Foto: Aqorda
«Volonterlikti damytý úshin memleket deńgeıindegi jańa júıeli sharalar qajet. Bıyl eriktiler isin damytýǵa arnalǵan úsh jyldyq Jol kartasyn iske asyrý merzimi aıaqtalady. Sondyqtan Úkimet 2030 jylǵa deıingi kezeńdi qamtıtyn jańa mazmundy qujat ázirlegeni jón. Buǵan deıin qabyldanǵan sharalardyń tıimdiligine baǵa berý jáne Qazaqstannyń halyqaralyq mindettemelerine saı volonterlik qozǵalysty nyǵaıtý úshin qosymsha yntalandyrý tetikterin qarastyrý mańyzdy», dedi Memleket basshysy.
Sondaı-aq Prezıdent azamattardyń ekologııalyq mádenıetin arttyrý qajettigin, bul – órkenıetti qoǵamǵa tán óte mańyzdy qundylyq ekenin atap ótti.
«Búginde eriktiler eldi mekenderdi kórkeıtýge belsene atsalysyp júr. Olar byltyrdyń ózinde «Taza Qazaqstan» aıasynda ótken 1300-den astam is-sharaǵa qatysty. Sondaı-aq volonterler aǵartýshylyq sıpattaǵy túrli bastamaǵa uıytqy boldy», dedi Prezıdent.
Prezıdent syn saǵatta belsendi jumys isteıtin eriktilerdiń jumysyn joǵary baǵalady
Memleket basshysynyń aıtýynsha, osyndaı ıgi ister arqyly elimizde jańa ekologııalyq mádenıet qalyptasyp jatyr.
«Bul baǵyttaǵy jumysty kúsheıte túsý kerek, sebebi ekologııalyq mádenıettiń joǵary bolýy kez kelgen eldiń ozyqtyǵy men jasampazdyǵynyń aıqyn kórinisi. Al Qazaqstan eń damyǵan elderdiń qatarynda bolýy qajet, bul – bizdiń ulttyq strategııamyzdyń asa mańyzdy bóligi. Ásirese, kásibı ekovolonterlerdi daıarlap, ár aımaqta turaqty ujymdardy jasaqtaý óte mańyzdy. «Taza Qazaqstan» qozǵalysyn ulttyq ıdeıa jáne memlekettik saıasat retinde mindetti túrde keńinen dáriptep, jalǵastyrý qajet», dedi Qasym-Jomart Toqaev.
