«Aıgólek» jýrnaly aqyn Qymbat Ábildaqyzynyń bastamasymen, jeke qarjysymen 2000 jyldyń tamyz aıynda jaryqqa shyqty. Osydan shırek ǵasyr buryn otbasynyń bir bólmeli páter alýǵa jınaǵan qarajaty 24 bettik jýrnaldyń qanatqaqty nómirin oqyrmannyń qolyna tıgizýge ǵana jetti. Odan keıin bas redaktordyń kún jortyp, tún qatqan tynymsyz eńbeginiń nátıjesinde demeýshi de tapty. Oqyrman mádenıetin qalyptastyryp, «Aıgólek» jýrnaly oqyrmanynyń sanyn 25 jyldyń ishinde 80 myńǵa jetkizdi. Oqýshy qaýymnyń kóńil kiltin dóp basyp, muraty bıik oqyrmannyń talǵamyna tatıtyn súıekti qadaý-qadaý jobalardy júzege asyrdy. Jýrnalda jarııalanǵan báıge-baıqaý jeńimpazdaryna arnalyp, segiz márte respýblıkalyq festıval ótti. Osy 25 jyldyń bederinde 2025 bala «Aıgólektiń» jas tilshisi, al 1996 bala «Aıgólektiń» jas sýretshisi kýáligin aldy. Ǵasyr shıreginde jýrnaldyń 295 nómiri óz oqyrmanymen qaýyshyp, rýhanı qazyna syılady.
Jýrnaldyń jazylýshylaryn balasynýǵa áste bolmaıdy, olardyń talǵamyna tatymdy dúnıe usynǵanda ǵana kóńil pernesi ashylady. Muny medet tutqan jýrnaldyń bas redaktory ár betke basylatyn sýretti tek kásibı qylqalam sheberlerine ǵana beıneletedi. Anyǵy, bul kúnde «Aıgólektiń» ajaryn ashyp, árin kirgizetin 22 qylqalam sheberi – jýrnaldyń turaqty avtory.
Byltyr qarasha aıynda qazaq mádenıetiniń maıtalmany, KSRO halyq ártisi, Qazaqstannyń Eńbek Eri Asanáli Áshimov jýrnaldyń 25 jyldyq mereıtoıyna oraı aıtqan lebizin bylaı sabaqtaıdy. «Aıgólek» jýrnaly – Qymbattyń qazaqqa degen zor súıispenshiliginiń jemisi. 2000 jyly menen suhbat alyp, ózi fotoapparatpen fotoǵa túsirip, jýrnalǵa jarııalaǵanda «bul ózindik soqpaǵy bar, minezdi adam, bilimdi maman» dep tanydym. Qarapaıym ǵana adamnyń qıyn kezde balalar jýrnalyn ashyp, jaryqqa shyǵarýy ońaı emes. Sóz joq, júrektiń isi, balaǵa degen mol meıirimmen, janashyrlyqpen, jan aıamas eńbekpen daıyndalatynyna kózimiz jetti. Jýrnaldyń bas redaktoryn bar qazaqtyń balasy jaqsy kóretin sııaqty. Ony jazǵan-syzǵandarynan kórip, adal eńbektiń ádil baǵasyn ózderi berip jatqanyna kóńilim ósip marqaıyp qalamyn», depti Asanáli Áshimuly.
Al M.Áýezov atyndaǵy Ádebıet jáne óner ınstıtýtynyń bas ǵylymı qyzmetkeri, fılologııa ǵylymdarynyń doktory, professor Gúlzııa Pirálıeva jýrnaldyń eńbegi eren ekenin aıtady. «Balalar baspasózi tek jazbalar, maqalalar tizbesi emes, ol eldiń erteńine jasalyp jatqan rýhanı muralar mekeni, perishte-perzentterimizdiń pák taza peıilderimen jazylǵan, soǵan laıyqtalyp túzilgen adamzattyń aqyl-oıynyń qaınar kózi de. «Aıgólek» jýrnalyndaǵy tasqa túsken jazýlar – urpaqtan-urpaqqa, ǵasyrdan-ǵasyrǵa jeter jádigerler, adamzattyń kóp ǵasyrlyq mádenıeti, ár ulttyń urpaǵyna qaldyrar murasy. Ana tilin umytqan urpaq óz halqynyń ótkeninen de, bolashaǵynan da qol úzeri aqıqat. «Tárbıe – tal besikten» degen halyq danalyǵyn dáriptegen «Aıgólek» jýrnalynyń búgingi urpaqtyń árbir qadamyna qýanyp, sáttilik tilep, úmit artyp, senimmen qaraýy árbir ata-anany qýantady», deıdi ǵalym.
Alashtanýshy ǵalym, professor Aıgúl Ismaqova búı deıdi: «Biz jyraýlar men bı sheshenderdiń sózine bılikti baǵyndyrǵan qazaqtyń urpaǵymyz. Alashtyń ǵalymdary Júsipbek Aımaýytuly «Psıhologııa», Maǵjan Jumabaıuly «Pedagogıka» eńbekterinde bylaı dep eskertken: «Balanyń jany men tánine kerek sózder aıtylmaǵan kezde onyń jany tozady. Tánniń ǵana ústemdigi artqan ýaqyt mannyń eń basty qateri bolady». О́kinishke qaraı, biz osyndaı kezde ómir keship otyrmyz. Men óz balasy men nemeresine qandaı jan azyǵyn bererin bilmeıtin ata-analarǵa nyq senimmen, negizgi kómekshi bola alatyn mazmuny men kórkemdigi úılesken «Aıgólek» jýrnalyn oqýdy usynar edim! Bul jýrnaldy oqyp, qanshama qazaqtyń balalarynyń órkeni ósti. Jýrnalda qazirgi zamanaýı JI-dan bastap, balanyń janyn tárbıeleýge ne qajet ekeni soqyrǵa taıaq ustatqandaı ap-anyq beriletin jýrnaldy urpaǵyńmen birge oqý kerek».
Eldiń búgini men bolashaǵyna beıjaı qaramaıtyn, ulaǵatty urpaq qamyn oılaıtyn ár ata-ananyń júregine jol taýyp kele jatqan Qymbat Ábildaqyzynyń arqalaǵan amanaty áste jeńil emes. Bizdiń oı da ádebıet synshysy Álııa Bópejanovanyń pikirin qýattaı túsedi. «Oralhan Bókeıdiń: «Uly isterdi úndemeı júrip tyndyrar bolar» deıtini eske túsedi. «Aıgólekteı» jýrnal shırek ǵasyrdan beri úzilissiz, aıdan aıǵa mazmuny máıektenip, jarqyrap, óz ǵaryshyna alǵan balany azamattyqqa deıin jetkizýiniń basty bir sebebi – basshylyǵynda osyndaı uly isti sharshadym demeı júrip tyndyratyn tulǵanyń bolýy. Ol «Aıgólektiń» anasy atanǵan, qazaq balalarynyń rýhanı ustazy, qazaqtyń rýhty, qaıratker, ultshyl, elin súıer qyzy, belgili aqyn Qymbat Ábildaqyzy» degen synshynyń alǵaýsyz lebizi laıyqty baǵa dep bilemiz. Qara orman oqyrmany barda jýrnaldyń jasaı bereri haq.
