«80 jyldyq tarıhy bar Tasashy orta mektebi janynda ınternat pen shaǵyn ortalyq jumys isteıdi. Bala sanynyń azaıyp ketýine baılanysty shaǵyn jınaqty mektepke jatady. Aýdandaǵy jalǵyz mektep-ınternat. Munda osy óńirdegi az qamtylǵan otbasynyń, jaldanyp jumys isteıtin malshylardyń balalary jáne jetim, jartylaı jetim balalar jatyp oqıdy», deıdi mektep dırektory Nurgúl Abyqanova.
Aýdandaǵy shalǵaı aýylda ornalasqan jalpy aýmaǵy 3300 sharshy metrlik bul mektepke 2024 jyly
1 mlrd 200 mln teńge bólinip, kúrdeli jóndeýden ótken. Qurylys jumystary ýaqtyly aıaqtalyp, ótken jylǵy oqý jylyn balalar jumyrtqadaı jarqyraǵan sý jańa mektepte aıaqtaǵan bolatyn. Aýyl mektebiniń zamanaýı qalypqa kelýi oqýshylardyń yntasyn arttyryp, muǵalimder men ata-analarǵa da tyń serpin berip, senim uıalatqan. Talaby taýdaı oqýshylar qosymsha bilim berý úıirmelerine qatysady. Aǵylshyn tilin úırenedi. UBT-ǵa daıyndyq jumystary júrgiziledi. Dombyra, músindeý ónerin meńgerip, júldeli baıqaýlarǵa barǵandary az emes. Budan bólek, 50 oqýshy turaqty túrde kúreske qatysyp, sporttyq jarystardyń jeńimpazdary atanǵan. Aralarynda respýblıkalyq, tipti halyqaralyq jarysqa qatysqan talantty oqýshylar baryn maqtan etedi. Balalardy ónerge baýlýda Zamanbek Nurqadilov atyndaǵy aýdandyq «О́ner» mektebiniń ustazdary kelip, shyǵarmashylyq saǵattaryn ótkizip turady. Sóıtip, shalǵaı aýyl mektebiniń talantty shákirtteriniń shyraǵyn jaǵyp, Táńirtaýdaı bıikke samǵaýyna septigin tıgizip keledi. Oǵan qosa taý bókterindegi aýyl balalarynyń shańǵy tebýdegi sheberlikterin shyńdaý úshin Jalaǵash aýylyndaǵy sport mektebiniń tájirıbeli jattyqtyrýshylary atsalysyp, qysqy sportty meńgerýge baýlyp keledi. Mektepte 62 bala mindetti bilim berý qorynan ystyq tamaqpen qamtylǵan.
«Bes balam bar. Úsheýi mektep jasynda, aldy 6-synypta oqıdy. Biz kishi Tasashyda turatyndyqtan balalarymyzǵa arnaıy avtobýs bólinip, tasymalmen oqıdy. Mektep jasalǵaly beri eńsemiz kóterilip qaldy. Uldarym mektepten tegin ystyq tamaq ishedi, sporttyq úıirmelerge qatysady. Sabaq úlgerimderi jaqsy, kúresten jeńimpaz bolyp, gramota aldy. Balalarymyzdyń jan-jaqty damýyna, báıgelerden oza shabýyna atsalysyp júrgen ustazdarymyzǵa dán rızamyz», deıdi aýyl turǵyny, kópbalaly ana Juldyz Shalaǵyzova.
Úsh qabatty mektep janyndaǵy ınternat ǵımaratyna da ótken jyly aǵymdaǵy jóndeý jumystary jasalyp, jaılylyq ornaǵan. Mektep basshysy ınternatta sý, jaryq, jylý, balalardyń jatyn orny, sanıtarlyq jaǵdaıy basty nazarda ekenin alǵa tartty.
«120 oryndyq ınternatta osy kúni 65 bala bar. 5 tárbıeshi, bilikti aspaz, meıirbıke jumys isteıdi. Olar balalardyń bilim alýy men tártibine jaýapty. Apta saıyn balalar monshaǵa túsip turady. Tórt mezgil tamaq beriledi. Bastaýysh synyp oqýshylarynyń mektepte ishetin tamaǵyn esepke alǵanda bes ýaqyt tamaqpen qamtylǵan. Balalardyń kúndik tamaǵynyń quny as mázirine baılanysty 1800-2000 teńgeni quraıdy. Internat balalary bos ýaqyttarynda ózderi qalaǵan kórkemóner úıirmelerine qatysyp, shyǵarmashylyqpen aınalysady. Kitap oqyp, oı-órisin damytyp, ulttyq tárbıe qundylyqtaryn sińirýge qatysty mádenı is-sharalar únemi ótkizilip otyrady. Bul baǵytta oqýshylarymyzdyń belsendiligi óte joǵary. Internet te iske qosylǵan», deıdi mektep basshysy Nurgúl Qyryqbaıqyzy.
Internattaǵy balalardyń densaýlyǵy tájirıbeli meıirbıke Bulbul Ermekbaıqyzynyń qadaǵalaýynda. Mamannyń sózinshe, alǵashqy medısınalyq kómek kórsetýge qajet barlyq múmkindik jasalǵan. Internat ashanasynda 4 adam eńbek etedi. Bes jyldan beri jumys istep kele jatqan bas aspaz Qarlyǵash Rysqulova búgingi kúni as máziri úı jaǵdaıyndaǵy tamaq túrlerine kóshkenin tilge tıek etti.
«Aptasyna bir mezgil balyq beriledi. Kúndelikti aıran, jemis-jıdek, mánti, laǵman, tushpara syndy balalardyń tábeti tartatyn ystyq tamaq túrleri daıyndalady, oǵan qosa nan ónimderin ózimiz pisirip beremiz. Beriletin taǵamdarymyz tabıǵı tazalyǵymen erekshelenedi», deıdi bas aspaz.
Almaty oblysy,
Kegen aýdany
