ASTANA. 25 maýsym. Keshe fýtboldan Qazaqstan premer-lıgasynyń 17-týr oıyndary oınaldy. Nátıjesinde týrnır kestesinde aıtarlyqtaı ózgeris bolǵan joq. Bul týraly egemen.kz habarlady.
Jalpy, týr barysynda oınalǵan barlyq match asa tartysty ótti. Ortalyq kezdesý sanalǵan Shymkenttegi jergilikti «Ordabasy» men «Astana» arasyndaǵy oıynda qonaqtardyń mereıi ústem boldy. Bul kezdesýden jankúıerler qos myqtynyń keskilesken shaıqasyn kútken bolatyn. Alǵashqy taımda sondaı oıynnyń kýási bolǵanymyz da jasyryn emes. Alaıda, matchtyń ekinshi bóliginde Vıktor Kýmykovtan tálim alatyn shymkenttikter bar bilgeninen jańyldy. Sonyń nátıjesinde «Astana» fýtbolshylary oıyndy tolyǵymen óz baqylaýlaryna aldy. Birneshe júıeli shabýyl uıymdastyrǵan qonaqtar 52-mınýtta esep ashty. Mergendigimen kózge túsken Patrık Tvýması arada 20 mınýt ýaqyt ótkende komandasynyń ekinshi golyn soqty. Osylaısha «Astana» 2:0 esebimen jeńiske jetti. Al «Ordabasy» ekinshi týr qatarynan jeńilis tapty.
Jankúıerlerdiń nazaryn aýdarǵan taǵy bir oıyn Aqtóbede ótti. Ejelgi qarsylastar sanalatyn «Aqtóbe» men «Tobyl» arasyndaǵy matchta alań ıeleri 2:1 esebimen basym tústi. Degenmen, kezdesýdiń 77-mınýtyna deıin qonaqtardyń 1:0 esebimen alda turǵanyn aıta ketken jón. Oıynnyń 6-mınýtynda-aq «Tobyl» fýtbolshysy Iýrın esep ashqan bolatyn. Aqtóbelikter bul golǵa 77-mınýtta ǵana jaýap bere aldy. Tarazy basyn teńestirgen Pızzelı. Al arada 2 mınýt óter-ótpeste Neko «Aqtóbeniń» ekinshi golyn soqty. Oıyn sońyna deıin bul esep ózgergen joq.
Al chempıondyqtan basty úmittilerdiń biri Almatynyń «Qaıraty» bul týrda upaı joǵaltty. Pavlodarda «Ertispen» teń oınaǵan almatylyqtar týrnır kestesinde bir saty tómen syrǵyp, 3-orynǵa jaıǵasty.
Sonymen qatar, 17-týrda týrnır kestesiniń sońynda kele jatqan komandalardyń da jeńis toıyn toılaǵanyn erekshe aıtyp ótken jón. 11-satydaǵy «Jetisý» syrt alańda «Atyraýdan» basym tússe (2:1), sońǵy oryndaǵy «Shahter» Qaraǵandyda «Oqjetpesti» iri eseppen jeńdi (3:0). Osylaısha, «kenshiler» maýsymdaǵy úshinshi jeńisine qol jetkizdi. Al kókshetaýlyqtar úshin bul qatarynan úshinshi jeńilis.
«Ordabasy» (Shymkent) – «Astana» (Astana) 0:2 (0:0)
Goldar: Tvýması 52, 72.
«Shahter» (Qaraǵandy) – «Oqjetpes» (Kókshetaý) 3:0 (2:0)
Goldar: Topchagıch 3, Pavlov 19 avtogol, Vetrov 83.
«Taraz» (Taraz) – «Qaısar» (Qyzylorda) 3:0 (2:0)
Goldar: Pıshýr 3, Jumahanov 31, Golıch 71.
«Ertis» (Pavlodar) – «Qaırat» (Almaty) 1:1 (0:0)
Goldar: Dýdchenko 61 – Goý 79.
«Aqtóbe» (Aqtóbe) – «Tobyl» (Qostanaı) 2:1 (0:1)
Goldar: Pızzelı 77, Neko 79 – Iýrın 6.
«Atyraý» (Atyraý) – «Jetisý» (Taldyqorǵan) 1:2 (1:1)
Goldar: Grıgorev 31 – Savıch 27, 71.
25 maýsymǵa deıingi nátıjeler boıynsha týrnır kestesi
Úzdik mergender:
- Jerar Goý («Qaırat») – 18 gol;
- Dýshan Savıch («Jetisý») – 7 gol;
- Lýka Rotkovıch («Oqjetpes»), Konstantın Dýdchenko («Ertis»), Patrık Tvýması («Astana») – 6 gol.
18-týr oıyndary 27-28 maýsymda oınalady. Atalǵan týrdaǵy qarsylastar tómendegideı:
«Qaısar» – «Ordabasy»
«Jetisý» – «Aqtóbe»
«Qaırat» – «Astana»
«Tobyl» – «Taraz»
«Oqjetpes» – «Atyraý»
«Ertis» – «Shahter»
Elaman Qońyr.
Derek: egemen.kz.
Sýret: vk.com.
