AQTAÝ. 28 sáýir. Mańǵystaý oblysynda denesi tájik jerinde qalǵan halyq aqyny, joryq jyrshysy Qalnııaz batyrdyń súıegi týǵan jerine ákelip jerlendi. Bul týraly egemen.kz tilshisi habarlady.
Qalnııaz Shopyquly 1816 jyly qazirgi Beıneý aýdanyna qarasty Sam qumynda dúnıege kelgen. Jastaıynan «Qyrymnyń qyryq batyryn» jyrlap, jyrshy ári jyraý retinde tanylǵan. Aqyn jáne batyr Qalnııaz Hıýa handaryna qarsy joryqtarǵa qatysyp, sarbazdardy óleń-tolǵaýlarymen erlikke úndedi. 1870 jyly patsha úkimetine narazylyq bildirgen Isa-Dosan kóterilisine qatysady. Kóterilis jeńilis tapqan soń qýdalaýǵa ushyrap, aýyl-eli Aýǵanstan, Tájikstan jerine kóshedi. 1902 jyly Tájikstannyń Gıssar alqabynda ómirden ótip, topyraq jat jerden buıyrǵan edi.
Qalnııaz jyraýdyń birneshe erlik dastandary, aıtystary, tolǵaý-termeleri, jyrlary men kúıleri qazaq eline, Mańǵystaý, Atyraý óńirlerine, sondaı-aq, Orta Azııa elderine keń tanys. Búginde urpaqtary Mańǵystaý, Ońtústik Qazaqstan oblystarynda turady. Osylaısha, bir ǵasyrdan astam ýaqyt jat jerde jatqan baba súıegi týǵan topyraǵyna oralyp, oblys aýmaǵyndaǵy Otpan taýdan jaı tapty. Ata rýhyna meshitte Quran oqyldy.
Mańǵystaý oblystyq Beket ata meshitiniń bas ımamy Smaıyl Seıtbekov bes jaǵdaıda ǵana máıitti qaıta jerleýge ruqsat beriletinin túsindirip berdi. Onyń birinde «Máıit jat jerge jerlense, sondaı-aq, bireýdiń jerine jerlense, jaqyndary keıin qazyp alyp, basqa jerge jerleýge bolady», – delingen eken.
Gúlaıym Shyntemirqyzy.
Derek: egemen.kz.
Sýret: Talant Qusaıyn.
