Elshiliktiń málimetinshe, Reseıde garmala dep atalatyn, al Qazaqstanda adyraspan atymen belgili ósimdik pen onyń quramyndaǵy garmın zaty esirtkilik zat retinde tanylǵan. Osyǵan baılanysty ony el aýmaǵyna ákelýge, satyp alýǵa, saqtaýǵa, tasymaldaýǵa, poshta arqyly jiberýge, ósirýge, óńdeýge, satýǵa, taratýǵa, paıdalanýǵa jáne ony tutynýǵa úgitteýge qatań tyıym salynǵan.
«Adyraspan Reseı medısınasynda, mádenıetinde nemese ashanasynda qoldanylmaıdy. Sondyqtan onyń aınalymy zańsyz, al ony nasıhattaýǵa, sonyń ishinde ınternet arqyly taratýǵa tyıym salynǵan», delingen habarlamada.
Adyraspandy zańsyz paıdalaný jáne aınalymǵa engizý úshin aıyppul, ákimshilik qamaý, al shetel azamattary úshin Reseı aýmaǵynan shyǵaryp jiberý túrindegi sanksııalar qoldanylýy múmkin.
Eger ósimdik nemese onyń quramyndaǵy zattyń kólemi iri dep tanylsa, quqyq buzýshyny birneshe jyldan ómir boıyna deıin bas bostandyǵynan aıyrý, sondaı-aq 1 mıllıon rýblge deıin (shamamen 6,6 mıllıon teńge) aıyppul salý jazasy kútedi.
