Sýret: aqtobegazeti.kz
Senat depýtaty Baýyrjan Qanıev Aqtóbe oblysynyń Temir, Muǵaljar aýdandarynda bolyp, jergilikti turǵyndardyń suraqtaryna jaýap berdi, sondaı-aq óńirlik damýdyń ózekti máselelerin sóz etken turǵyndardyń usynystaryn tyńdady.
«Búgingi tańda árbir azamattyń pikirin estý óte mańyzdy, óıtkeni qoǵammen ashyq dıalog tıimdi memlekettik saıasatty qalyptastyrýǵa, memleket pen qoǵam arasyndaǵy senimdi nyǵaıtýǵa múmkindik beredi», dedi senator.
Depýtat Ernur Áıtkenov te Pavlodar oblysy Aqtoǵaı aýdanynyń Áýelbek, Harkov aýyldarynyń halqymen kezdesti.
«Jańa Konstıtýsııanyń jobasy Negizgi zańnyń normalaryn túzetý ǵana emes, budan memleket pen qoǵamnyń ózara is-qımylynyń jańartylǵan úlgisi qalyptastasady. Biz adam quqyqtary, áleýmettik ádilettilik, eldiń ornyqty damýy basymdyq bolyp qalatyn neǵurlym ashyq, jaýapty ári azamattardyń múddelerine baǵdarlanǵan basqarý júıesin qurýǵa umtylyp otyrmyz», dedi E.Áıtkenov.
Sondaı-aq Aınur Arǵynbekova men Qaırat Tastekeev Abaı oblysynyń Kýrchatov qalasynda bolyp, Ulttyq ıadrolyq ortalyq qyzmetkerlerimen, qalanyń medısınalyq qoǵamdastyq ókilderimen júzdesti. Olar áleýmettik kepildikter, memlekettik organdardyń jaýapkershiligin arttyrý, ádilettilik qaǵıdattaryn nyǵaıtý men zań ústemdigin qamtamasyz etý máselelerin sóz etti.
Senat depýtattary Amangeldi Esbaı men Ǵalıasqar Sarybaev Jetisý oblysyndaǵy Alakól aýdanynda «Kóktýma» mektebi, «Alakól sý» ShJQ MKK, sondaı-aq «QazTransOıl» AQ Úsharal fılıalynyń ujymdarymen kezdesti. Onda konstıtýsııalyq ózgeristerdiń negizgi erejeleri, zańnama ınnovasııalary men qoǵammen keri baılanysty nyǵaıtý máseleleri talqylandy.
Sonymen qatar Úsharal qalasynda «Esikten esikke» is-sharasy uıymdastyrylyp, turǵyndarmen ataýly kezdesýler ótkizildi. Onda depýtattar azamattarǵa jańa Konstıtýsııa jobasy men júrgizilip jatqan reformalardyń mánin túsindirip, suraqtarǵa jaýap berdi.
Túrkistan oblysynda Ata Zańnyń jańa jobasyn talqylaýǵa arnalǵan aqparattyq-túsindirý jumystary jalǵasyp jatyr. Senat depýtattary Álı Bektaev, Murat Qadyrbek pen Álisher Satvaldıev Túlkibas aýdanynyń turǵyndarymen kezdesti. Olar «Túlkibas ınnovasııalyq kesheni» JShS óndiristik alańynyń jumysshylarymen dıalog barysynda azamattardyń quqyqtary men bostandyqtarynyń kepildikteri, eńbek adamynyń mártebesin kóterý, ony áleýmettik qorǵaý sharalaryna toqtaldy. Atap aıtqanda, eńbek etý quqyǵyn, mamandyqty erkin tańdaý, qaýipsiz eńbek jaǵdaıyn, sondaı-aq jumys ýaqyty men demalys máselelerin bekitetin konstıtýsııalyq normalardy saraptap berdi.
