Ǵylym jáne joǵary bilim mınıstrligi, Halyqaralyq «Qazaq tili» qoǵamynyń Almaty qalalyq fılıaly qoldaýymen «Fılologııa ǵylymdarynyń zerttelýi: ózekti máseleleri jáne sheshý joldary» taqyrybynda ótken jıyndy Prezıdent janyndaǵy UǴA Dırektorlar keńesiniń táýelsiz dırektory, akademık Kárimbek Qurmanálıev júrgizdi.
Jıynda otandyq tiltanym ǵylymyn júıeleý, ǵylymı izdenisterdiń baǵyt-baǵdaryn aıqyndaý, dıssertasııalyq jumystardyń mazmundyq sapasyn kúsheıtý máseleleri qarastyryldy.
«Ǵylym salasyndaǵy mundaı jumys zor jaýapkershilikti talap etedi. Búginde ortalyq ǵylymı oı-pikir almasatyn, zertteýler saraptalatyn bedeldi alańǵa aınalyp otyr. Bul tek akademııalyq mindet qana emes, sonymen qatar ulttyq bolmysty aıqyndaıtyn strategııalyq baǵyt. Ortalyq qyzmeti saraptamalyq zertteýlermen ǵana shektelmeı, fılologııa ǵylymdarynyń damýyna serpin beretin aýqymdy mindetterdi qamtıdy», dep atap ótti jıyndy ashqan Abaı atyndaǵy QazUPÝ basqarma tóraǵasy-rektor Bolat Tilep.
Saraptamalyq úılestirý ortalyǵy otandyq fılologııa ǵylymdarynyń damýyna júıeli túrde úles qosýdy maqsat etedi. Onda ǵylymı dıssertasııa taqyryptaryn biryńǵaı baza arqyly qadaǵalaý, talqylaýdan ótkizýdiń mańyzy qarastyryldy. Ǵalymdardyń paıymdaýynsha, barlyq ǵylymı jumystardyń bir ortalyqtan úılestirilýi zertteý baǵyttarynyń úılesimdi damýyna, jas ǵalymdardy qoldaý, olardyń ǵylymı dıssertasııalaryn súıemeldeýge múmkindik beredi.
Ǵylym jáne joǵary bilim salasyndaǵy sapany qamtamasyz etý komıtetiniń tóraǵasy Ádilet Toıbaevtyń aıtýynsha, keıbir doktoranttardyń dısertasııa taqyryptyń qaıtalanýy, kóshirilýi sekildi máseleler jetkilikti. Bul qanatqaqty joba. Eger jemisin berse, basqa da salalarǵa da engiziletin bolady. Fılologııa ǵylymdary zertteýlerin saraptamalyq úılestirý ortalyǵy jumysyna mınıstrlik tarapynan qoldaý bolady.
Al Prezıdent janyndaǵy UǴA ókili Jeńisbek Tólen, sondaı-aq joǵary oqý oryndary janyndaǵy dıssertasııalyq keńes tóraǵalary men jetekshi ǵalymdar Faýzııa Orazbaeva, Dıhan Qamzabekuly, Qalbıke Esenova, Anar Fazyljan kótirilgen taqyrypqa baılanysty jan-jaqty pikirlerin bildirip, keleli usynystaryn aıtty.
EAEO keńesi ǵylymı ataqtardy ózara taný týraly kelisimdi maquldady
Saraptamalyq úılestirý ortalyǵynyń bolashaqta jumys tártibin birinshi orynbasar Qalbıke Esenova túsindirip berdi. Jıyn qorytyndysynda zertteýlerdiń sapasyn kúsheıtý, ǵylymı talaptardy jetildirý men ulttyq ǵylymı derekterdiń sıfrlyq ekojúıesin qalyptastyrý týraly qarar qabyldandy.
ALMATY
