Qazirgi tańda Saryaǵash aýdanyna qarasty 63 eldi mekenniń 55-i tabıǵı gazben qamtylyp, jalpy kórsetkishtiń 87,3%-yn qurap otyr. Sonymen qatar 3 aýyldy gazben qamtý baǵytynda qurylys jumystary júrgizilip jatyr. Al 5 eldi meken boıynsha jobalaý-smetalyq qujattamalar ázirlený ústinde.
Aıta keteıik, elimizdegi jylyjaılardyń 70%-y ornalasqan aýdannyń jalpy óńirlik ónim kólemi byltyr 385,8 mlrd teńgeni quraǵan. Al aýyl sharýashylyǵy salasyndaǵy ónim kólemi jyl qorytyndysymen 137,2 mlrd teńgege jetse, ónerkásip óniminiń kólemi 30,5 mlrd teńge kóleminde. Sondaı-aq negizgi kapıtalǵa 82,1 mlrd teńge ınvestısııa tartylǵan.
«Búginde aýdan boıynsha jylyjaı kólemi – 807,2 gektar. О́tken jyly aýdanda qus fabrıkasyn keńeıtý men 4,3 gektar lımon ósirýge arnalǵan jylyjaı kesheni men jemis qoımasy jobasy júzege asty. Sonymen qatar mal soıý jáne eksportqa et daıyndaý orny men 1 000 basqa arnalǵan mal bordaqylaý kesheni quryldy. Al 2026 jyly aýyl sharýashylyǵy salasynda 5 000 bastyq mal bordaqylaý alańy men 1 000 bas iri qara mal bordaqylaý alańy júzege asyrylady. Budan bólek, ósimdik maıyn óndiretin jáne qurama jem daıyndaý sehy ashylady», deıdi Saryaǵash aýdanynyń ákimi Arman Abdýllaev.
Sondaı-aq bıyl aýdanda jalpy quny 7,5 mlrd teńge bolatyn mıneraldy sý quıý zaýyty, qysh shyǵarý jáne kúnbaǵys maıyn óńdeý sehy, shaǵyn sý elektr stansasy salynbaq.
Túrkistan oblysy
