Sýretti túsirgen – Erlan OMAR, «EQ»
– Serik aǵa, Keńshilik Myrzabekovpen qulyn-taıdaı tebisip, bir aýylda óstińiz. Ádebıetke de qatar keldińiz. Poezııaǵa qushtarlyǵyńyz qalaı oıandy?
– Bala kúnimizden ertegi tyńdap, batyrlar jyryn oqyp óstik. Sodan ba, jasymyzdan óleń jazyp, ádebıetke úıir boldyq. Keńshilik ekeýmizdiń alǵash kórgen aqynymyz – Nurhan Ahmetbekov. Sol jyldary Torǵaıda Nurhannyń ataǵy aspandap turdy. Talaı márte aıtysqa túsip, top jardy. «Qazaqstannyń halyq aqyny» atandy. Memlekettik syılyqtyń laýreaty boldy. El ishinde jyrshylar aqynnyń «Esim seri», «Ury Qarǵa», «Amangeldi», «Jasaýyl qyrǵyny», «Kúlánda» poemalaryn tańǵa deıin toqtaýsyz jyrlaıtyn. Bul týyndylardy men de jatqa bilýshi edim. Qazir de oıymda qalǵan keıbir shýmaǵyn aıta alamyn. Bir joly aqyndy kórýdiń sáti tústi. Bul – 50-jyldardyń sońy. Nurhan aǵa bizdiń aýyl – Aqshyǵanaqqa keldi. Qasynda respýblıkalyq mýzeıdiń dırektory Sara Esova bar. Alystan kelgen qonaqtar bir syıly kisiniń úıine tústi. Men onyń Nurhan ekenin aıtpaı-aq bildim. Ol kezde 6-7 synypta oqımyn. Aqynǵa syrtynan qyzyǵyp qaraımyn. Alaıda janyna jaqyndaı almaımyn. Bir top adam erip júr. Jurtshylyqpen júzdesti. Mektepti aralady. Sodan keıin aýyl irgesindegi Torǵaı ózenine bardy. Osy sátte Nurhan aǵanyń toptan bólinip, jalǵyz ózi ún-túnsiz aǵyp jatqan ózenge qarap, ońasha oılanyp turǵanyn baıqadym. Osy kórinis maǵan erekshe áser etti. «E, aqyn degen osyndaı bolady eken», dep oıladym.
– Nurhan atamyz qandaı kisi edi?
– Orta boıly, shaǵyn deneli adam eken. Arǵymaq tektes dese bolady. 1963 jyly Nurhan aǵa alpys jasqa toldy. Onda biz mektepte oqımyz. Torǵaıda aqynnyń mereıtoıy bolatynyn estip, Keńshilik ekeýmiz jolǵa jaıaý shyqtyq. Ol kezde kólik qat. Jurttyń deni atpen júredi. Bizdiń aýyl men aýdan ortalyǵynyń arasy 80 shaqyrym. Túıemoınaqtyń tusynan shóp tıegen bir mashına kezdesti. Shopyry egde kisi. Toqtap, jónimizdi surady. Biz oǵan Nurhannyń toıyna bara jatqanymyzdy aıttyq. Álgi adam oılanyp turdy da: «Senderdi otyrǵyzatyn jer joq. Shóp tıep bara jatyrmyn. Biraq shóptiń arasyna ornyǵyp alyńdar. Eshkimge kórinbeńder», dedi. Sóıtip, Torǵaıǵa jettik. Birden toı ótip jatqan Mádenıet úıin taýyp aldyq. Ishi lyqa toly adam. Ine shanshar oryn joq. Syrtqy esik aıqara ashyq. Keıbireýler daladan tyńdap tur. Keńshilik ekeýmiz ıin tiresken adamdardyń arasynan synamalap ótip, esik aýzyna jaqyndap turdyq. Almatydan Syrbaı men Ǵafý kelipti. Syraǵań aqyn shyǵarmashylyǵy týraly baıandama oqyp jatyr. Onyń sonda sóılegen sózi áli jadymda. «Nurekeń alpysqa alqynyp jetken joq, sharq uryp jetti. Nurekeń alpysqa eńbektep jetken joq, orasan eńbekpen jetti. Biz Nurekeńe Alataýdyń bir bıigin syılasaq ta artyq emes. Biraq aǵamyzǵa Alataýdyń kók maısasy sekildi jasyl shapan kıgizemin», dep Syraǵań aqynnyń ıyǵyna shapan japty. Odan keıin Ǵafań tebirenip óleń oqydy. Nurhan aǵa sahna tórine jaıǵasqan. Qatty syrqattanyp qalǵan. Til joq. Sóılegenderdiń sózderin únsiz tyńdap otyr. Keıde jylaıdy. Keıde kúledi. Meniń eki kózim – Nurhanda. Ár qımylyn qalt jibermeımin.
