Foto: Aqorda baspasóz qyzmeti
Prezıdent Qyzylordada ótken Ulttyq quryltaı otyrysynda konstıtýsııalyq reformanyń ózekti tustary aıtylǵanyn eske saldy. Onyń sózinshe, Konstıtýsııaǵa qatysty qoǵamdyq pikir almasý jarty jyldan beri toqtaýsyz júrip keledi. Usynystardy júıelep, jan-jaqty saralaý úshin 130 adamnan turatyn Konstıtýsııalyq komıssııa qurylǵan.
«Bul aýqymy jaǵynan da, kásibı deńgeıi turǵysynan da elimiz úshin teńdesi joq komıssııa. Osy joly komıssııa quramynda shetel mamandary joq», dedi Memleket basshysy.
Qasym-Jomart Toqaevtyń aıtýynsha, byltyr qazan aıynan bastap azamattarǵa óz pikirin ashyq bildirýge tolyq múmkindik berildi. Sol kezeńde eGov jáne eOtinish memlekettik sıfrlyq platformalary arqyly birneshe myń usynys túsken.
«Komıssııa ótinishtiń bárin muqııat qarap, qorytyp, tıisti túzetýlerdi ázirledi. Konstıtýsııalyq komıssııanyń jumysy barynsha ashyq júrgizildi. Muny aıtyp ótý mańyzdy. Sebebi elimizdegi reformalar buryn-sońdy eshqashan dál osylaı jan-jaqty talqylanyp, tikeleı efır arqyly jurtshylyqtyń nazaryna usynylmaǵan», dedi Prezıdent.
Memleket basshysy sıfrlyq platformalardyń qoǵammen baılanys ornatýdaǵy róline de erekshe toqtaldy. Onyń aıtýynsha, «Halyq únine qulaq asatyn memleket» qaǵıdatyna saı azamattarmen keri baılanys arnalary tıimdi jumys istegen.
«Sonyń arqasynda shyn máninde jalpyulttyq aýqymdaǵy talqylaý boldy desek, durys bolar. Bul Ádiletti Qazaqstan qurý jolyndaǵy naqty qadamdardyń biri», dedi Qasym-Jomart Toqaev.
