Kezinde mańǵystaýlyq ıhtıolog Zulqash Baımyrzaev Kaspııge ákelip jersindirgen kefaldiń ózi brendke aınalǵan edi. Alaıda bir kezderi balyq sharýashylyǵy dúrkirep turǵan Aqketikte búginde óndiris báseńdep, balyq aýlaý, ony tazartý, daıyndaý, konservileý týraly estelikter ǵana aıtylady.
Degenmen úmit oty qaıta janǵandaı. Quryq portynan 20 shaqyrym ońtústikte qolǵa alynǵan tyń bastama teńizge telmirgen turǵyndardy jergilikti ónimmen qamtamasyz etýdi kózdeıdi. Aýyl sharýashylyǵy mınıstrligi, Mańǵystaý oblysynyń ákimdigi, Balyq sharýashylyǵy komıteti, «Kaspıı» ÁKK» AQ qoldaýymen júzege asyp jatqan jobanyń áleýeti zor.
2025 jyldyń sońǵy aılarynda «Organic Fish» kompanııasy óńirde, jalpy elimizdiń tarıhynda tuńǵysh ret teńiz akvamádenıetin damytýdy qolǵa aldy. Kaspıı teńiziniń akvatorııasyndaǵy arnaıy tor qorshaýlarǵa albyrt tuqymdas balyqtardyń alǵashqy partııasyn sýǵa túsirdi.
Qazirde joba belsendi kezeńge ótti. Mamandardyń aıtýynsha, shabaqtar ashyq teńiz jaǵdaıyna sátti beıimdelip, turaqty ósim kórsetip otyr. Bastapqyda ortasha salmaǵy shamamen 200 gramm bolǵan balyqtar qazir 300–350 gramǵa deıin jetti. Qysqa ýaqytta bıomassa 50 paıyzdan astam ulǵaıyp, búginde tor qorshaýlardaǵy balyqtyń jalpy salmaǵy 20 tonnadan asty.
Balyq ósirýge bul aýmaq kezdeısoq tańdalmaǵan. Tabıǵı sý almasý úderisi, teńiz aǵystary, tabıǵı temperatýralyq rejimi sý jándikteriniń ósip-jetilýine óte qolaıly. Joba tabıǵı resýrstardy jaýapkershilikpen paıdalaný qaǵıdattaryna, norvegııalyq ozyq tehnologııalar men standarttarǵa negizdelgen. Osylaısha, teńiz tósindegi temir qorshaýlarda albyrttar alańsyz ári erkin ósip keledi.
Mańǵystaý oblysy