– Toıda sizder de óleń oqydyńyzdar ma?
– Sony aıtaıyn. Saltanatty jıynnyń sońy konsertke ulasty. Keńshilik ekeýmizdiń de Nurhanǵa arnaǵan óleńimiz bar. Sony el aldynda oqyǵymyz keledi. Osy oıymyzdy aqyn Nazarbek Bektemisovke baryp aıttyq. Nazaǵań meni burynnan biledi. Aýdandyq gazetke onyń alǵy sózimen «On bes jasar aqyn» degen toptamam jarııalanǵan bolatyn. Sony meńzedi me, Nazarbek aǵa maǵan qarap: «Serik, men seni gazetke shyǵardym ǵoı. Osy joly Keńshilik oqysyn» dedi. Sahnaǵa shyǵyp, ol óleńin oqydy. Jurtshylyq dán rıza boldy. Keńkeń endi maǵan «óleń oqytamyn» dep árekettendi. Bir-eki kisige aıtyp edi. Olar «sóıleýshi kóp» dep yńǵaı tanytpady. Biraq Keńkeń aýylǵa kelgende «Nurhannyń toıynda Serik ekeýmiz de óleń oqydyq», dep aıtty. Keńshilik sondaı nıeti taza, adal dos edi.
– Belgili qalamger Sapabek Ásipke arnaǵan óleńińizde «Aýdandyq gazetke ákep kirgizip eń, Torǵaıda, bilegimnen ustap alyp», dep jazypsyz. Shynymen, solaı boldy ma?
– Iá. Ákem soǵystan jaraly bolyp oraldy da, erte qaıtys boldy. Onda men 5-6 jastamyn. Jalǵyz sheshem bar. On jyldyqty Táýish aýylyndaǵy orta mektepten támamdadym. Mektep bitirgennen keıin Torǵaıǵa keldim. Aýdan ortalyǵyndaǵy dostarymdy qımaı eki-úsh kún júrip qaldym. Birde kóshede kele jatyr edim, aldymnan Sapabek aǵa shyǵa keldi. Sol jyldary ol kisi Jangeldın aýdandyq «Jańa ómir» gazetiniń redaktory. Oqýshy kezimnen aýdandyq basylymda óleńderim men shaǵyn maqalalarym jıi jarııalanatyn. Sodan meni jaqsy biledi. Sapekeń bilegimnen shap berip ustady da: «Áı, Serik, sen bıyl joǵary oqý ornyna barasyń ba?», dep surady. Shynymdy aıtsam, oqýǵa barǵym keledi. Alaıda úıdiń jaǵdaıy joq. Bir jaǵynan, jalǵyz sheshemdi qımaımyn. Sondyqtan «bir-eki jyl jumys istep barsam» dep oılaıtynmyn. Sapekeń qolymnan ustaǵan kúıi jetektep, redaksııaǵa alyp keldi. Aýdandyq gazetke birden jumysqa qabyldady. Osy redaksııada 3-4 jyl eńbek ettim. Qalamger aǵalarymnyń tálim-tárbıesin aldym. Jýrnalıstıkanyń qyr-syryn úırendim. О́leńderim, ocherkterim oblystyq, respýblıkalyq basylymdarda jarııalana bastady.
