Aıtýly konsert – «Daryn» memlekettik jastar syılyǵynyń laýreaty, talantty dırıjer ári kúıshi, orkestrdiń bas dırıjeri Abylaı Tilepbergenniń shyǵarmashylyq jolyndaǵy mańyzdy beles boldy. «Serpin» ataýynyń ózi konsert mazmunyn aıqyndap, ulttyq mýzykaǵa jańa tynys, jańa serpin berý ıdeıasyn ańǵartty.
Kesh baǵdarlamasynda qazaq kúı óneriniń qos alyby – Qurmanǵazynyń tókpe kúıleri men Táttimbettiń shertpe dástúri jańasha ınterpretasııada usynyldy. Dástúr men zamanaýı kózqarasty sheber ushtastyrǵan dırıjerlik sheshimder, orkestrlik boıaýdyń baı palıtrasy, dınamıkalyq órnekter men názik lırıkalyq ıirimder kórermendi tereń áserge bóledi. Ásirese Abylaı Tilepbergenniń jeke oryndaýyndaǵy kúıler zal ishin erekshe tebireniske bólep, dombyra úniniń shynaıy qýatyn aıqyn sezindirdi.
Konserttiń sharyqtaý shegi – Qazaqstannyń halyq ártisi, álemge tanymal ánshi Dımash Qudaıbergenniń sahnaǵa shyǵýy boldy. Olar bir sahnada óner kórsetip, jan tebirenter kúılerdi birge oryndady. Keshke sondaı-aq Qazaqstannyń eńbek sińirgen qaıratkeri, kompozıtor Renat Ǵaısın, Abaı atyndaǵy Qazaq ulttyq opera jáne balet teatrynyń solısteri, Memlekettik «Saltanat» bı ansambliniń ártisteri men dombyrashylar toby qatysyp, ulttyq óner dýmanynyń mazmunyn baıyta tústi. Árbir ónerpazdyń sahnadaǵy sheberligi men shyǵarmashylyq izdenisi keshtiń kórkemdik deńgeıin arttyrdy.
«Serpin» – tek jeke konsert qana emes, qazaq mýzyka óneriniń ótkeni men búgini arasyndaǵy altyn kópir ispetti rýhanı kesh boldy. Sondaı-aq ulttyq murany jańǵyrtý men ony zamanaýı formatta damytý jolyndaǵy tyń izdenisterdiń jarqyn kórinisine aınaldy.
