Almaty taý klasteriniń áleýeti joǵary: Halyqaralyq mamandar pikiri bir arnada toǵysty

Osymen úshinshi ret Ázerbaıjan, О́zbekstan, Qazaqstan, Reseı, Ońtústik Koreıa elderiniń taýdaǵy kýrorttaryn toǵystyryp otyrǵan otandyq ETKA jobasy tabyssyz da emes. Festıvaldyń alǵashqy kúninde-aq Shymbulaq pen Eýra­zııanyń áıgili kýrorttary Jasyl har­tııaǵa qol qoıyp úlgerdi. Festıval buǵan deıin Ázerbaıjandaǵy «Shahdag» taý ký­ror­tynda ótkizilse, kelesi basqosý Tashkent mańyndaǵy «Amırsoıda» josparlanǵan.

«Oi-Qaragai» taý kýrortynyń Aqtas bazasynan bastaý alǵan festıvaldyń basty oqıǵasy – «Kazakh tourism development» (KTD) kompanııasy qolǵa alyp otyrǵan «Almaty superski» taý-shańǵy kýrorty jobasynyń tanystyrylýy.

Kompanııanyń bas atqarýshy dırektory Erjan Erkinbaev halyqaralyq deńgeıdegi jańa taý-shańǵy kýrorty 5 myńǵa jýyq adamǵa jumys taýyp berip, Shymbulaq pen onyń aınalasyndaǵy kishigirim demalys oryndaryna túsetin salmaqty da bólisetinin atap ótti. Bir jaǵynan bul joba aımaqtaǵy eń iri jumys berýshige aınala otyryp, shahardaǵy shaǵyn jáne orta bıznestiń damýyna serpin bermek.

«Almaty superski» jobasynyń aıasynda ártúrli deńgeıdegi 60 shaqyrymdyq shańǵy trassasyn, kúnine 10 myńdaı adamdy tasymaldaı alatyn ozyq tehno­logııaly 16 aspaly jol salý qaras­tyrylǵan.

Eń bastysy, kezekti taý-shańǵy kýrortynyń ekologııaǵa, qorshaǵan ortaǵa kesiri tımegeni de kerek. Sondyqtan ESG-qaǵıdattarynyń ashyqtyǵy men saqtalýyn qamtamasyz etý, CO₂ shy­ǵyn­daryn qadaǵalaý júıesi engizilip otyr.

Jalpy alǵanda, joba Ile-Alataýy memlekettik ulttyq tabıǵı parkiniń shamamen 1002 gektaryn nemese 0,5%-daı aýmaǵyn alady. Osy aýmaqtyń 20 gektarynda kýrorttyq aýyl, ıaǵnı demalys ornyn salý josparlanǵan.

KTD bas atqarýshy dırektory E.Erkinbaev «Almaty superski» jaı ǵana taý-shańǵy kýrorty emes, ekonomıkany ártaraptandyrýǵa, týrızm men buqaralyq sportty damytýǵa baǵyttalǵan bastama ekendigine toqtaldy.

Jańa joba Almaty taý klasteriniń ózegine aınalyp, elimizdiń áleýeti zor taý týrızmi salasynda ózindik halyqaralyq brendin qalyptastyryp, eldiń jahandyq týrıstik naryqtaǵy bedelin arttyrýǵa múmkindik beredi.

Sýretti túsirgen – Iýrıı BEKKER

Bul jobadan bólek, fes­tıvalda «Shymbulak» pen Eýrazııanyń áıgili kýrorttary Jasyl hartııaǵa qol qoıdy. Eýrazııa keńistigindegi taý týrızmi ındýstrııasynyń turaqty damýynyń ortaq qaǵıdattaryn aıqyndaıtyn strategııalyq qujat taý eko­júıelerin saqtaý, klımatqa keri áserin azaıtý, tabıǵı resýrstardy utymdy paıdalaný syndy ekologııalyq talaptarǵa saı basqarý tájirıbelerin damytý baǵytynda kýrorttardyń ortaq jaýapkershiligin qýattaıdy. Hartııa erikti túrde qabyldanady ári oǵan ózge de taý kýrorttary qosyla alady.