60-jyldardyń ortasynda burynǵy Selınograd oblysynda Tyń ólkesi jazýshylarynyń sezi ótti. Soǵan Torǵaıdan Seıit Kenjeahmetov, Tańatqan Sátbaev úsheýmiz qatystyq. Jıynǵa Almatydan Ǵabıt Músirepov bastaǵan bir top-aqyn-jazýshy keldi. Arasynda aıtýly ǵalym Zeınolla Qabdolov bar eken. Jıynda jas qalamgerlerdi ár seksııaǵa bólip, shyǵarmalaryn talqylady. Men kórnekti aqyn Ǵalı Ormanovtyń seksııasyna bólindim. Ǵalekeń meniń óleńimdi maqtap, basqalardyń da pikirin surady. Sol kezde Zeınolla Qabdolov ornynan turyp, «Bul jigittiń poezııasy maǵan unady. О́leńderinen epıkalyq saryn baıqalady. Bolashaǵy bar. Men Serikti Almatyǵa alyp ketkim kelip tur. Aldaǵy kúzde ýnıversıtettiń syrtqy bólimine qujat qabyldaý bastalady. Soǵan oqýǵa kel», dedi Zekeń. Buǵan aıryqsha qýandym. Qanattandym. Almatyǵa barý – armanym edi. Kúzde Alataýdyń etegindegi ásem qalaǵa keldim. Zeınolla aǵany taýyp aldym. «Oqýǵa qujattaryńdy ótkiz. Túsesiń. Biraq tynysh júr», dedi ol kisi. Sóıtip, Qazaq memlekettik ýnıversıtetiniń jýrnalıstıka bólimine syrttaı oqýǵa tústim. Keńshilik Almatyǵa menen bir-eki jyl buryn ketken edi. Sóıtsem, ol oqýǵa túspegen eken. Ekeýmiz birge tústik.
– Qurdastaryńyz sizdi: «QazMÝ-de 16 jyl oqydy» dep ázildep aıtady. Osy oqıǵaǵa da toqtala ketesiz be?
– (Kúldi). Onyń túrli sebebi bar. Keıde ár qıly jaǵdaımen qysqy nemese jazǵy sessııaǵa qatyspadym. Osylaı talaı márte oqýdan shyǵyp qaldym. Bir joly Keńshilik ekeýmizdi oqýdan qatar shyǵaryp jiberdi. Kóńil kúıimiz joq. Unjyrǵamyz túsip kele jatqanbyz. Aldymyzdan ǵalym Ábilfaıyz Ydyrysov kezdesti. Bizdi «jerles inilerim» dep, ish tartyp júretin. Oǵan jaǵdaıymyzdy aıttyq. Ábilfaıyz aǵa oılanyp turdy da: «Sender bosqa júrmeńder. Rektor Asqar Zakarınge kirińder. Jaqsy azamat. Torǵaılyq. Oǵan kezdesip jónderińdi aıtsańdar, túsinedi», dep aqyl qosty. Rektordyń qabyldaý bólmesine keldik. Aldy tolǵan adam. Kelesi kúni taǵy bardyq. Taǵy sondaı kórinis. Osylaı birneshe kún kire almaı júrdik. Mundaıda Keńshilik marqum tapqyr edi. Qabyldaý bóliminde otyrmyz. Keńkeń hatshyǵa: «Qaryndas, ol kisige torǵaılyqtar kelip tur dep aıtasyz ba?», dep ótinish bildirdi. Hatshy qyz rektordyń kabınetine kirip ketti. Bir kezde: «Torǵaılyqtar kirińizder» dedi. Bizben birge ýnıversıtettiń eki-úsh qyzmetkeri kirdi. Olar qoldaryndaǵy qaǵazǵa qol qoıdyryp aldy da, shyǵyp ketti. Atshaptyrym bólme. Ekeýmiz buryshtaǵy ústelde úrpıip otyrmyz. Bizdi ol kisi kórmedi. Hatshy qyzǵa qaıta qońyraý shalyp, «Jańaǵy torǵaılyqtar qaıda?» degende ekeýmiz ornymyzdan turdyq. Asqar aǵany buryn