Atalǵan baǵdarlama elimizdiń sport salasynda uzaq jyldar boıy jınaqtalǵan qurylymdyq máseleni – halyqaralyq, olımpıadalyq jáne kommersııalyq deńgeıde jumys isteı alatyn kásibı basqarýshy kadrlardyń tapshylyǵyn sheshýge baǵyttalǵan. Strategııalyq josparlaý, qarjylyq basqarý, sıfrlyq transformasııa, halyqaralyq qatynastar, demeýshilik júıelerdi damytý jáne etıkalyq kóshbasshylyq – júıeli bilim berý arqyly qalyptasatyn daǵdylar. Osy turǵydan alǵanda, «EMBA in Sport Management» baǵdarlamasynyń elimiz úshin mańyzy birneshe strategııalyq faktorlarmen aıqyndalady. Atalǵan baǵdarlamanyń «Executive MBA» formaty – jobanyń basty artyqshylyǵy. Ol sport federasııalarynyń basshylaryna, klýb menedjerlerine, saıasatkerlerge jáne kásibı sporttan basqarý salasyna ótken burynǵy sportshylarǵa arnalǵan. Nátıjesinde, alynǵan bilim qaǵaz júzinde qalyp qoımaı, naqty ınstıtýsıonaldyq ózgeristerge ulasady.
«Oqý baǵdarlamasy eki oqý orny tarapynan birlesip ázirlengen: kýrstyń 50 paıyzy Qazaq ulttyq sport ýnıversıtetinde, al 50 paıyzy Fransııadaǵy Éklore-ED School of Management bazasynda onlaın jáne oflaın formatta oqytylady. Baǵdarlama aıasynda túlekter Fransııada 10 kúndik taǵylymdamadan ótedi. Bul tájirıbe kompanııalarǵa barý, sheberlik sabaqtary jáne Parıj qalasynda ótetin saltanatty dıplom tabystaý rásimin qamtıdy», deıdi Fransııadaǵy Éklore ýnıversıtetiniń halyqaralyq seriktes ókili Ýlıss Ývrıo. Onyń aıtýynsha, túlekter memlekettik bilim berý basymdyqtaryna sáıkes ulttyq dıplom jáne Éklore-ED School of Management tarapynan beriletin halyqaralyq deńgeıde tanylǵan dıplom alady. Bul joba otandyq sport menedjerleriniń halyqaralyq basqarý standarttaryna saı daıarlanýyn qamtamasyz etip qana qoımaı, eldiń sport júıesine degen syrtqy senimdi de arttyrady.
