Osyǵan deıin azýly amerıkalyq oıynshy Endı Výdfordy utyp, odan keıin ázerbaıjandyq Aıdyn Sýleımanly, argentınalyq Faýstıno Ora, ıspanııalyq Danııl Iýffa, ýkraınalyq Vasılıı Ivanchýkpen teń oınaǵan Bıbisara kelesi týrda fransııalyq Mark-Andrıa Maýrıssımen kezdesti. Jastar arasynda álem chempıony degen ataǵy bar 18 jastaǵy shahmatshyǵa Asaýbaevanyń áli jetpedi. Qara fıgýralarmen oınaǵan ol partııanyń orta tusynda qatelik jiberdi. Maýrıssı ony utymdy paıdalanyp, 42-júristen keıin jeńiske jetti.
Sodan soń Bıbisaranyń joly Velımır Ilıchpen qıysty. Serbııalyq sheber osy «Chellenjder» sanatyndaǵy týrnırdegi reıtıngi eń joǵary oıynshy. Onyń 2 638 upaıy bar. B.Asaýbaevanyń jıǵan upaı qory – 2497. Bıbisara Ilıchpen teń oınady. Keshe ol jasy 40-tan asqan asa tájirıbeli nıderlandtyq Ervın l’Amımen kezdesti. Qara tastarmen oınaǵanyna qaramastan Bıbisara basymdyq tanytyp, taza jeńiske jetti. Osy tabysynan keıin qazaq shahmatshysy segizinshi orynnan qaıta besinshi satyǵa kóterildi. Asaýbaevanyń qorjynynda 4,5 upaı bar. Aldyńǵy oryndarda Mark-Andrıa Maýrıssı (6,5), Endı Výdford (6,5), Aıdyn Sýleımanly (6), Vasılıı Ivanchýk (4,5) syndy grossmeısterler tur.