kórmegenbiz. At jaqty kisi eken. Túsi jyly. Oǵan Qysqy sessııaǵa qatysa almaı, oqýdan shyǵyp qalǵanymyzdy aıttyq. Rektor bizdi asyqpaı tyńdady da, hatshy qyzǵa aıtyp Qojakeevti shaqyrtty. Ekeýmizdiń tipti záremiz ushty. Temkeń bizdi jaqsy biledi. Aldynda kabınetinen: «Torǵaıyńa baryńdar!», dep qýyp jibergen. Bir kezde Qojakeev keldi. Bizge jaqtyrmaı qarady. Alaıda Asqar aǵa: «Temirbek, Torǵaıdyń joly alys ekenin bilesiń, myna meniń eki inim qysta boran soǵyp, sessııaǵa kele almapty. Endi balalardy bir jolǵa keshirip, oqýǵa qaıta kirgizseńiz qaıtedi», dedi sypaıy sóılep. Qojakeev: «Biz tizimdi bekitip jiberdik qoı», dedi. Sonda da Asekeń: «Tizim sońyna qosyp jiberińiz. Eshteńe etpeıdi», dedi qaıyra til qatyp. Biraq Temkeń raıynan qaıtar emes. «Bulardy men jaqsy bilemin. Ekeýi múlde sabaqqa kelmeıdi. Jazýshylar odaǵynan shyqpaıdy. Únemi sonda júredi», dedi qabaǵy qatýlanyp. Asqar aǵa sabyrly kisi eken. Artyq sóılemedi. «Bir jolǵa keshir. Balalarmen sóılesip kórshi», dep Qojakeevke qarady. Úsheýmiz rektordyń kabınetinen birge shyqtyq. Temkeń aldymyzǵa túsip ketip qaldy. Ekeýmizde Qojakeevtiń qabınetine qaıta kirýge batylymyz joq. Bir kezde Keńkeń: «Kirmeı-aq qoıaıyq. Kerek bolsa, ózi shaqyryp alady», dedi. Aqyry kirmedik. Biraq sol joly oqýǵa qaıta qabyldandyq.
– Kóptegen jaqsy-jaısańymen aralastyńyz. Olarǵa jaqyn ini boldyńyz. Ásirese Syrbaı Máýlenov pen Ǵafý Qaıyrbekovtiń orny bólek. Solar týraly da aıtsańyz?
– Jas kúnimnen Syraǵańa qatty eliktedim. О́leńdi sol sekildi móldiretip jazsam dep armandaıtynmyn. Onyń kúrkirep jyr oqyǵan daýysyn da unatýshy edim. Bir joly tanymal qalamger Sabyrjan Shúkiruly aýylǵa Almatydan Syrbaıdyń óleń oqyǵan daýysy jazylǵan plastınka alyp keldi. Sony qaıta-qaıta tyńdap, Syraǵańnyń daýysyn boıyma sińirip aldym. Onda «Jańa ómir» gazetiniń jas tilshisimin. Sonymen birge aýdandyq radıo torabynda qosymsha qyzmet isteımin. Sol jyly Máskeýde kommýnıstik partııanyń kezekti sezi ótip jatqan. Soǵan baılanysty «Sosıalıstik Qazaqstanǵa» Syraǵańnyń óleńi shyǵypty. Kún saıyn radıodan jańalyq oqımyn. Sony oqyp bolǵannan keıin «búgin stýdııaǵa qazaqtyń belgili aqyny Syrbaı Máýlenovti shaqyryp otyrmyz», dep Syraǵańnyń daýysyna salyp, aqynnyń gazetke shyqqan óleńin oqydym. Syrtqa shyqsam, esik aldynda aqynnyń Torǵaıda turatyn Ǵalym Somtemirov, Myrzalym О́telbaev deıtin aǵaıyndary jınalyp tur. Bárimen amandasyp jatyrmyn. Olar maǵan qaraıtyn emes. Birden «Syrbaı qaıda?» dep surady. Ol kisi «Almatyda ǵoı», desem «Jańa aýdan radıosynan óleń oqyǵan joq pa?», deıdi.
