Bul joly 22 otbasy baspanaly boldy. Al aldaǵy aılarda taǵy 14 páter berilmek. Oblys ákimi Berik Ýálı jumys saparymen Kýrchatov qalasynda bolyp, saltanatty jıynǵa qatysty. Byltyr jeke ınvestor esebinen shahardaǵy Shkolnaıa kóshesinde ornalasqan 36 páterli tórt qabatty turǵyn úıdi qalpyna keltirilgen. Onda 8 bir bólmeli, 16 eki bólmeli jáne 12 úsh bólmeli páter bar. Atalǵan baspanalar halyqtyń áleýmettik osal toptary sanatyndaǵy kezekte turǵan azamattarǵa arnalǵan. Búginde páterler tolyq satyp alynyp, turǵyndarǵa bólý úshin «Otbasy bank» AQ-ǵa berildi.
«Búgin el úshin eleýli, halyq úshin qýanyshty sátke jınalyp otyrmyz. Búgin 22 otbasy qonys toıyn toılaıdy. Aldaǵy aılarda taǵy 14 páter osy sanattaǵy azamattarǵa beriletin bolady. Iаǵnı, 36 otbasy baspanaǵa qol jetkizedi. Bul baspanalar áleýmettik osal toptaǵy azamattarǵa, jetim balalarǵa berilip otyr. Bul – jaı ǵana baspana emes, jańa ómirdiń, erteńgi kúnge degen úmit pen senimniń bastaýy. Bul – memlekettiń halyq aldyndaǵy áleýmettik jaýapkershiliginiń naqty kórinisi. Aldaǵy ýaqytta qaladaǵy osyndaı úsh kóp qabatty úı qaıta jańǵyrtylyp, halyqtyń ıgiligine beriletin bolady», dedi Berik Ýálı.
Oblys ákimi jańa qonys ıelerin qonys toıymen quttyqtaǵan ol elimiz úshin tarıhı tańdaý Konstıtýsııalyq referendým turǵanyn, bul memlekettiligimizdi nyǵaıtý men demokratııalyq qundylyqtardy ornyqtyrý jolyndaǵy jaýapty qadam ekenin de aıta ketti. Sonymen qatar jańa qonys ıeleri de óz rızashylyqtaryn jetkizdi.
«Búgin biz úshin erekshe kún. Jyldar boıy kezekte turǵan turǵyndar baspanaly bolyp, qýanyp jatyr. Qalamyz kúnnen kúnge kórkeıip keledi. Memleket basshysynyń tapsyrmasyna sáıkes Kýrchatovqa «ǵylym qalasy» mártebesi beriletinin estip jatyrmyz. Osyndaı qoldaý kórsetkeni úshin Prezıdent Qasym-Jomart Toqaevqa rızashylyǵymyzdy bildiremiz», dedi qala turǵyny Qabdrashıt Tóleýhanuly.
Qalalyq ákimdiktiń dereginshe, Kýrchatovta qýattylyǵy 700 MVt bolatyn kondensasııalyq elektr stansııasyn, kómirdi tereń óńdeıtin kómir-hımııa keshenin salý syndy iri jobalardy iske asyrý josparlanǵan. Buǵan qosa jylyna 150 myń tonna molıbden kenin óńdeıtin baıytý fabrıkasyn salý kózdelip otyr eken.
«Infraqurylymdy damytý baǵytynda da aýqymdy jumys atqarylýda. 2025 jyly «Kýrchatov–Pavlodar» avtojolynyń ýchaskesi paıdalanýǵa berildi. «Semeı-Kýrchatov» tas jolyna respýblıkalyq mańyzy bar jol mártebesi berý jumysy júrgizilip jatyr. Bul aldaǵy ýaqytta jol sapasyn arttyryp, qatynas tıimdiligin kúsheıtýge múmkindik beredi. Qalanyń kóshe-jol jelisin jańǵyrtý aıasynda asfalttyń birinshi qabaty tóseldi, 2026 jyly ekinshi qabatyn tóseý jumystary aıaqtalady. «Qazsınk» AQ demeýshiligimen aýlaishilik joldar 100 paıyz jańartyldy», deıdi ákimdiktiń baspasóz qyzmeti.
Olardyń málimetinshe, 2025 jyly qaıta jańǵyrtylǵan Balalar men jasóspirimder shyǵarmashylyq úıi qoldanysqa berildi. Jastarǵa arnalǵan ǵımarat qalpyna keltirilip, eki kóppáterli turǵyn úıdiń qurylysy aıaqtaldy. Qaladaǵy №2 orta mektep tolyq jańǵyrtyldy. Sonymen qatar «Degeleń» stansııasynda temirjol perronyn jańartý jáne jańa vokzal ǵımaratynyń qurylysy qarqyndy júrgizilip jatyr.
Qala ákimi Bolat Ábdiralıevtiń aıtýynsha, Kýrchatov qalasyna 2026–2035 jyldarǵa arnalǵan ǵylym qalashyǵyn damytý jobasy ázirlenip jatyr. Munyń áseri qalanyń qaıta jandanýyna zor áser etpek.
«Qalada qajetti áleýmettik jáne ınjenerlik ınfraqurylym qalyptasqan, sondaı-aq aýmaqtyq keńeıýge múmkindik beretin bos jer telimderi saqtalǵan. Qazaqstan Respýblıkasynyń Atom energııasy jónindegi agenttigi 2026–2035 jyldarǵa arnalǵan Kýrchatov qalasynda ǵylym qalashyǵyn damytý tujyrymdamasynyń jobasyn ázirledi. Ǵylym qalashyǵy mártebesin berý rásimderin 2026 jyldyń jeltoqsan aıynda aıaqtaý josparlanyp otyr. Atalǵan mártebe berilgen jaǵdaıda qala áleýmettik, ekonomıkalyq jáne demografııalyq damý turǵysynan jańa serpin alyp, halyqaralyq ǵylymı jobalar men ınvestısııalar tartý úshin tartymdy ortalyqqa aınalady», dedi qala ákimi.
Rasynda Memleket basshysy Qasym-Jomart Toqaev Ulttyq quryltaı otyrysynda Kýrchatov qalasynyń ǵylymı áleýetine arnaıy toqtalyp, ony elimizdegi ekinshi ǵylym qalashyǵy retinde damytý máselesin kótergen bolatyn. Prezıdent Úkimetke jáne tıisti vedomstvolarǵa qalada ǵylym qalashyǵyn qalyptastyrýdyń naqty josparyn ázirleýdi tapsyrǵan.
Bolat Tańsyqbaıulynyń aıtýynsha, joba aıasynda joǵary tehnologııalyq óndiristerdi qoldaý, basym ǵylymı jáne ǵylymı-tehnıkalyq baǵyttardy damytý, ınnovasııalyq qyzmetti ilgeriletý, ǵylymı jáne bilim berý ınfraqurylymyn nyǵaıtý, sondaı-aq ǵylymı ázirlemelerdi kommersııalandyrý men ınvestısııalar tartý tetikterin jetildirý kózdelgen.
Aıta keteıik, ótken aptada Semeı qalasynda Ushaqtar kentindegi áleýmettik osal toptaǵy azamattarǵa 60 páterli berilse, Qaraǵaıly yqsham aýdanynda byltyr jalpy aýmaǵy 27 myń sharshy metr bolatyn 5 turǵyn úı paıdalanýǵa berildi. Osylaısha, Abaı elinde bir aptada ishinde elý shaqty tútin jańa úıli bolyp, qonys toıyn toılady.
