Sýret: instagram.com/syrboyi_kz/
Osy kúni óńirde tabıǵı resýrsty energııaǵa aınaldyrý baǵytynda birshama joba bar. Olardyń qatary artqan saıyn jańadan iri óndiris oryndaryn ashýǵa múmkindik kóbeıe bermek. Budan bólek, 6 mlrd teńgege qýattylyǵy 20 MVt-tyq kún elektr stansalary salynyp jatyr. Bul jobalar halyqtyń turmys sapasyn jaqsartýǵa jańa serpin beredi.
Kún elektr stansasynyń ashylýynda sóz sóılegen oblys ákimi Nurlybek Nálibaev «Eldiń damýy aýyldan, aýyldyń gúldenýinen bastalady. Ár eldi mekenniń damýy, kelesheginiń jarqyn bolýy el birligine baılanysty», dedi.
Jıynda aýdannyń áleýmettik-ekonomıkalyq damýyna ózindik úlesi bar azamattar men kún elektr stansasyn iske qosqan sala qyzmetkerleri oblys ákiminiń Alǵyshatymen marapattaldy.
Qytaıdyń iri energetıkalyq holdıngteriniń biri «China Huadian Corporation» kompanııasynyń elimizdegi alǵashqy jobasynyń júzege asýyna «Qazaq ınvest» UK» AQ qoldaý kórsetken. Stansa salý úshin 80 gektar jer ýchaskesi bólingennen keıin Syrtqy ister mınıstrligindegi Investısııalar komıtetimen ınvestısııalyq kelisimshart jasalypty. 11,5 mlrd teńge ınvestısııa tartý arqyly salynǵan stansa qurylysynda jaqyn mańdaǵy Eńbekshi aýyldyq okrýg turǵyndary jumys istedi. Paıdalanýǵa berilgennen keıin 10 turaqty jumys orny qurylyp otyr.
Stansada 56 316 zamanaýı kún paneli ornatylǵan. Kúnniń qozǵalysyn qadaǵalaıtyn trekerlik júıeler elektr energııasyn 20–25% kóp óndirip, barynsha tıimdi paıdalanýdy qamtamasyz etedi.
«Jańartylǵan energııa kózderin damytý týraly aıtqanda áýeli kún, jel men sý eske túsedi. Biraq kóbine qosalqy stansalar men núkteler sekildi energetıkalyq ınfraqurylym jelileri qıyndyq týǵyzyp jatatyn. Kún mol túsetin, jeli turaqty óńirlerdiń ózinde jasyl energetıkany damytýǵa osyndaı kózge kórinbeıtin máseleler kedergi bolatyn. Sondyqtan da osydan 3 jyl buryn yńǵaıly aýmaq tańdaý barysynda Qarataý etegindegi «Qazatomprom» kompanııasyna tıesili qosalqy stansaǵa kózimiz tústi. Oǵan jańartylatyn energetıka nysandaryn qosý múmkindigin zerttedik. Osylaısha, jumys istep turǵan transformatorlyq stansanyń arqasynda óńirge jalpy qýaty 100 MVt eki kún elektr stansasy jáne qýaty 50 MVt bir jel elektr stansasy jobalarymen ınvestorlardy tartýǵa múmkindik týdy. Bul jobalarǵa jumsalatyn jalpy ınvestısııa kólemi 49,5 mlrd teńge bolady», deıdi «Qazaq ınvest» UK» AQ óńirlik dırektory Murat Balabaev.
О́ńirlik dırektordyń aıtýynsha, aldaǵy ýaqytta aımaqta kún jáne jel elektr stansalary kóbeıe beredi. Shıeli, Jańaqorǵan, Aral aýdandary men Qyzylorda qalasyndaǵy bul nysandardyń jalpy qýaty 260,5 MVt-qa jetedi.
Bul energetıkaǵa ǵana emes, sonymen qatar qorshaǵan orta men aımaqtyń bolashaǵyna qosylǵan úlken úles bolmaq.
Qyzylorda
