Kórmeniń ashylý saltanatynda «Káýken Kenjetaev» atty kitaptyń tusaýkeseri ótti. Arhıvtik derekterge negizdelgen bul eńbek óner ıesiniń shyǵarmashylyq jolyn, ómir belesterin jáne ulttyq mádenıetke qosqan úlesin jan-jaqty saralaıdy.
Kórme aıasynda Meńtaı О́tepbergenovtiń jeke qorynan alynǵan, buǵan deıin kópshilikke usynylmaǵan sırek jádigerler qoıyldy. Akter tek sahna men ekran sheberi ǵana emes, sonymen qatar kolleksıoner ári fılatelıst retinde de tanylǵan.
Ekspozısııada 1931-1970 jyldar aralyǵynda jaryq kórgen 200-ge jýyq kıno afıshalar usynyldy. Bul plakattar keńestik kezeńdegi kıno óneriniń kórkemdik stılin, ıdeologııalyq baǵytyn jáne grafıkalyq dızaın erekshelikterin aıqyn kórsetedi.
Sonymen qatar 1932-1990 jyldary shyǵarylǵan kıno jáne fotokameralardyń biregeı úlgileri, keńestik ekran juldyzdary beınelengen ashyq hattar, kıno jýrnaldary men fotomaterıaldar da kórme mazmunyn tolyqtyrdy.
Is-sharaǵa Qazaqstannyń halyq ártisi, Memlekettik syılyqtyń ıegeri Doshan Joljaqsynov, Sháken Aımanov atyndaǵy «Qazaqfılm» AQ ulttyq kınostýdııasy prezıdentiniń mindetin atqarýshy Aıdar Orazbekuly, kınorejısser, akter, ssenarıst Serikbol Meńtaıuly, sondaı-aq sýretshi-dızaıner Ásel Kenjetaeva qatysyp, qazaq kıno óneriniń kórkemdik álemi men estetıkalyq qundylyǵy týraly oı bólisti.
Ulttyq ortalyq mýzeıde «Altyn Orda» jańa kórme zaly ashylady
Kesh barysynda Abaı atyndaǵy Qazaq ulttyq opera jáne balet teatry ártisteri óner kórsetip, rýhanı keshtiń mazmunyn aıshyqtaı tústi.
Saltanatty keshtiń qorytyndysynda qazaq kınosynyń altyn qoryna engen, Káýken Kenjetaev qatysqan «Gaýhar tas» fılminiń óńdeýden ótken, jańartylǵan nusqasy alǵash ret kórermenge usynyldy. Sonymen qatar Meńtaı О́tepbergenov basty róldi somdaǵan «Strannyı mır jelanıı ı nadejd» fılmi kórsetildi.