Sondaı qyzyq oqıǵa bolǵan. Almatyǵa kelgennen keıin Syraǵańmen jaqyn aralastym. Aǵalyq yqylasyna bólendim. Batasyn aldym. Aqyndyǵyn erekshe baǵalaımyn. О́mirden ótkenshe qolynan qalamyn túsirmedi. Syraǵańdy áli saǵynamyn.
– Ǵafekeńdi alǵash qashan kórdińiz?
– Ǵafekeńdi buryn bir-eki ret syrtynan kórgenim bar edi. Biraq jaqyn tanys bolǵan emespin. Bir jyly elden Almatyǵa Ǵafekeńniń týǵan qaryndasymen birge ushyp keldim. Ol kisi aýdandyq gazettiń baspahanasynda isteıtin. Sessııaǵa kelgen edim. Bizdi aeroporttan aqynnyń týysy Tursynbek Tokın kútip aldy. Ǵafekeńniń úıine tústik. Tursynbek ol kisige meni «jas aqyn» dep tanystyrdy. Alǵashynda onsha mán bermedi. Keıin ish tartyp sóılesip, jaqyn tartty. Ǵafekeńe: Almatydan jumys tabylsa, osynda qalatyn oıym bar ekenin aıttym. Ǵafý aǵa birden sol kezdegi «Qazaq radıosynyń» dırektory Ertaı Arysovqa habarlasyp, meni sonda qyzmetke ornalastyrdy.
Shyndyǵynda, Ǵafekeńmen ómirdegi, óleńdegi inisi retinde óte jaqyn aralasyp, kóp syrlastym. Sekseninshi jyldar ishinde «Juldyz» jýrnalynda birge qyzmet istedim. Sonda aqynnyń biraz áńgimesin tyńdadym. Birde Ǵafekeń óz atalarynyń erlik isteri týraly áńgimelep otyrdy. Qasymyzda Shómishbaı Sarıev bar edi. Ǵafekeń áńgimesiniń uzyn-yrǵasynda atalarynyń kóbisi atys-shabys, qan maıdanda qaza bolǵanyn aıtyp, sońǵy sózin «on jeti» partızanǵa tirep: «Osylaı meniń ata-babalarym ádildik jolynda qurban bolǵan» dep bir-aq toqtady. Sol sátte men: «Apyraı, Ǵafeke, sózińizge qaraǵanda mergenderdiń kóbisi kisi qolynan qaza tapqan
eken-aý», deppin. Sol kezde Ǵafekeń selk ete qalyp: «Áı, Shómishbaı, Seriktiń myna sózi adamnyń záresin alady eken. Men bar ǵoı, Shómishbaı, osy Serikke nege ekenin bilmeımin, urysa almaımyn. Uryssam boldy, raqattanyp bir kúledi de otyra beredi. Sosyn qalaı ursasyń», degeni bar edi.
