystyratyny beker emes. Mundaǵy peızajdar aıryqsha áser qaldyrady. Eshnársege uqsamaıtyn biregeı landshafttyń qaq ortasynda turǵanda tańdanysyńdy jasyra almaısyń. Eń ǵajaıyp oryndary – Bozjyra, Qyzylqup, Torysh. Bozjyra alqabynda shatqaldar, taý shyńdary men jartastar appaq túske bólense, «Tıramısý taýlary» atalyp ketken Qyzylqup, kerisinshe, qyzǵylt, qyzyl, terrakota reńkterimen kóz tartady. Al «Sharlar alqabyndaǵy» (Torysh) pishini minsiz dóńgelek myńdaǵan tasty kórý – tipti bir ǵanıbet».
Sonymen qatar Belgııanyń «Papillio» laıfstaıl-basylymy da oqyrmandaryna Mańǵystaýdy sırek kezdesetin landshafty bar tartymdy baǵyt retinde usyndy. Taralymy shamamen 280 myń danany quraıtyn jýrnal el tabıǵatynyń biregeıligin pash etken. О́ńir týraly beıneli aqparattar men fotoreportajdar sarabdal saıahatshylardy biriktiretin halyqaralyq «She Is Not Lost» platformasynda da jarııalandy.
