1917 jylǵy 1-4 qazan aralyǵynda Omby qalasynda «Birlik» uıymynyń jalpy jıylysy ótti. «Qazaq» gazetiniń 1918 jylǵy №259 sanynda osy jıyn týraly «Ombydaǵy «Birlik» qaýymy» degen habar jarııalandy. Habarda jıylysty Maǵjan Jumabaıuly basqarǵany, sondaı-aq Dinshe Ádilov pen Májiken Súleımanovtyń hatshy bolǵany jazyldy. «...Ombyda oqyp júrgen qazaq jastary 1914 jyldyń basynda jasyrynyp júrip, «Birlik» atty qaýym ashqan edi. Bostandyq bolmastan buryn bular kitap bastyryp, «Balapan» atty jýrnal shyǵaryp, jastardyń kózin ashyp, kóńilin oıatyp, ult qyzmetine kiristi. Bostandyqtan buryn bul «Birlikten» basqa esh jerde jastar uıymy joq edi», – deıdi gazet. Sonymen qatar habarda «Birliktiń» úsh jyldyq esebi berilip, 8 tarmaqtan turatyn qaýly qabyldanǵany aıtylǵan. Osy qaýlynyń «Balapan» jýrnalyn zoraıtý» dep atalatyn 7-tarmaǵynda: «...Jýrnal basqarmasyna úsh kisi saılandy. Olarǵa taǵy eki qolǵabysshy belgilendi», – delingen. Alaıda úsh shyǵarýshynyń kimder ekeni kórsetilmegen. Bizdiń paıymymyzsha, jýrnal basqarmasyna saılanǵan úsh kisi – Bekmuhamed Serkebaev, Smaǵul Sádýaqasuly jáne Ábdirahman Baıdildın. Bulaı senimdi aıtatyn sebebimiz – Omby memlekettik tarıhı-ólketaný mýzeıinen tabylǵan «Balapannyń» 1918 jylǵy №9 sanynda shyǵarýshy retinde osy úsheýiniń esim-soıy kórsetilgen. Sondaı-aq osy sanda úsheýiniń jazbalary da jarııalanǵan.
Sol kezdegi saqtyq bolsa kerek, «Balapannyń» avtorlary shyǵarmalaryn búrkenshik esimmen jazypty. Nómirde úsh óleń, eki áńgime, eki habar, bir-birden maqala men feleton jaryq kóripti. Sonyń úsheýin Serke jazǵan eken. Jýrnalǵa Serkeniń «Qonǵan jerimnen», «Kók tóbetke» jáne «Abylaı» degen úsh shyǵarmasy basylǵan. Bizdiń oıymyzsha Serke – Bekmuhamed Serkebaev. Sebebi búrkenshik esimder arasynda aty-jóniniń ishinen jańa esim jasaý (anagramma) ádisi bar. Osy tásilmen Qoshmuhamed Kemeńgeruly – «Qoshke», Júsipbek Aımaýytuly «Jik» bolǵany belgili. Demek «Serke» – Serkebaevtan shyǵarylǵan búrkenshik esim. Ádette qoljazba jýrnal shyǵarýshylary ózderi daıyndaǵan nómirge meıilinshe molyraq úles qosady. Bir nómirge Serkeniń úsh jazbasynyń shyǵýy bul búrkenshik esimniń ıesi Bekmuhamed ekenin aıǵaqtaı túsedi.
Osy sanda sonymen qatar Babasannyń «Aqylsyz sulý» óleńi jarııalanǵan. Ol óleńinde adamdy syrt kelbetine emes, minezine qarap baǵalaý qajettigin aıtady. Babasandy «Birlik» uıymynyń múshesi ári hatshysy Ábdirahman Baıdildın bolar dep shamaladyq. Sebebi ol ýaqytta rý atymen atalatyn búrkenshik esimder kezdesetin. Máselen, Mirjaqyp Dýlatulynyń «Madııar» esimin qoldanǵany belgili. Ábdirahman Baıdildın arǵynnyń Babasan rýynan shyqqan. Demek Babasan qalam atyn qoldanýy ábden múmkin. Ábdirahman 1922 jyly «Egemen Qazaqstan» gazetiniń redaktory boldy. Bıyl qaıratker tulǵanyń týǵanyna 135 jyl tolady.
