Mınıstrlik málimetinshe, áskerde tárbıe jumysynyń uıymdastyrylýy men áskerı tártipti baqylaý kúsheıtilgen. Sondaı-aq qarý-jaraqty paıdalaný, sabaqtar ótkizý, atys jattyǵýlary men tapsyrmalardy oryndaý kezinde jarǵylyq talaptar men qaýipsizdik sharalaryn saqtaý talaptary qatańdatylǵan.
Qaıǵyly oqıǵalardan keıin áskerı bólimderge Qarýly Kúshterdiń jeke quramyn keshendi psıhologııalyq tekserýden ótkizý úshin komıssııalar jiberilgen. Áskerı qyzmetshilerdiń psıhıkalyq jaı-kúıine, qyzmettik mindetterdi oryndaýǵa psıhologııalyq daıyndyq deńgeıine qaıta baǵalaý júrgizilip jatyr.
Osy máselelerden keıin komandırler men serjanttyq quramnyń jeke jaýapkershiligi arttyrylyp, negizgi nazar oqys oqıǵalardyń aldyn alýǵa jáne qaýipsiz minez-qulyq daǵdylaryn qalyptastyrýǵa baǵyttalyp otyr.
«Áskerı polısııa kúshterimen áskerı bólimderde jan-jaqty tekserýler uıymdastyryldy. Jeke quramǵa baqylaý, beınebaqylaý, onyń ishinde qyzmetten tys ýaqytta da, kúsheıtildi. Táýlik boıy baqylaý engizilip, quqyq buzýshylyqtar men oqıǵalardyń aldyn alýǵa baǵyttalǵan qosymsha profılaktıkalyq sharalar qabyldandy. Áskerı qyzmetshiler týystarymen turaqty beınebaılanyspen qamtyldy. Sonymen qatar bólimshe komandırleri ata-analarmen resmı baılanys arnalary arqyly turaqty túrde baılanysta», delingen mınıstrlik málimdemesinde.
Mınıstrlik sarbazdardyń óliminen keıin naqty kadrlyq jáne tártiptik sheshimder qabyldaǵan.
«Shyǵys» óńirlik qolbasshylyǵynyń qolbasshysy, shtab bastyǵy jáne qolbasshynyń tárbıe jáne ıdeologııalyq jumys jónindegi orynbasary tártiptik jaýapkershilikke tartyldy. Áskerı qyzmetshi qaza tapqan áskerı bólimniń komandıri, onyń orynbasary, sondaı-aq batalon komandıri atqaryp otyrǵan laýazymdarynan bosatyldy», delingen mınıstrlik málimdemesinde.
Aıta keteıik, 27 qańtar kúni Jambyl oblysynda qarýmen jumys isteý barysynda merzimdi áskerı qyzmetshi oq jaraqatynan kóz jumdy.
