Aıda Balaeva Konstıtýsııa jobasyn halyqqa túsindirý maqsatynda qurylǵan «Ádiletti jáne Progressıvti Qazaqstannyń Halyqtyq Konstıtýsııasy úshin!» Jalpyulttyq koalısııasy tóraǵasynyń orynbasary retinde árbir azamattyń reformanyń shynaıy mazmunyn tereń túsinýi aıryqsha mańyzdy dep sanaıtynyn aıtty. О́ıtkeni 15 naýryzda qabyldanatyn sheshim eldiń erteńine qatysty sanaly azamattyq ustanymnyń kórinisi bolmaq.
«Eń aldymen, búkil qujattyń maǵynalyq ózegin aıqyndaıtyn preambýlaǵa toqtalǵan jón. Ol «Biz, birtutas Qazaqstan halqy…» degen sózdermen bastalady. Osy mańyzdy tujyrym memlekettegi bıliktiń birden-bir qaınar kózi halyqtyń ózi ekenin, Konstıtýsııanyń shynaıy avtory el azamattary ekenin bildiredi. Jańa jobada «baıyrǵy qazaq jerindegi memlekettilikti nyǵaıtý» jáne «Uly Dalanyń myńjyldyq tarıhynyń sabaqtastyǵy» aıqyn kórsetilgen. Bul qazirgi Qazaqstan Respýblıkasynyń tarıhı tamyry tereń, ulttyń bolmysy men rýhanı murasyn saqtaý jolyndaǵy sabaqtastyq saqtalatynyn aıqyndaıdy», dedi Aıda Balaeva.
Mınıstr sonymen qatar memlekettiń ýnıtarlyq sıpaty, shekaranyń myzǵymastyǵy men aýmaqtyq tutastyǵynyń konstıtýsııalyq deńgeıde bekitilýi – eldiń tutastyǵy men turaqtylyǵynyń basty kepili ekenin atap ótti.
«Qazaqstan árdaıym birtutas, bólinbeıtin memleket bolyp qala beredi. Preambýlada alǵash ret elimizdiń damý baǵytyn aıqyndaıtyn mańyzdy qundylyqtar da kórinis tapqan. Atap aıtqanda, Ádiletti Qazaqstan ıdeıasy men «Zań men Tártip» qaǵıdaty. Bul negizgi ustanymdar quqyq ústemdigin qamtamasyz etýge, zań aldynda barshanyń teńdigin ornyqtyrýǵa jáne bıliktiń qoǵam aldyndaǵy jaýapkershiligin arttyrýǵa baǵyttalǵan», dedi mınıstr.
Aıda Balaevanyń paıymdaýynsha jańa Ata zań adam quqyǵy men bostandyǵyn basty orynǵa qoıady. Osylaısha, adam jáne onyń qadir-qasıeti konstıtýsııalyq modeldiń ózegine aınalyp otyr.
«Qoǵamdaǵy birlik, yntymaq, etnosaralyq jáne konfessııaaralyq kelisim qundylyqtary da erekshe atap ótilgen. Dál osy qundylyqtar elimizdegi beıbitshilik pen turaqtylyqtyń berik negizin qalyptastyrady. Mádenıet, bilim, ǵylym men ınnovasııany damytý, sondaı-aq tabıǵatqa uqypty ári jaýapkershilikpen qaraý da eldiń jańǵyrý jolyndaǵy basty basymdyqtar retinde kórinis tapqan.Biz beıbitshilik pen barlyq memlekettermen syılastyqqa negizdelgen dostyq qarym-qatynas ornatýǵa umtylamyz jáne keleshek urpaq aldyndaǵy tarıhı jaýapkershiligimizdi tereń sezinemiz.Preambýla «…Qazaqstan Respýblıkasynyń Ata zańyn – osy Konstıtýsııany qabyldaımyz» degen sózdermen aıaqtalady. Bul qoǵam bolyp sanaly túrde uıysyp, el bolashaǵyna ortaq jaýapkershilik júgin birge kóterýge degen daıyndyqtyń kórinisi dep bilemin», dedi ol.
