Jýrnalıstıkadan – elshilikke

Gúlsim Baqytqyzynyń jýrnalıs­tıkadan dıplomatııa salasyna kelýiniń ózindik joly bar. Atyraý óńiriniń týmasy Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetine oqýǵa túskende bolashaqta halyqaralyq saıa­sat salasynda eńbek etemin dep oılamasa kerek. Talapty jas stýdent kezinen-aq «Sosıalıstik Qazaqstan» gazetimen qoıan-qoltyq baılanys ornatyp, óndiristik tájirıbeden ótip, redaksııa basshylyǵynyń nazaryna iligedi. Qarymdy jazý qabiletimen sol kezdegi gazettiń bas redaktory Kórik Dúıseev, onyń orynbasarlary Sarbas Aqtaev, Ábirash Jámishev, jaýap­ty hatshy Myńbaı Ilesov, onyń orynbasary Sovet Shımanbaev, bólim meńgerýshileri – Qoıshyǵara Salǵarauly, Janat Elshibek, Erbol Shaımerden, Nurıden Mýftah, Ádil Dúısenbek, Qulbek Ergóbek, Aıan Nysanaly, Jumabek Kenjalın syndy kórnekti qalamgerlerdiń senimine ıe bolady. Onyń ishinde Nurıden Mýftah Gúlsim Eńsepovany óz qaramaǵyna alyp, keńes qurylysy bólimine shtat­qa tilshilik qyzmetke tartady.

Gazette alty jyldan asa eńbek etken G.Eńsepova qoǵamdaǵy ózekti, kópti tolǵandyrǵan máselelerdi qozǵaýmen qatar, halyqaralyq taqyryptarda da batyl qalam terbedi. Bul maqalalary aıaǵyn táı-táı basqan jas memleket úshin ózektiligimen qosa taqyryptarynyń tartymdylyǵymen de kóptiń esinde qaldy. Buǵan qosa syrtqy saıasatqa jaýapty laýazymdy tulǵalardan, elshilerden de gazet betinde tikeleı suhbattar uıymdastyrdy. Sonyń arqa­synda jýrnalıst Syrtqy ister mınıstrligi basshylyǵynyń kózine túsip, elimizdiń tuńǵysh Syrtqy ister mınıstri Tóleýtaı Súleımenovtiń buıryǵymen 1993 jyly dıplomatııa salasyna birjola aýysty. Buǵan onyń halyqaralyq saıasattan habardar bolýy, qazaq jáne orys tilderimen qatar, nemis tilin meńgergeni sebepshilik etti. Alǵashqyda mınıstrliktiń baspasóz qyzmetinde eńbek jolyn bastaǵan G.Eńsepova keıin IýNESKO-men mádenı baılanys­tar bóliminde úshinshi hatshy, araǵa jyl tolmaı jatyp Qazaqstannyń Ger­manııadaǵy elshiligine baspasóz-attashe retinde Bonn qalasyna jumysqa jiberildi.