Qaınekeı Jarmaǵambetovtiń de biraz jaqsylyǵyn kórdim. Ardaqty aǵa ómiriniń sońǵy jylynda Almatyda jalǵyz ózi turdy. Úıine kelmeıtin adam joq. Aqyn Hamıt Erǵalıev sol úıden shyqpaıtyn. Jazýshy Ǵabdol Slanovty da sol shańyraqtan jıi kórýshi edim. Tólegen Aıbergenov Qaraqalpaqstannan kelip, aqynnyń páterinde biraz ýaqyt turǵanyn bilemin. Elden kelgende men de biraz sol úıde turdym. Qaınekeı aǵa óte bilimdi edi. Kitaphanasy baı bolatyn. Ol kisi Muhtar Áýezov, Álkeı Marǵulan sekildi tulǵalarmen jaqyn syılasty. Ádebıette de ónimdi eńbek etti. Poezııadaǵy ballada janryn qalyptastyrdy.
– Endi shyǵarmashylyqqa oıyssaq. Aqyndyq – tylsym álem. Bul óner adamǵa týmysynan qona ma?
– Menińshe, aqyndyq – tabıǵattyń syıy. Eshkim oqyp aqyn bolmaıdy. Árıne, bilim qajet. Onsyz bıikke kóterile almaısyń. Biz balǵyn shaǵymyzdan qazaq folkloryn boıymyzǵa sińirdik. Burynǵy halyq aqyndary da solaı qalyptasty. Solardyń yqpaly bizge kóbirek tıdi. Kez kelgen qazaqtyń negizinde aqyndyq bar. Mysaly, meniń uly sheshem keremet aqyn bolǵan. О́leńdetip sóılegende eshkimge des bermegen. Ákem de ónerde qara jaıaý bolmaǵan. Ájemniń kózin kórgen úlkender: «Sen uly shesheńe tartyp, aqyn bolǵansyń», dep aıtatyn. Soǵan qaraǵanda aqyndyq adamǵa teginen darıtyn sekildi.
– 70-jyldary ádebıetke kelgen sizdiń býyn poezııaǵa qandaı jańalyq ákeldi dep oılaısyz?
– Biz soǵys aıaqtalǵan soń, bir jyldan keıin týǵan urpaqpyz. Qandy qyrǵyndy kózimiz kórmese de, onyń qandaı zardap ákelgenin jaqsy bilemiz. Soǵys jyldary halyq ábden qınaldy. Aýyr turmys keshti. Sol ýaqyttaǵy keıbir atqa minerlerdiń keleńsiz qylyǵy men olardyń halyqqa kórsetken zábiri – bizge de áser etti. Odan keıin 50-jyldardyń ortasynda tyń jáne tyńaıǵan jerlerdi ıgerý naýqany bastaldy. Elimizge syrttan qanshama ózge ult ókili aǵylyp keldi. Sonyń saldarynan qazaq óz jerinde sany az ultqa aınaldy. Soltústik óńirde kóptegen qazaq aýyly men mektebi jabyldy. Biz osy jaǵdaıdy kórip, júregimiz aýyrdy. Qolymyzdan keletini jazý edi. Sondyqtan halqymyz tartyp otyrǵan taýqymetti shyǵarmamyzda astarlap aıttyq. Emeýrinmen jetkizdik. Árıne, zaman aǵymynan asa almadyq. Ýaqytqa ıkemdeldik.
Soǵystan keıin qazaq poezııasy órteńge shyqqan gúldeı qaıta búr jardy. Adamnyń jan dúnıesin terbeıtin lırıkalyq óleńder týdy. Ony Qasym Amanjolov, Syrbaı Máýlenov sekildi aqyndar bastady. Bul dástúrdi keıin Muqaǵalı, Jumeken, Tólegen, Saǵı, Qadyr, Tumanbaı ádemi jalǵady. Osy aqyndardyń ishinde óz basym Tumaǵańdy erekshe kóremin. Qazir Tumanbaı Moldaǵalıev týraly kóp aıtylmaıdy. Bizdiń býynǵa Tumanbaıdyń syrshyl lırıkasynyń yqpaly kóbirek tıdi. Poezııa sezimnen turady. Aqynǵa aqyldan góri, sezim kerek. Tumaǵań sezimniń aqyny edi.