«Balapannyń» 1918 jylǵy №9 sanynda Smaǵul Sádýaqasulynyń jazbalary jarııalanbapty. Alaıda osy sandaǵy «Shyǵarýshy uıymynan» degen taqyryppen berilgen jazbada Bekmuhamed, Ábdirahmanmen birge Smaǵuldyń da aty kórsetilgen: «...Kóńilinde ultqa qyzmet etemin, qazaq ádebıetiniń alǵa basyp, zoraıýyna sebepshi bolamyn degen adam qalammen qyzmet etýleri tıis. Al azamattar! Bastalǵan iske salaqtyq kórsetpeı, jumyla qolqabysyn qylyp, az ýaqyttaryńyzdy bólip, jýrnalǵa sóz jazyp turýlaryńyzdy shyǵarýshylar qatty ótinedi. Shyǵarýshylar: Bekmuhamed Serkebaı, Ysmaǵul Sadýaqas, Ǵabdrahman Baıdaly». Osylaısha, jýrnal shyǵarýshylary qazaq jastaryn «Balapan» jýrnalyna belsendi túrde atsalysýǵa, qalammen qyzmet etýge shaqyrǵan. Soǵan qaraǵanda Bekmuhamed Serkebaev, Smaǵul Sádýaqasuly jáne Ábdirahman Baıdildın jýrnaldyń 1917–1918 jyldardaǵy shyǵarýshylary bolǵan syńaıly. Al onyń aldyndaǵy 1916–1917 jyldary jýrnaldy Qoshke Kemeńgeruly, Maǵjan Jumabaev shyǵarǵan bolýy kerek.
Alashtanýshy ǵalym Dıhan Qamzabekuly Omby oblystyq memleket arhıvindegi qujattarǵa súıene otyryp, «Balapannyń» jaýapty shyǵarýshysy Qoshke Kemeńgeruly bolǵanyn jazǵan edi. Ǵalymnyń jazýynsha, «Balapannyń» 1917 jylǵy №5 sanynda Qoshkeniń «Gore ot ýma» («Aqyldyń azaby») shyǵarmasynan úzindi jarııalanypty. 1918 jylǵy 30 shildede «Birlik» uıymy janynan «Jas azamat» gazeti shyqqanda basylymnyń alǵashqy redaktory Qoshke Kemeńgeruly bolǵan edi. Soǵan qaraǵanda Qoshke «Balapannyń» shyǵarýshysy qyzmetin 1917 jylǵy qazanǵa deıin atqaryp, ary qaraı «Jas azamat» gazetiniń tizginin ustaǵan sekildi.
Sonymen qatar «Balapannyń» taǵy bir shyǵarýshysy Maǵjan Jumabaıuly boldy. Maǵjan qoljazba jýrnalǵa aqjoltaı tilegin arnap: «Balapan qanat qaqty... Jas edi. Qanaty da qatyp jetken joq edi. Amalsyz qaqty. Soltústiktiń sýyǵyna shydaı almady. Sýyq jel súıegine jetti. Yzǵar ókpesine ótti...», dep keletin allegorııalyq týyndysyn jarııalady.
Jýrnal redaktorlary «Balapan» qoljazba jýrnalyn shyǵarý arqyly jazýǵa ıkemi bar qalam ıeleriniń shyǵarmashylyǵyn shyńdady. Jýrnalda negizinen ádebı týyndylar jarııalanyp, qazaq ádebıetiniń damýyna serpin berdi. Endeshe jazba ádebıetti jańa sapaǵa kótergen «Balapannyń» eńbegi áli de baǵamdalýy kerek dep bilemiz.
