Bul týraly Májilis depýtaty, atalǵan uıymnyń tóraǵasy Baqtyǵoja Izmuhambetov Konstıtýsııalyq komıssııanyń onynshy otyrysynda aıtty. Onyń sózinshe, jańa Konstıtýsııa jobasy egde jastaǵy azamattardyń áleýmettik qaýipsizdigin kúsheıtýdi kózdeıdi.
«Jańa Konstıtýsııa jobasynda árbir azamattyń eń tómengi jalaqy men zeınetaqy alý quqyǵyna, sondaı-aq jasyna baılanysty, syrqattanǵan nemese múgedektik jaǵdaıynda áleýmettik qamsyzdandyrylýyna kepildik beriledi. Sonymen qatar memleket áleýmettik qoldaýdyń túrli nysandaryn jáne qaıyrymdylyqty damytýǵa járdemdesý mindetin óz moınyna alady. Bul egde jastaǵy adamdar úshin qosymsha qaýipsizdik kepildikterin qalyptastyrady», dedi Baqtyǵoja Izmuhambetov.
Marat Shıbutov: Ata zań jobasy jalpyhalyqtyq referendýmǵa shyǵarýǵa daıyn
Jobaǵa engizilgen taǵy bir mańyzdy norma – Preambýlada tarıhı-mádenı murany saqtaý jáne ulttyq mádenıetti qoldaý memlekettiń negizgi qaǵıdattarynyń biri retinde aıqyndalýy. Bul bolashaq damýdy josparlaý barysynda aǵa býynnyń jınaqtaǵan bilimi men ómirlik tájirıbesin keıingi urpaqqa jetkizýdegi aıryqsha rólin moıyndaý degen sóz.
Depýtattyń aıtýynsha, basqarý júıesindegi ózgerister de aǵa býynnyń qoǵamdyq ómirge belsendi aralasýyna jol ashady.
«Burynǵy konsýltatıvtik qurylymdardyń ornyna barlyq óńir ókilderi kiretin «Halyq Keńesi» qurylady. Bul aǵa býyn ókilderiniń mańyzdy memlekettik sheshimder men zańdardy talqylaýǵa tikeleı qatysýyna múmkindik beredi», dep atap ótti ol.
Konstıtýsııalyq komıssııa jańa Ata zańda volonterlik qyzmet mártebesin bekitýdi qoldady
Sondaı-aq jańa Konstıtýsııa jobasynda kámeletke tolǵan, eńbekke qabiletti balalardyń eńbekke jaramsyz ata-anasyna qamqorlyq jasaý mindeti konstıtýsııalyq deńgeıde bekitilmek. Bul norma urpaqtar sabaqtastyǵyn jáne otbasy ishindegi jaýapkershilikti kúsheıtýge baǵyttalǵan.
Ata zań jobasy azamattardyń jeke qarajaty men ómirine qatysty qorǵaý tetikterin de kúsheıtedi. Memleket banktik salymdar men jınaqtardyń saqtalýyna, qarjylyq operasııalardyń qupııalyǵyna kepildik beredi.
«Jeke derekterdi alaıaqtyqtan jáne zańsyz paıdalanýdan qorǵaý, sonyń ishinde ınternet keńistigindegi qaýipterden saqtaý arnaıy norma retinde bekitiledi. Bul sıfrlyq tehnologııalardy árdaıym erkin paıdalana bermeıtin, memlekettik qyzmetterdi alý, medısınalyq kómekke júginý nemese qarjylyq operasııalar jasaý kezinde táýekelge jıi ushyraıtyn egde jastaǵy azamattar úshin asa mańyzdy», dep qosty uıymnyń tóraǵasy.
Sonymen qatar ardagerler qaýymdastyǵy ekologııalyq mádenıetti qalyptastyrý jáne tabıǵatqa uqypty qaraý qaǵıdatynyń Konstıtýsııa deńgeıinde bekitilýin de oń baǵalady.
