Keshe Qazaqstan Respýblıkasy Prezıdentiniń janyndaǵy Memlekettik basqarý akademııasynda «Memlekettik basqarýdaǵy joba-menedjment» taqyrybyndaǵy úsh kúndik semınar bastaldy. Ol «A» korpýsyndaǵy memlekettik qyzmetshilerdiń jobalardy basqarýdyń mańyzdy elementterin úırenýlerine arnaldy.
Semınarǵa elimizdiń ortalyq jáne jergilikti atqarýshy organdarynda qyzmet atqaratyn «A» korpýsynyń memlekettik qyzmetshileri qatysyp jatyr. Akademııa rektory Bolatbek Ábdirásilov óziniń quttyqtaý sózinde semınardyń mańyzdylyǵy men ózektiligin, memlekettik qyzmetshilerge halyqaralyq tájirıbeni negizge ala otyryp, joba-menedjmenttiń tetikteri men tehnologııalaryn jan-jaqty zerdeleýge múmkindik beretinine toqtaldy. Ol sonymen birge qatysýshylardyń qurylymdyq joba-menedjment pen PRINCE2 júıesiniń qaǵıdattaryn uǵyný arqyly jobalarǵa jáne memlekettik sektordaǵy jobalardy basqarý kezeńderine eleýli úles qosa alatyndyǵyn atap ótti.
Semınardy Ulybrıtanııadan kelgen jetekshi halyqaralyq sarapshy Pol Entonı Bredlı júrgizýde. Ol SPOCE Project Management Ltd bas dırektory bolyp qyzmet atqarady. Al PRINCE2 júıesi boıynsha joba-menedjentti engizý salasynda 20 jyldan asa jumys tájirıbesi bar.
Semınar barysynda jobalardy basqarý kezinde mańyzdy sheshimder qabyldaý sátteri, PRINCE2 qurylymy, jetistikke jetý krıterııleri, sondaı-aq jobalardy basqarý, atap aıtqanda jobalyq komıssııaǵa taǵaıyndaý kezindegi basty elementter qarastyrylady. Qatysýshylar joba-menedjmenttiń deńgeıler júıesiniń dızaınyn krıterıılerimen birge talqylaıtyn bolady.
Qazaqstan Respýblıkasy Prezıdentiniń janyndaǵy Memlekettik basqarý akademııasynda qurylǵan Jobalyq basqarý ortalyǵy memlekettik qyzmetshiler úshin tıisti oqytý baǵdarlamalaryn ázirleýmen, sondaı-aq, jobalyq menedjment qaǵıdattaryn memlekettik basqarý júıesine engizý máselelerin zertteýmen aınalysady.
Serik PIRNAZAR,
«Egemen Qazaqstan».
