Jarystyń alǵashqy kúninde-aq 19 jastaǵy Soltústik Qazaqstan oblysynyń týmasy 500 metrlik qashyqtyqty 38.48 sekýndta baǵyndyryp, altynnan alqa taqty. Bul – qazaq sportyndaǵy eleýli oqıǵa. Otandyq konkıshiler sońǵy ret jastar arasyndaǵy álem birinshiliginde osydan 16 jyl buryn, ıaǵnı 2010 jyly top jarǵan edi. Ekaterına Aıdovanyń sol erligin araǵa jyldar salyp Krıstına qaıtalap otyr. Bul básekede kanadalyq Djýlııa Snelgrov (38.78) kúmis, polshalyq Vıktorııa Dabrovska (38.96) qola júldege ıe boldy.
Jeńisti kúnder munymen shektelmedi. 1 500 metrlik saıysta jerlesimiz 1:56.06 ýaqyt kórsetkishimen taǵy da shashasyna shań juqtyrmady (aýstrııalyq Djanın Rosner – 1:56.36, japonııalyq Aıano Sekıgýchı – 1:57.97). 1000 metrde 1:16.34 nátıjesimen bas júldeni úshinshi márte qanjyǵasyna baılady. Bul qashyqtyqta kúmis pen qola medal japonııalyq Aıano Sekıgýchı (1:16.66) men aýstrııalyq Djanın Rosnerge (1:17.00) buıyrdy.
Aıta keterligi, K.Shýmekova Insellde jeke rekordyn da jańartty. 3 000 metrlik dodada kúmis júldeni qanaǵat tutqanymen, jekeleı qashyqtyqtar jıyntyǵy jóninde jerlesimiz teńdessiz dep tanyldy. Bul – el sportynyń tarıhynda buryn-sońdy bolmaǵan tarıhı oqıǵa! Osyndaı aıtýly jeńisten soń Memleket basshysy Qasym-Jomart Toqaev daryndy konkıshimizdi orasan zor tabysymen arnaıy quttyqtap, aldaǵy dodalarda sáttilik tiledi.
Odan keıin quramynda Krıstına Shýmekova, Anastasııa Belovodova, Varvara Glýhova bar elimizdiń qyzdar quramasy komandalyq sprıntte top jardy. Qurama qorjynyna túsken altynshy altynǵa mass-startta jeńiske jetken Vadım Chebardakov ıe boldy.
