Erbol Nurǵalıulynyń dáriger atanýyna o basta asyl ájesi áser etipti. Ájesi Ryskúl poıyzben kele jatyp, Qaraǵandy medısına ýnıversıtetinde dáriger mamandyǵyn oqyp jatqan stýdentpen saparlas bolady. Jas jigittiń úlkenge degen qurmeti men tálim-tárbıesine ishteı rıza bolyp, ómirge kelgen nemeresiniń qurmetine Erbol dep atyn qoıyp, dáriger bolyp, eldiń alǵysynda júretin er-azamat bolsyn dep yrymdapty. Sol ázız ananyń aq batasy men nıeti qabyl bolyp, nemeresi de Qaraǵandydaǵy medısına ýnıversıtetinen oqyp, shyńdalady.
Jas kezinde Erbol áskerı salaǵa áýes bolypty. Ákesi Nurǵalı men anasy Altyngúl medısına salasyn tańdaýǵa baǵytyn beripti. Ákesi únemi Qaraǵandy qalasynda tabysty eńbek etip júrgen aýylynyń maqtanyshy Jánibek esimdi dárigerdi úlgi qylypty. «Jánibekteı bolsań, bizdiń armanymyz – sol», degen áke amanatyn oryndaıdy. Bir qyzyǵy, sol úlgi tutqan dárigeriniń H.Maqajanov atyndaǵy aýrýhananyń shuǵyl jaraqat bólimshesinde travmatolog bolyp eńbek etkenin keıin bilip, taǵdyr sáıkestigine tańyrqapty.
Ońtústik óńirden Arqaǵa amanat arqalap kelgen ol 2010 jyly Qaraǵandy memlekettik medısına ýnıversıtetine «Jalpy medısına» mamandyǵy boıynsha oqýǵa túsip, odan soń «Jalpy hırýrgııa» mamandyǵy boıynsha ınternatýraǵa qabyldanady. Kásibı bilimin tereńdetip, travmatologııa jáne ortopedııa (eresekter jáne balalar) mamandyǵy boıynsha rezıdentýraǵa túsip, ony da sátti támamdaıdy.
Jalyndap turǵan jas jigittiń eńbek joly stýdent kezinde bastalady. H.Maqajanov atyndaǵy travmatologııa jáne ortopedııa ortalyǵynyń shuǵyl jaraqat bólimshesinde tájirıbe jınaqtaýǵa barǵan ol aldymen sanıtar, keıin meıirger retinde eki jyl jumys isteıdi.
Rezıdentýrada oqyp júrgen kezinde, Temirtaý qalasyndaǵy Ortalyq aýrýhananyń travmpýnktinde travmatolog dáriger bolyp eńbek etedi. 2020 jyldan bastap H.Maqajanov atyndaǵy kópbeıindi aýrýhanada qyzmet atqaryp keledi. Osy jyldar ishinde jedel travmatologııalyq pýnktte, jedel qabyldaý bóliminde, eresekter ortopedııasynda, býyndar artroskopııasy, balalar jaraqaty, kombýstıologııa jáne irińdi travmatologııa bólimshelerinde jumys istep, biliktiligin arttyrady. Keıingi úsh jylda shuǵyl jaraqat bólimshesinde eńbek etip júr.
Tájirıbeli travmatolog óz salasyndaǵy kez kelgen operasııa túrin jasaıdy. Onyń ishinde býyndardy endoprotezdeý, jaraqat kezindegi súıek synyqtaryn zamanaýı tehnologııalarmen bekitý, tize jáne ıyq býyndarynyń artroskopııasy, qol, aıaq jáne jambas súıekterine rekonstrýktıvtik operasııalar jasaıdy.
Kásibı damý jolynda sheteldik tájirıbeni meńgerýge de erekshe mán beredi. 2020 jyly Túrkııa Respýblıkasynyń Býrsa qalasynda «Iri býyndar artroskopııasy» boıynsha, 2023 jyly Reseı Federasııasynyń Tatarstan Respýblıkasy, Qazan qalasynda tize jáne ıyq býyndarynyń artroskopııasy boıynsha biliktiligin arttyrady.
Rasynda, bilikti maman, tájirıbeli travmatolog, ardaqty azamatqa rahmet alý – úırenshikti úrdis. Máselen, 86 jastaǵy Damıla Muhajanova esimdi áje operasııasy sátti ótken soń, qolyn jaıyp, aq batasyn jaýdyrypty. Aqpanda jaýǵan aq jaýyn muz bolyp qatyp, sonyń saldarynan jaraqat alǵandar kóp boldy. Damıla ájeı de aýlasynda taıyp qulap, sol jaq san súıegin aýyr jaraqattap alady.
– Sol kúni maǵan jabyq repozısııa jáne sol jaq san súıegine gamma-sterjenmen bloktalǵan ıntramedýllıarly osteosıntez operasııasy jasaldy. Operasııa joǵary kásibı deńgeıde ótip, qazirgi tańda jaǵdaıym jaqsaryp, birtindep aıaqqa turyp kelemin. Eń aldymen, Erbol esimdi dárigerdiń biliktiligi, adamgershiligi maǵan úlken demeý boldy. Osyndaı kúrdeli sátte kásibı kómek kórsetip, aıaǵymnan tik turýyma sebepker bolǵan travmatolog dárigerge analyq aq batamdy jaýdyrdym. Úlken adamǵa bul – ońaı jaǵdaı emes. Elgezek Erbol balamnyń eńbegi jansyn, – deıdi Damıla ájeı.
О́tken aptada Oralsyn Jalnazaruly esimdi jas jigit te muzdan taıyp qulap, oń tizesin jaraqattap alady. Sodan aýyrsynyp, jaraqat alǵan tusy isinip, aýrýhanaǵa túsedi.
– Tekserý nátıjesinde shuǵyl túrde operasııa qajet ekeni aıtyldy. Dárigerlerdiń kásibı túsindirýi men qoldaýy maǵan senim berdi. Maǵan oń jaq tize býynyna artroskopııalyq operasııa jasalyp, medıaldy menısktiń zaqymdalǵan bóligine parsıaldy rezeksııa júrgizildi, býyn ishine sanasııa jasalyp, blokada joıyldy. Operasııa jeńil ótti. Qazirgi tańda oń jaq tizem ońalyp keledi. Osy oraıda qoly altyn dáriger Erbol myrzaǵa rızashylyǵymdy jetkizgim keledi, – deıdi Oralsyn.
Al bilikti travmatolog úlkenge qurmet, kishige izet kórsetýdi, bata alýdy bala kezden úıretken áke-anasyna rızashylyǵyn jetkizedi.
– Travmatolog dáriger retinde árbir kún men úshin úlken jaýapkershilik pen senim. Jaraqat alǵan naýqastyń aýyrsynýyn jeńildetip, onyń qaıtadan erkin qımyldap, qalypty ómirge oralýyna sebepker bolý – biz úshin mindet ári mártebe, – deıdi travmatolog Erbol Nurǵalıuly.
Osylaısha, asyl jar, ardaqty áke Erbol Nurǵalıuly eldiń alǵys-batasymen baqytqa kenelip keledi.
Qaraǵandy oblysy