Qujattyń arnaıy bóli­minde ashyqtyq, áriptestik pen utymdylyq qaǵıdattary qamtylǵan. Bul bıznes, memleket, jer­gilikti qaýymdastyqtar men ǵylymı uıym­dar arasyn­daǵy ózara is-qımyldy damytýdy kózdeıdi. Qol qoıýshy taraptardyń birlesken bastamalaryn ETKA-nyń turaqty damý jónindegi saraptamalyq platformasy úılestirip otyrady.

Osy oraıda «Shymbulak» ký­rortynyń bas dırektory Rınat Abdrahmanov: «Shymbulaq úshin Jasyl hartııany qabyldaý – keıingi jyldary júıeli túrde atqaryp kele jatqan jumysy­myzdyń zańdy jalǵasy. Taý kýrorty ekologııalyq tepe-teńdikti saq­tamaı damı almaıdy. Tabıǵı landshaftardy qorǵaý, resýrstardy jaýapkershilikpen basqarý, klımatqa áserdi azaıtý – salanyń uzaqmerzimdi turaqtylyǵynyń negizi», dep atap ótti.

Jasyl hartııaǵa ETKA qura­myndaǵy «Shymbulak Mountain Resort» (Qazaqstan), «Oi-Qaragai Mountain Resort» (Qazaqstan), «Amirsoy Mountain Resort» (О́zbekstan), «Rosa Khutor» (Reseı), «Shahdag Mountain Resort» (Ázer­baıjan), «Grandvalira An­dorra» (Andorra, EO) sııaqty áıgili kýrort­tar qol qoıyp otyr. Mundaı mámile, kelisimderdiń paıdaly tustary kóp. Alıans­qa múshe elder kýrorttarynyń klıent­teri túrli jeńildikteri bar ETKA-nyń Bi­regeı skı-pas kartalaryn qoldana alady. Zamanaýı marketıng degenimiz de osy.

Eýrazııalyq taý kýrorttary alıansy 2023 jyly Eýrazııadaǵy jetekshi taý kýrorttarynyń bas­tamasymen qurylǵan. Alıanstyń maqsaty – taý týrızmi basqarý salasyndaǵy kúsh-jigerdi birik­tirý, týrıstik qyzmet sapasyn arttyrý, sporttyq áleýetti damyta otyryp, turaqty taý týrızminiń úzdik tájirıbelerin ilgeriletý. Alıanstyń shtab-páteri Almaty qalasynda ornalasqan. ETKA quramyna elimizdiń «Shymbulak», «Oi-Qaragai», Ázerbaıjannyń «Shahdag», О́zbekstannyń «Amirsoy», Reseıdiń «Rosa Khutor», sondaı-aq Ońtústik Koreıanyń «Mona Yong Pyong» kýrorttary kiredi. 24 aqpanda «Grandvalira Resorts Andorra» kýrorty Alıansqa qosylýǵa nıettti ekeni týraly memorandýmǵa qol qoıdy.

Sol sııaqty Almatyda Eýra­zııalyq taý kýrorttary alıansy (ETKA) men Andorradaǵy eń iri taý kýrorttary jelisi – «Grandvalira Resorts Andorra» arasynda О́zara túsinistik týraly memorandýmǵa qol qoıyldy. Bul mámile de Grandvalira-nyń Alıans quramyna qosylýǵa nıetti ekendigin, oǵan qosa taý týrızmi salasynda kópjaqty yntymaqtastyqty damytýǵa daıy­n ekenin aıǵaqtaıdy. ETKA atynan memorandýmǵa Alıanstyń bas hatshysy Andreı Kýkýshkın, «Grandvalira Resorts Andorra» atynan Taý bıznesin damytý dırektory Roman Serra qol qoıdy.

Almatydaǵy Eýrazııalyq taý kýrorttary alıansynyń III festıvali jumaǵa deıin jalǵasady.

ALMATY