Tájik-aýǵan shekarasynda qyzmet atqarǵan shekarashylar bas qosqan jıynda Shekara qyzmetiniń batyry Radjan Batyrqanovtyń qarýlastary Tolkynjon Mýrzaev, Rahmetjan Shamıev, Renat Nýrmametovtar da júrdi. Shynymdy aıtsam, bul – men úshin kútpegen oqıǵa bolatyn. Biz – jýrnalıster tájik-aýǵan shekarasynda bolǵan qazaqstandyq batalondar týraly gazet-jýrnaldarǵa kólemdi maqalalar jazýmen shektelgen joqpyz. Kitaptardyń jaryq kórýine belsene atsalystyq. Esesine, dál R.Batyrqanov sekildi batyr shekarashymen birge bolǵan jaýyngerlermen kezdesip, suhbattas bolý baqytyn ıelengen joq edik... Degenmen, osydan bir jyl buryn osy olqylyqtyń ornyn toltyrýdyń sáti túsken. 1994 jyly óziniń azamattyq boryshyn ótep júrgen jerinen Tájikstanǵa attanyp, bizdiń batyr shekarashymen birge qyzmet atqarǵan qatardaǵy jaýynger T.Mýrzaevpen suhbattasqanbyz. Ol minezi ashyq, baýyrmal jan eken.
«Biz jat eldiń shekarasyna Radjannan buryn attandyq», degen bolatyn Tolkynjon Toıshyuly. Al shyndyǵynda biz birge jazylǵanbyz. Alaıda, osy kezde Kúrshimde voleıboldan jarys ótetin boldy da, Radjan soǵan qatysý úshin bizden qalyp qoıdy. Biz dosymyzben tájik-aýǵan shekarasynda ekinshi merzimge qalǵan kezimizde kezdesip, qaýyshyp edik.
Ol sportshy bolatyn. Negizinde ol erekshe jan edi. Osyndaı dostyń qaza tapqanyna bıylǵy qyrkúıekte 32 jyl tolady. Zýlaǵan ýaqyt-aı. Sol kezde biz nebári on toǵyzdaǵy bozbala edik. Erlik jasaýǵa asyǵyp turatynbyz. Sondyqtan da biz modjahedtermen bolǵan urysta eshteńeden taısalǵan joqpyz. Al Radjan ekibastan...
Aldymen bizdiń bir sarbaz jaýdyń kóligin jaryp jiberdi. Bul kezde birinshi núkteni alyp úlgergen Radjan bizdiń oń qaptalda dushpandarmen soǵysyp jatqan. Ol komandıri men dostaryn jaýdyń oǵynan aman alyp qalý úshin jantalasyp jatyp, aıaǵynan aýyr jaralandy. Jaýdyń nysanasy da sol bolyp, oqtardyń jańbyrsha jaýǵany sonsha Radjan jaralanǵan kezde oǵan birneshe qadamdaı jerde jatqan Rınat ta jaqyndaı almap edi.
Jaýdy tas-talqan etip baryp, qasyna jetkenimizde qaıran dostyń demi úzilipti.
Osylaı degen Tolqyn aýyr kúrsingen. Biz tájik-aýǵan shekarasynyń batyryn taǵy da sózge tartýǵa asyqpadyq. Muny qajet dep te tappadyq. Radjan týraly qanshama maqala jazylyp, kitaptar jaryq kórdi. Biz úshin eń mańyzdysy, batyr oǵlannyń dosymen kezdesip, tájik-aýǵan shekarasynyń ardagerimen suhbattasý bolatyn.
... Endi mine, búgin qazaqstandyq sońǵy 24-shi batalonnyń tájik-aýǵan shekarasynan týǵan elge oralǵanyna 25 jyl tolýyna oraı ótken aýqymdy jıynda sóz sóılegen departament bastyǵynyń orynbasary polkovnık Erbol Túlkibaev, otstavkadaǵy general-maıor Marat Majıtov, Renat Nýrmametovtar óz estelikterimen bólisti.
Aıta keterligi, polkovnık E.Túlkibaev tájik-aýǵan shekarasyna attanǵan kezde burynǵy Kúrshim shekara otrıadynda qyzmet atqaratyn. Al Renat eki eldiń arasyn bólip turǵan Pıandj boıynda ótken kúnderin, 1994 jylǵy qyrkúıek aıynda bolǵan tarıhı oqıǵa – modjahedtermen bolǵan kúshi teń emes urys jaıynda toqtalǵan.
Shara sońy shaǵyn konserttik baǵdarlamaǵa ulasyp, klýb bastyǵy aǵa serjant Dastan Sembaev «Aýǵan jyry» atty patrıottyq ándi naqyshyna keltire oryndady.
Iá, Dýshanbe áýejaıynyń beton jolaǵynan sońǵy qazaqstandyq batalondy alyp ushqan «AN-72» ushaǵynyń kókke kóterilgenine de 25 jyl ótti. Ýaqyt ótkenmen, sol kúnderdiń izi jaýyngerler jadynda jáne UQK Shekara qyzmetiniń jaýyngerlik shejiresinde saqtalyp qaldy. Qaza tapqandardyń esimi umytylmaýy tıis. О́ıtkeni ótkendi esten shyǵarsaq, búgingi tirshiliktiń qadirin de joǵaltamyz. Búgingi bas qosý – sonyń naqty dálelindeı.
Tamara DÁÝLETBAEVA,
Shekara qyzmeti Almaty oblysy boıynsha departamenti.
