Prezıdent agenttik qyzmetkerlerine júkteletin jaýapkershilik joǵary ekenin aıtty.
«Agenttik Bas prokýratýramen, Ulttyq qaýipsizdik qyzmetimen, Ishki ister mınıstrligi sekildi basqa da quqyq qorǵaý organdarymen úılesimdi áreket etýi kerek. Olar da Qarjylyq monıtorıng agenttigine qoldaý kórsetýge tıis. Quzyrettik mindetterdiń qaıtalanýy, jón-josyqsyz báseke, baqtalastyq memleket múddesine zardabyn tıgizedi. Álemde strategııalyq belgisizdik beleń alǵan qazirgideı jaǵdaıda bul óte qaýipti», dedi ol.
Toqaev: Áleýmettik jelilerde aqshany krıptoǵa aıyrbastaý jarnamasy tyıylmaı tur
Memleket basshysy dushpandarymyzdyń ulttyq múddemizge zııan keltirýine jol berýge bolmaıtynyn atap ótti.
«Únemi aıtamyn: «Táýelsizdik – bárinen qymbat». Muny barshamyz, Qarjylyq monıtorıng agenttiginiń qyzmetkerleri árdaıym este ustaýy kerek. Ár qyzmetker, eń aldymen, adal azamat jáne myqty maman bolýǵa tıis. Ar tazalyǵyn saqtaý, Otan aldyndaǵy antqa berik bolý – paryz. «Zań men tártip» qaǵıdaty – kópshilikke qarata aıtylǵan uran emes, bul – árbir memlekettik qyzmetshiniń, árbir adamnyń ózinen bastalýǵa tıis sanaly qadam. Biz Ádiletti, Qaýipsiz, Kúshti, Taza ári Ozyq Qazaqstandy quryp jatyrmyz. Aýqymdy ózgeristerdiń kelesi – sheshýshi kezeńine qadam bastyq. Konstıtýsııalyq reformany qolǵa aldyq, búginde komıssııa belsendi túrde jumys istep jatyr. Barlyq usynys muqııat saraptalady, túzetýlerdiń jobasy ázirlenedi. Halyq bul jobamen tanysyp, referendýmda túbegeıli sheshim qabyldaıdy. Osylaısha, elimizde jańa qoǵamdyq-saıası júıe qalyptasady. El ishindegi turaqtylyqty saqtaýǵa, ınvestısııalyq ahýaldy jaqsartýǵa jáne halyqtyń ál-aýqatyn arttyrýǵa arnalǵan jumys tyń qarqynmen jalǵasady», dedi Prezıdent.
Prezıdent jıyn barysynda alaıaqtyqqa qarsy kúrestiń jańa tásilderin oılastyrýdy tapsyrdy.
