Sonyń biri – belgili kásipker, oblys máslıhatynyń depýtaty, «Amanat» partııasynyń múshesi, ózi eńsesin kótergen kópetnosty aýyldyń jalǵyz mektebin memlekettik tilde bilim beretin bilim ordasyna aınaldyryp, qazaqtyń salt-dástúrin dáriptep júrgen elshil azamat Valerıı Rozýmovıch.
– Búkil ǵumyrym osy elde, osy jerde ótip jatyr. 12 jastan eńbekke aralastym. Eńbegim janyp, kásibimdi dóńgeletip, tabysymnyń bir bóligin el ıgiligine jaratyp jatyrmyn. Adamǵa budan artyq ne kerek? Kózim jetkeni, tarıhtyń qıly kezeńderinde taǵdyr aıdap kelip, osynda birjola turaqtap qalǵan san etnostyń qaı-qaısysyn bolsyn, jatsynbaı baýyryna basqan keńpeıildi qazaq halqyna, qazaq topyraǵyna qaryzdar ekenimizdi áste esten shyǵarmaýymyz kerek. Kartany ashyp qarasańyz, alýan etnostyń basyn qosyp, aırandaı uıyp otyrǵan beıbit eldi esh jerden taba almaısyz, bul tek Qazaqstanda ǵana bar. Bizdiń basty baılyǵymyz da osy yntymaq-birligimizde jatyr. Sondyqtan Alǵys kúniniń mańyzy erekshe. Máselen, qazirgi qoldanystaǵy Konstıtýsııada ózimizdi ortaq tarıhı taǵdyr biriktirgen halyq retinde tanyp kelsek, osy tatý turmys-tirshiligimizdiń arqasynda búginge deıin birtutas halyq bolyp qalyptastyq, ony jańa Konstıtýsııa jobasynda bekitip otyrmyz. Bul qazynamyzdy kózdiń qarashyǵyndaı saqtaýymyz kerek, – dedi kásipker.
Valerıı Rozýmovıch – qazaq halqyna degen rızashylyǵyn sózben emes, naqty isimen kórsetip, onyń durystyǵyn dáleldep kele jatqan azamat. Kásipker bas-aıaǵy bes-alty jyldyń ishinde halqynyń deni qalaǵa kóship, úıleri qańyrap qalǵan Jýkov aýylyna el qondyryp, qaıta túletti. Búginde bul aýyldyń berekeli tirshiligine adam qyzyǵady. Isker azamat eski úıdiń bárin súrip tastap, ornyna jańa úı salyp qoıǵan. Aýyl turǵyndary kásipker basqaratyn sharýashylyqta, bordaqylaý alańynda, qus fermasynda jumys isteıdi. Eń bastysy –
halyqtyń turaqty jumysy, laıyqty jalaqysy bar. Úıine gaz-sýy kirip tur. Aýyldyń ishi-syrty – tap-tuınaqtaı. Medpýnkt, mektep, aýyl klýby, ámbebap dúkeni jumys istep tur. О́tken jyly ǵana jańa balabaqsha iske qosyldy.
Eń bastysy, mundaǵy jalǵyz mektep memlekettik tilde bilim berýge kóshken. Osy aýylda turatyn on shaqty etnostyń balasy bir partada otyr. Qazir aýyl mektebiniń birinshi, ekinshi, úshinshi, tórtinshi, besinshi synyptary tek qazaq tilinde bilim alyp jatyr. Endi 5-6 jyldan keıin mektep tolyqtaı memlekettik tilde bilim beredi.
– Til – yntymaqqa, birlikke jol ashatyn basty qural. Jýkov aýylynda jaz boıy etnoaýyl jumys isteıdi. Qaptatyp kıiz úı tigip tastaımyz. Balalar sol jerde qazaqtyń salt-dástúrin úırenedi. Amandyq bolsa, aldaǵy ýaqytta aýylda jazǵy demalys ornyn ashyp, jaz boıy balalarǵa qazaq tilin úıretýdi josparlap otyrmyz, – dedi kásipker.
Qostanaı oblysy