Bir joly talantty synshy Amangeldi Keńshilikuly teledıdardan qazaq poezııasy týraly sóıledi. Sonda ol qazaq poezııasy ótken ǵasyrdyń 60-70 jyldary sharyqtaý kezeńine jetti dep baǵa berdi. Men osy pikirdi quptaımyn.
–Egemendik alǵannan keıin shyǵarmashylyǵyńyz jańasha óris aldy. Epıkalyq dastandar jazdyńyz. Dramalyq týyndylaryńyz qoıyldy...
– Shynymdy aıtsam, táýelsizdik meniń tynysymdy ashty. Shabytymdy oıatty. Ulttyń azattyǵy jolynda qurban bolǵan tulǵalar týraly jazý – burynnan oıymda bar edi. Ásirese jas kezimde Keıki týraly jazǵym keletin. Bala kúnimde 1916 jylǵy Torǵaıdaǵy Ult-azattyq kóteriliske qatysqan qarııalardyń shet-jaǵasyn kórdim. Solar «naǵyz batyr Keıki» dep otyratyn. Jazýshy Aqan Nurmanov romanynda onyń esimin ashyq aıta almaı «Qulan» dep alǵany da beker emes. Bul dastanda Keıkiniń batyrlyǵyn, batyldyǵyn, mergendigin barynsha shynaıy kórkemdedim. Osy shyǵarmany Ábish Kekilbaıuly men Aqseleý Seıdimbek joǵary baǵalap, maqala jazdy. Al «Kenesarynyń Aqmolaǵa shabýyly» týraly poemanyń jóni bólek. Munda Han Keneniń Aqmola bekinisine buzyp kirgen sáttegi qaharman beınesin kórkemdedim. Bul tarıhı oqıǵa kóp aıtylmaıdy. Kenesarynyń qasynda qazaqtyń júrek jutqan batyrlary boldy. Solardyń bekinisti alǵandaǵy erligi eleýsiz qalmasyn dep jazdym. Al «Mahambet pen Jáńgir han» atty dastanyma Mahambet syılyǵyn aldym. Bul týyndyny Farıza Ońǵarsynova oqyp, oń pikirin bildirdi. Sondaı-aq «Sáken – Suńqar», «Ahmet-Ińkár», «Ǵarysh-qazaq» jáne «Aqan seri – Balqadısha» atty poemalarymdy da oqyrman jyly qabyldady. Birneshe dramalyq shyǵarmalarym sahnalandy. Ony jazýǵa kórnekti rejısser Ázirbaıjan Mámbetovtiń yqpaly tıdi.
– Jerge túsken jaryqshaq aqyn júregi arqyly ótedi dep aıtady. Qazir sizdi qoǵamdaǵy qandaı másele tolǵandyrady?
–Durys suraq qoıyp otyrsyń. Tolǵandyratyn dúnıe kóp. Biz tarıhta esemiz ketken ultpyz. Otarshyldyq qamytyn uzaq kıdik. Sonyń zardabyn áli tartyp kelemiz. Til – ulttyń jany. Odan aıyrylýǵa bolmaıdy. Qandaı jaǵdaı bolsa da, ult múddesi bárinen bıik turýy qajet. Búginde adamdardyń kókiregi oıaý, sanasy bıik. Ásirese halyq qoǵamdaǵy ádiletsizdikten sharshady. Burynǵy sarynnan arylatyn kez jetti. Qoǵamǵa jańashyldyq kerek. Bastysy, halyqtyń úmiti aqtalsa deımin. Bir jaǵynan, qazir álem qubylyp tur. Aınalanyń bári ala-quıyn. Bul – jaqsy emes. Ýaqyt ózgerip, álem tynyshtalsa eken. Elimiz aman, beıbit zaman bolsyn demekpin!
– Áńgimeńizge rahmet.
Áńgimelesken –
Azamat ESENJOL,
«Egemen Qazaqstan»
