Sabaq berý – tek aqparat usyný emes, oqýshynyń qyzyǵýshylyǵyn oıatý jáne alǵan bilimin ómirde qoldana alýyna jaǵdaı jasaý. Men óz jumysymda kóp ádis tásildi qoldanamyn, sonyń biri – «Tiri sýretter» dep atalady. Bul balanyń aqparatty qabyldaýyn meılinshe jeńildetedi. Oılana kele, vızýaldy kúrdeli erejelerdi jattaǵansha olardy keıipkerlerge aınaldyrǵan jón dep sheshtim. Tıisinshe, bul utymdy sheshim boldy. Balalar mundaı tásilge lezde qyzyǵýshylyq tanytyp, olardyń kitaptaǵy tapsyrmany qabyldaýy, sińirýi, soǵan saı paıym aıta bilý daǵdylary qalyptasty.
Sonymen qatar dybystardy jýan jáne jińishke degenshe, «alyptar» men «ergejeıliler» patshalyǵy retinde sıpattaý da óz-ózin aqtaǵan ádis boldy der edim. Qazir osyndaı erekshe tásilderdi basshylyqqa ala otyryp, sabaqtarymdy meılinshe qyzyqty etip ótkizip júrmin.
Ras, qazir bilim berý paradıgmasy túbegeıli ózgerdi. Buryn bilim berýdiń basty maqsaty – «kóp aqparatty jattatý» bolsa, qazirgi basty shart – «sol aqparatty taýyp, taldap jáne ómirde qoldana alý». Eski júıede oqýshylar qate úshin jazalanatyn (tómen baǵa). Jańa júıe boıynsha qate – oqý úderisiniń mańyzdy bóligi. Oqýshy qatelesý arqyly izdenýdi úırenedi. Sondyqtan baǵalaý emes, keri baılanys (formatıvti baǵalaý) mańyzdyraq bolyp otyr.
Men bastaýysh synyptyń muǵalimi mamandyǵyn beker tańdaǵan joqpyn. Shynaıy qyzyǵýshylyq pen qulshynys osy baǵytqa qaraı jetelep alyp keldi. Basqa mamandyqtarda nátıjeni jyldar boıy kútý kerek bolsa, bastaýysh synypta balanyń keshe ǵana árip tanymaı, búgin alǵashqy sózin oqyǵanyn kórý – erekshe baqyt. Balanyń kózindegi «túsindim» degen ushqyndy kórý – men úshin eń úlken mártebe. Meniń tańdaýym – balanyń balalyq shaǵyn qyzyqty etý jáne oǵan ómirlik úlken jolǵa joldama berý. Osy turǵydan alǵanda ustazdyq qyzmetti mamandyq emes, mıssııa dep atar edim.
Aqmaral BORTYBAEVA,
Almaty qalasyndaǵy №141 jalpy bilim beretin mekteptiń bastaýysh synyp muǵalimi
