Prezıdenttiń ekonomıkany sıfrlyq transformasııalaý jónindegi tapsyrmalaryn oryndaý aıasynda ǵalymdardy qoldaý, ǵylym nátıjelerin óndiriske engizý men ınnovasııalyq sheshimderdi ilgeriletý máseleleri kún tártibine shyqty. Keńesti ashqan Premer-mınıstr jańa Konstıtýsııa jobasyn qoǵamǵa ashyq ári naqty túsindirýdiń mańyzyna toqtalyp, qujatta elde júrip jatqan saıası ári ekonomıkalyq ózgeristerdiń, sonyń qatarynda bilim, ǵylym jáne ınnovasııa salasyndaǵy basymdyqtardyń aıqyn kórinis tapqany týraly aıtty.
«Ata zańnyń jańa jobasy – bolashaqqa baǵdarlanǵan progressıvti qujat. Onda adam men onyń quqyqtary, bostandyǵy memlekettiń negizgi basymdyǵy retinde jarııa etildi. Prezıdent Qasym-Jomart Toqaevtyń «Zań men tártip» ústemdik qurǵan, «Ádiletti ári taza Qazaqstandy qurý» ıdeıasy halyqtyń keń qoldaýyna ıe bolyp otyr. «Kúshti Prezıdent – yqpaldy Parlament – esep beretin Úkimet» tujyrymdamasy saıası júıeniń turaqtylyǵy men sabaqtastyǵyn nyǵaıta túsedi», dedi O.Bektenov.
Jahandyq ózgerister, joǵary tehnologııalardyń qarqyndy damýy men «orta derjavalar» róliniń artýy jaǵdaıynda konstıtýsııalyq reformanyń ýaqtyly ári strategııalyq mańyzy bar qadam ekeni basa aıtyldy. Talqylaý barysynda ǵylymı qaýymdastyq ókilderi jańa Konstıtýsııa jobasyn qoldap, ǵylymdy memlekettiń turaqty damýynyń ózegi retinde shoǵyrlandyrý qajettigine nazar aýdartty.
Ulttyq ǵylym akademııasynyń prezıdenti Aqylbek Kúrishbaev jańa Konstıtýsııa jobasy adam quqyqtary men bostandyqtaryn bekitip qana qoımaı, elimizdiń uzaqmerzimdi ǵylymı-tehnologııalyq damýynyń berik negizin qalyptastyratynyn aıtty. Al akademık Vıacheslav Lokshın medısına ǵylymynyń damýy ulttyq qaýipsizdik pen ornyqty densaýlyq saqtaý júıesin nyǵaıtýdyń negizgi faktory ekenine toqtalyp, ǵylymdy strategııalyq resýrs retinde tanýdyń mańyzdylyǵy jóninde pikir bildirdi. Osy turǵyda jasandy ıntellekt, úlken derekter, sıfrlyq dıagnostıka men telemedısına baǵyttaryn damytý ózekti ekeni aıtyldy.
Keńes barysynda ǵylymnyń ekonomıkaǵa qosatyn úlesin arttyrý máseleleri de qozǵaldy. Memleket ǵylymı ázirlemelerdi qarjylandyrýǵa jumsalatyn shyǵystarǵa 300%-ǵa deıin salyqtyq jeńildikter usynyp, jer qoınaýyn paıdalanýshylardyń óndiristik shyǵystarynyń 1%-yn ǴZTKJ-ǵa baǵyttaý tetigin engizdi. Keıingi úsh jylda ǵylymdy qarjylandyrý kólemi 3,5 esege artyp, bıyl 214 mlrd teńgege jetti. Memleket basshysy bul kórsetkishti 2029 jylǵa qaraı IJО́-niń 1%-yna jetkizý mindetin qoıǵan.
Premer-mınıstr otandyq ǵylymnyń tıimdiligin, ınvestısııalyq tartymdylyǵy men ashyqtyǵyn arttyrý baǵytynda júıeli jumys júrgizilip jatqanyn atap ótip, Ulttyq ǵylym akademııasy eldiń strategııalyq damýyn qamtamasyz etetin negizgi zııatkerlik ortalyqqa aınalýǵa tıis ekenin aıtty.
Aqylbek Kúrishbaev ekonomıkaǵa ǵylymı ázirlemelerdi jedel engizýge baǵyttalǵan birqatar bastama usyndy. Akademııa forsaıtty josparlaýdyń turaqty quralyna aınalyp, óńirlik jáne salalyq deńgeıde ondaǵan sessııa ótkizip, perspektıvalyq mindetter men ǵylymı-tehnıkalyq tapsyrmalar ázirlegeni málim boldy. Buǵan qosa ǵylym men tehnologııalar jónindegi óńirlik keńesterdiń ǵylymı-ınnovasııalyq damýdy basqarýdaǵy mańyzy erekshe ekeni aıtyldy.
Salalyq mınıstrlikter naqty nátıjelerdi tanystyrdy. О́nerkásip jáne qurylys mınıstri Ersaıyn Naǵaspaev taý-ken metallýrgııa kesheninde keıingi bes jylda 150 mlrd teńgege jýyq ınvestısııa salynyp, 1,5 myńnan astam joba júzege asyrylǵanyn jetkizdi. Agroónerkásip kesheninde otandyq seleksııanyń 743 surpy tirkelip, egis alqaptarynyń shamamen 60%-y otandyq tuqymdarmen qamtamasyz etilip otyr.
О́ńirler de ǵylymı-ınnovasııalyq ekojúıeni damytýǵa qatysty usynystaryn ortaǵa saldy. Aqtóbe men Shyǵys Qazaqstan oblystarynyń ákimderi zerthanalyq bazany nyǵaıtý, tehnologııalar transferti men halyqaralyq ǵylymı yntymaqtastyqty keńeıtý jónindegi josparlaryn tanystyrdy. Buǵan qosa Erlan Batyrbekov, Asqar Jumadildaev sekildi ǵalymdar ǵylymı áleýetti shoǵyrlandyrý, atom energetıkasy qaýipsizdigi, radıoekologııa jáne materıaltaný salalaryn damytý qajettigin atap ótti. Jıyn qorytyndysynda Úkimet basshysy birqatar naqty tapsyrma berdi.
