Sýret: instagram.com/kuziyev_zakirzhan/
Senatorlar Janbolat Jórgenbaev pen Zakırjan Kýzıev Almaty oblysyndaǵy jumys sapary aıasynda Alataý qalasynda ornalasqan «Knaýf Gıps Qapshaǵaı» JShS eńbek ujymymen kezdesti.
«Referendým – elimizdiń damýynyń strategııalyq baǵytyn aıqyndaıtyn mańyzdy qoǵamdyq-saıası qadam. Azamattardyń memleket ómirinde sheshim qabyldaýǵa tikeleı qatysýy demokratııa qaǵıdalaryn nyǵaıtady jáne qoǵam men bılik arasyndaǵy ózara senimdi arttyrady. Ashyq talqylaý men pikir almasý qoǵamdyq kelisimdi nyǵaıtýǵa yqpal etip, memleket pen azamat arasyndaǵy syndarly dıalogti damytýǵa negiz qalyptastyrady», dedi J.Jórgenbaev.
Al senator Altynbek Nuhuly «Ádiletti jáne progressıvti Qazaqstannyń halyqtyq Konstıtýsııasy úshin!» jalpyulttyq koalısııasynyń múshelerimen birge Pavlodar oblysynda Marǵulan ǵylymı ortalyǵynda ǵylymı qoǵamdastyq ókilderimen kezdesti. Ol negizgi zań jobasy memlekettik saıasattyń strategııalyq basymdyqtary retindegi bilim, ǵylym jáne ınnovasııanyń rólin kúsheıtýdi kózdeıtinin aıtty. Kezdesýde sondaı-aq mádenı murany saqtaýǵa, ulttyq biregeılikti nyǵaıtýǵa jáne qundylyqtardyń sabaqtastyǵyn qamtamasyz etýge baǵyttalǵan erejeler, tehnologııalyq, sıfrlyq damýdy quqyqtyq jaǵynan kúsheıtý máseleleri talqylandy.
Depýtattar Shákárim Buqtuǵutov pen Olga Býlavkına Shyǵys Qazaqstan oblysynyń halqymen kezdesti. Olar Altaı qalasynyń turǵyndary men quqyq qorǵaý organdarynyń ókilderine jańa zań jobasynyń basty erejeleri – memlekettik basqarý úlgisin júıeli jańartý, Parlamenttiń rólin kúsheıtý, qoǵamdyq baqylaý tetikterin keńeıtý, sondaı-aq azamattardyń quqyqtary men bostandyqtarynyń kepildikterin nyǵaıtý máselelerin aıtyp berdi. Senatorlar belsendi azamattyq ustanym tanytyp, turǵyndardyń jańa konstıtýsııa jobasyna beıjaı qaramaı aldaǵy referendýmǵa qatysatyndaryna senim bildirdi.
Sonymen qatar Qyzylorda oblysyna jumys sapary barysynda Rýslan Rústemov jańa Konstıtýsııa jobasynyń erejelerin jáne zańdylyq pen ekonomıkalyq qaýipsizdikti nyǵaıtý máselelerin túsindirýge arnalǵan birqatar kezdesý ótkizdi. Tasbóget kentinde turǵyndarmen mazmundy kezdesý ótti. Onda negizgi zańnyń jańa redaksııasynyń jobasyn qalyptastyrýdaǵy mańyzdy tásilder talqylandy.
