Stalkıng pen alaıaqtyq qatań jazalanady

Mınıstrlik azamattardyń jeke ómiri men qaýipsizdigi zańmen qorǵa­la­ty­nyn, al ańdý, qaıta-qaıta mazalaý qylmys ekenin esker­tedi. Qaıta-qaıta qońy­raý shalý, habarlama jiberý, áleý­met­tik jeliler arqyly baqy­laý, adam­nyń erkinen tys izine túsý – stalkıng.

«Bul áreketter adamnyń qaýip­sizdigine jáne psıhologııa­lyq jaı-kúı­ine tikeleı qaýip tóndiredi. Qazaq­stan Respýb­lı­ka­synyń Qylmys­tyq kodeksiniń 115-1-babyna sáıkes, stalkıng fak­tisine zańmen qatań jaýap­ker­shi­lik kózdelgen.

Atalǵan bapqa sáıkes, 200 aılyq eseptik kórsetkishke deıin aıyppul salynyp, 200 saǵatqa deıin qoǵamdyq jumystarǵa tartý kózdelgen. Sondaı-aq 50 táýlikke deıin qamaýǵa alý jazasy qarastyrylǵan», delingen mınıstrliktiń resmı habarlamasynda.

Mınıstrlik habarlamasynda Kons­tıtýsııa árbir azamattyń jeke ómirine qol suǵýǵa bolmaıtynyn jáne qaýipsizdik quqyǵyn qorǵaýǵa kepildik beretini aı­tylǵan. Iаǵnı zań buzýshylyq – mindetti túrde jaýapkershilikke ákelip soǵady. Sondyqtan ózge adamnyń «Joq» degen jaýabyna mindetti túrde qurmetpen qaraý zańmen mindettelgen.

Sondaı-aq quqyq qorǵaý organdary qoǵamdyq qaýipsizdikti qalyptastyrý maqsatynda ınternet alaıaqtyqtyń jańa shema­sy týraly eskertedi. Shetel­dik derek­­kózderdiń málimetteri bo­ıynsha alaıaqtar tegin elek­tron­­dyq kitap­tar retinde Telegram-ǵa zııandy faıl­d­ardy taratady. Sóıtip, Telegram-nan kitaptardyń úlken jıyntyǵy qoljetimdi ekeni jaıly shekteý­siz habarlama jibe­redi.

Qajetti  basylym suralǵannan keıin bot naqty servıske ımıtısııa jasaı otyryp, kitap sıý­je­tiniń qysqasha sıpat­­­tamasyn ja­saıdy, biraq kitapty oqý nemese júkteýdiń ornyna «arnaıy qosymsha» degen ataýmen vırýs­tyq faıl jiberedi.

Faıldy ornatqan kezde alaıaq­tar qupııasózder men qara­jat urlap, hat almasýǵa jáne foto­sýretterge qol jet­kizedi. Sondaı-aq bul «tegin kitap­ha­na­nyń» salda­ry smartfondy qashyqtan bas­­qa­rý jáne jeke derekterdi jo­ǵal­týǵa ákep soǵady. Sol sebepti polısııa beıresmı kóz­der­den basqa qosym­sha­lar­dy ornatý qa­ýip­ti ekenin eske salady.

Mınıstrlik kıbergıgıena ereje­le­rin saqtaý jáne jeke qyra­ǵylyq osyndaı qaýip-qater­ler­den qorǵaýdyń negizgi sharalary ekenin qaperińizge salady.