Alǵashqy bolyp rıngke qyzdar kóterildi. Jarysta ózin jaqsy qyrynan kórsetken Nazerke Serik (65 kg) Ulybrıtanııanyń ókili Kaıla Allennen aılasyn asyra almady. Asa aýyr salmaqtyń altynyn elimizdiń qos bylǵary qolǵap sheberi ózara sarapqa saldy. Bul básekede Ýmıda Sadyqova Panar Seıithanqyzyna birneshe aýyr soqqy darytqannan keıin tóreshi kezdesýdi toqtatty.
Jigitterimiz jarysty qarqyndy bastady. Sanjar Táshkenbaı (50 kg) ıspanııalyq Ismael Magraýı Frıannyń ábden silikpesin shyǵardy. Mahmud Sabyrhan (55 kg) anglııalyq Ellıs Troýbrıdjdi soqqynyń astyna aldy. Nátıjesinde, qarsylasynyń qabaǵy jaryldy. Báseke dereý toqtatylyp, tóreshi qandasymyzdyń qolyn kóterdi. Tórehan Sabyrhanǵa (70 kg) Dıpakty utý kádimgideı qıyndyq týǵyzdy. Birinshi raýnd Úndistan ókiliniń paıdasyna sheshildi. Desek te qalǵan kezeńderde qarqynyn kúrt kúsheıtken álem chempıony jeńisti julyp aldy.
Jartylaı fınalda álem chempıony, ýkraınalyq Iýrıı Zahareevti jeńip, dúıim jurttyń aldynda zor bedel jıǵan Aman Qonysbekov (75 kg) fınalda jankúıerlerin qýanta almady. Úndi eliniń myqtysy Akashqa qarsy aıqasta jeńilistiń kermek dámin tatty. Nurbek Oralbaı (85 kg) týrnırge beıtarap sportshy retinde qatysqan Iran boksshysy Arıan Saıd Panahty esh qınalmaı utty.
Fınalda Saǵyndyq Toǵambaıdy (90 kg) Enmanýel Reıes Pla kútip turdy. Ispanııanyń atynan synǵa túsip júrgen kýbalyq qabylannyń Parıj Olımpıadasynyń, álem chempıonatynyń úsh dúrkin qola júldegeri degen ataǵy bar. Onyń ústine jarys Pıreneı túbeginde uıymdastyryldy. Teń dárejede ótken jekpe-jekte jeńis rıng qojaıynyna berildi. Asa aýyr salmaqtylardyń sońǵy synynda qazaqtyń qos alybynyń joldary qıysty. Bul básekede Aıbek Oralbaı Nurasyl Asylhannan basym tústi. Jartylaı fınalda jeńilis tapqan Tımýr Nurseıitov (75 kg), Azamat Bektas (80 kg), Nurbek Mursal (70 kg), Nurzat Ońǵarov (50 kg), Elıanur Turǵanova (48 kg), Gúzal Sadyqova (80 kg) qola medaldy qanaǵat tutty. Sóıtip, týrnırdi elimizdiń ulttyq quramasy 6 altyn, 5 kúmis, 6 qola, barlyǵy 17 júldemen qorytyndylady. Osy kórsetkishtiń arqasynda jerlesterimiz jalpy komandalyq esepte jeke-dara kósh bastady.
