Otyrysqa qatysýshylardy quttyqtaǵan Senat tóraǵasy Máýlen Áshimbaev Memleket basshysy bastamashy bolǵan aýqymdy konstıtýsııalyq ózgerister qoǵamnyń saıası júıeni jańartýǵa degen suranysynan týyndaǵanyn atap ótti. Onyń aıtýynsha, bul jekelegen túzetýlermen shektelmeıtin, memlekettik modeldiń mazmuny men jumys isteý qaǵıdattaryn tereń qaıta qaraýdy kózdeıtin júıeli reforma.
«Prezıdent Qasym-Jomart Kemeluly Toqaev Ulttyq quryltaıdyń sońǵy otyrysynda keń aýqymdy konstıtýsııalyq reformalar týraly aıtty. Eger bul ózgerister halyq tarapynan qoldaý tapsa, elimizde memlekettik qurylymnyń damýynyń jańa kezeńi bastalady. Bul – tek jekelegen túzetýler emes, saıası júıeni zaman talaptaryna beıimdeý arqyly túbegeıli jańǵyrtý», dedi Máýlen Áshimbaev.
Senat tóraǵasy: Konstıtýsııalyq reforma – memleket qurylysyn damytýdyń jańa kezeńi
Senat spıkeri reformanyń keshendi sıpatqa ıe ekenin jáne Konstıtýsııanyń shamamen 80 normasyn, ıaǵnı Negizgi zań mazmunynyń 84 paıyzyn qamtıtynyn aıtty. Negizgi baǵyttardyń qatarynda Parlamenttiń ókilettigin keńeıtý, zań shyǵarý úderisin ońtaılandyrý, depýtattardyń derbestigin arttyrý, partııalyq júıeni damytý jáne saıası básekelestikti kúsheıtý bar.
Sonymen qatar reforma aıasynda memleket pen qoǵam arasyndaǵy dıalog pen qoǵamdyq kelisim ınstıtýty retinde Halyq keńesin qurý usynylǵan. Keńeske zańnamalyq bastama quqyǵyn berý onyń jumysyn mazmundy etpek. Sondaı-aq Konstıtýsııa preambýlasyn jańartý, Vıse-prezıdent laýazymyn engizý jáne Ádiletti Qazaqstan qurýdy eń joǵary maqsat retinde bekitý kózdelip otyr.
«Qazaqstan ulttyq jańǵyrý kezeńin bastan ótkerip jatyr. Osy tarıhı sátte zııaly qaýym men sarapshylarǵa erekshe jaýapkershilik júkteledi. Konstıtýsııalyq reformalardyń túpki maqsaty – memlekettilik pen táýelsizdikti nyǵaıtý», dep túıindedi Máýlen Áshimbaev.
Máýlen Áshimbaev: Prezıdent reformalarynyń maqsaty – memlekettilik pen táýelsizdikti nyǵaıtý
Dıalog alańynyń jumysyna senatorlarmen qatar qoǵam qaıratkerleri men sarapshylar, atap aıtqanda, Qoıshyǵara Salǵarauly, Jamaladen Ibragımov, Erlan Saılaýbaı, Dıhan Kamzabekuly, Sholpan Saımova, Serik Orazǵalıev jáne ózge de mamandar qatysty.