Shetelde tájirıbesin shyńdap, abyroımen elge kelgen soń Gúlsim Baqytqyzy Syrtqy ister mınıstrligi janynan shyǵatyn «Dıplomatııa jarshysy» jýrnalynyń qazaq bólimin basqardy. Keıin bilimin jetildirý maqsatynda SIM janynan ashylǵan Dıplomatııalyq akademııaǵa oqýǵa tústi. Akademııada oqı júrip, aǵylshyn tilin meńgerip, nemis tilin kásibı deńgeıde tereńdete tústi. Keıin Máskeýde RF SIM Dıplomatııa-lyq akademııasyn da támamdaǵanyn aıta ketý kerek. Osylaısha, dıplomatııa salasyna dendep enip, kásibı halyqaralyq qatynastar mamandyǵyn ıelengen ol 1999 jyly sol kezdegi Syrtqy ister mınıstri Qasym-Jomart Toqaevtyń arnaıy buıryǵymen Almatydan Astanaǵa qonys aýdarýshylar qataryndaǵy memlekettik qyzmetkerlermen birge elordaǵa kóship keledi. Halyqaralyq quqyq departamentinde jumys istep, memlekettik kelisimder men sharttardy ázirleýge belsene qatysty. Kásibı biliktiliginiń arqasynda Parlament Májilisiniń Halyqaralyq qatynastar, qaýipsizdik jáne qorǵanys komıtetine konsýltant bolyp aýysyp, úsh jyl boıy kóptegen zańdy daıyndaý úderisine qatysyp, «Dıplomatııalyq qyzmet týraly» alǵashqy zańnyń ázirlenýine tikeleı úles qosty. Alaıda onyń tájirıbesi men áleýetin joǵary baǵalaǵan Syrtqy ister mınıstrligi basshylyǵy ony qaıtadan dıplomatııalyq qyzmetke shaqyryp, 2003 jyly ony Majarstandaǵy Qazaqstan elshiligine dıplomat-ekinshi hatshy etip jiberedi. Bul elde de eki jyldan asa ýaqyt qyzmet atqaryp, elge oralyp, SIM-niń Reseımen qarym-qatynas basqarmasynda eńbek etip, keńesshi dárejesine deıin kóterildi. Keıin Baqylaý jáne qujat aınalymy jáne Aqparatty qorǵaý basqarmalarynyń basshysy qyzmetterin atqardy. Sodan keıin Qazaqstannyń Belarýs elindegi elshiligine keńesshi laýazymynda dıplomat bolyp jemisti eńbek etti.

Alǵashqy aıaqalysyn jýrnalıstıkadan bastaǵan, al búginde dıplomatııa mamanyna aınalǵan Gúlsim Baqytqyzy eshýaqytta qalamyn qolynan tastaǵan emes. Ǵylymı jumystardan da qol úzbedi. Onyń bir dáleli – 2008 jyly «Farıza Ońǵarsynova – pýblısıst» atty kandıdattyq dıssertasııa­syn qorǵap, fılologııa ǵylymdarynyń kandıdaty atanýy. Al 2016 jyly «Farıza – kósemsóz patshaıymy» atty kitaby, 2023 jyly pýblısıstıkalyq maqalalary, suhbattary men esseleri toptastyrylǵan «Ushqyr qalam» atty kitaby jaryq kórdi. 2024 jyly «Bal­ǵyn daýys» dep atalatyn kitabyn balapandarǵa bazarlyq retinde usynsa, byltyr «Otyz jyldyń oı-tolǵaýy» atty kitaby kópshilik qolyna tıdi. Onda avtor memleket jáne qoǵam qaıratkeri Qýanysh Sultanovpen baıyp­ty suhbattasady.

Búginde kásibı maman L.N.Gýmı­lev atyndaǵy Eýrazııa ulttyq ýnıver­sıteti jýrnalıstıka jáne áleýmettik ǵylymdar fakýltetinde dosent-prak­tık retinde dáris oqıdy. Bir aıta keterlik jaıt, onyń otbasyn «jýrnalıster otbasy» deýge tolyq negiz bar. Jubaıy Seısenhan Mahanbet – birqatar basylymdy basqarǵan tájirıbeli jýrnalıst ári kásibı sýretshi. Perzenti Aqerke Seısenhanqyzy L.N.Gýmılev atyndaǵy EUÝ jýrnalıstıka fakýltetin úzdik támamdap, qazir BAQ salasynda eńbek etip júr.

Búginde G.Eńsepova – Syrt­qy ister mınıstrliginiń saıası depar­tamen­tinde TMD elderimen baılanys basqarmasynda keńesshi. Dıplomatııa salasyndaǵy uzaq jylǵy eńbegi elenip, «Qurmet» ordenimen, «Eren eńbegi úshin» medalimen marapattaldy. Budan basqa halyqaralyq jáne salalyq tósbelgileri de bar. Ol  – I synypty keńesshi dıplomatııalyq rang ıesi. Syrtqy ister mınıstrligi salasynda 33 jyl  ótili bar dıplomat – memlekettik til men mádenıettiń nasıhatshysy.