Qabyrǵaly qalamger Á.Qańtarbaevtyń 2023 jyly jaryq kórgen bul týyndysy jary Gúljan Ádilǵazyqyzynyń rýhyna arnalǵan. Kitapta shym-shytyryq oqıǵadan góri eki jastyń arasyndaǵy názik mahabbat kóbirek sıpattalǵan. Máńgilik mahabbat baıandalǵan. Olaı deıtinimiz, avtor jarymen jasasqan jarty ǵasyrlyq ǵumyryn jazǵan. Kitapty oqyp shyǵyp, oı túıgen jazýshy Baqyt Jalıeva dramalasa, jas rejısser Abaı Dáýletuly sahnaǵa laıyqtap, joǵary deńgeıde alyp shyqty.
Sahnada úsh Álibek, úsh Gúljan. Somdaǵandary bir ról, bir taǵdyr. Bir saǵatqa sozylǵan qoıylymda qanshama fılosofııalyq astar bar. Árıne, kózben emes, kókeımen kórgen adamǵa.
Qoıylymnyń túpki maqsaty jan-jaryńdy baǵalaýǵa, mahabbatty aıalaýǵa shaqyratyndaı. Sondaı-aq mynaý álemde máńgilik mahabbattyń bar ekenin de eskertedi. Otbasylyq qundylyq dep urandatyp júrgen ıdeologııamyz da osynaý qoıylymnan kórinis tabady.
Astarly fılosofııa dep otyrǵanym, qoıylym sońynda Gúljan dúnıe salady. Appaq mata jabylǵan áıel beınesi sahna tórine kóteriledi. Mine, osy tusta «saǵan aqyn nemese jazýshy, ıá bolmasa, sýretshi ǵashyq bolsa, ólmeısiń» degen sóz eske tústi. Sol sekildi Álibek Qańtarbaev máńgilik mahabbat rámizin kórsetkendeı boldy. Keshe ǵana premerasy ótken lırıkalyq drama oblystyń basqa da aýdandarynda sahnalana bastady. Ár qoıylymda ıne shanshar oryn joq desedi jurt.
О́SKEMEN
