Sýret: informburo.kz
Japon eliniń jergilikti «Kyodo» basylymynyń habarlaýynsha, «Mitsubishi Corp.» saýda kompanııasy osy jyldyń shildesinde elimizden sırek kezdesetin metall gallııdi ımporttaýdy josparlap otyr. Kompanııanyń málimdemesine sáıkes, onyń enshiles «Mitsubishi Corporation RtM Japan Ltd.» kompanııasy 2025 jylǵy jeltoqsanda «Qazaqstan alıýmınııi» AQ (Eurasian Resources Group quramyna kiredi) kompanııasymen birneshe jyl boıy jylyna orta eseppen 15 tonna gallıı satyp alý týraly kelisimge qol qoıǵan. «Kyodo» aqparatyna sáıkes, atalǵan kompanııa gallıı ımportymen alǵash ret aınalyspaq.
Metall Pavlodardaǵy zaýytta óndiriledi, onyń qurylysy 2026 jyldyń III toqsanynda aıaqtalady dep josparlanyp otyr. Onda óndiriletin barlyq ónim Japonııaǵa jóneltiledi.
Aıta ketsek, Japonııa 2021 jyly 96,5 tonna gallıı ımporttaǵan, onyń 55 tonnasy (57 paıyz) Qytaıdan kelgen. Al 2023 jyldan bastap QHR metall eksportyna baqylaýdy kúsheıtti, bul gallııdi turaqty satyp alyp otyrǵan elderge aıtarlyqtaı qıyndyq týǵyzǵan. Alaıda, «Mitsubishi» bul «Qytaımen baılanys úzildi» degendi bildirmeıtinin málimdedi, kerisinshe jańa jetkizýshilerdi qarastyrýǵa baǵyttalǵanyn atap ótti.
Jalpy, gallıı elektr kólikterine arnalǵan jartylaı ótkizgishterde, sondaı-aq suıyq krıstaldy panelder men basqa da ónimderge arnalǵan jaryqdıodtarda qoldanylady. Ol alıýmınıı óndirisiniń qosymsha ónimi retinde alynady. Gallııden ózge, lıtıı sekildi mańyzdy mıneraldarǵa búkil álemde suranys artyp keledi, sebebi mıneraldar jartylaı ótkizgishterdi, elektromobılderdi, sondaı-aq ónerkásiptik robottardy óndirýge qoldanylady.
Eske sala ketsek, tıisti kelisimshartqa byltyr jeltoqsanda Prezıdent Qasym-Jomart Toqaevtyń Japonııaǵa resmı sapary kezinde qol qoıyldy. «Eurasian Resources Group» 2026 jyly elimizdegi gallıı óndirisi jobasyna 20 mln dollar ınvestısııa salýdy josparlap otyr. Bul metall boksıt rýdasynan óndiriledi, kompanııa boksıt rýdasyn glınozem alý úshin buǵan deıin de óndirip keldi. «Kyodo» boljamynsha, kompanııa Qytaıdan keıingi álemdegi ekinshi iri gallıı óndirýshisine aınalýy múmkin.
