Sýret: kaz.inform.kz
Tirshilik nári saı-salany sýǵa toltyryp, Aqtoǵaı aýdany men Ekibastuzdyń aýyldyq aımaqtaryndaǵy (bul aýmaqtar halyq aýzynda «Aqkól-Jaıylma atalady») mal ósirýshi aǵaıynnyń nesibesin eseleı túsedi dep kútilip otyr.
– Sý resýrstary jáne ırrıgasııa mınıstrligi tarapynan Shiderti ózeniniń jaıylmasyna 120 mln tekshe metr sý jiberý josparlandy. Tabıǵatty qorǵaý maqsatyndaǵy is-shara bıyl sáýir–mamyr aılarynda júzege asyrylady. 2025 jyly sý jiberý kólemi de dál osyndaı bolǵan edi, – dep habarlady «Qazsýshar» RMK Pavlodar fılıalynyń dırektory Arman Ospanov.
Onyń sózinshe, kóktemgi sý tasqyny kezinde yqtımal tótenshe jaǵdaılardyń aldyn alý maqsatynda arnaıy jospar bekitilgen. Eki beket uıymdastyrylady (Ekibastuz qalasynyń aýyldyq aımaǵyndaǵy Myńtomar aýyly jáne Aqtoǵaı aýdanyndaǵy Qaraqoǵa aýyly). 1 naýryzdan bastap táýlik boıy kezekshilik kestesi uıymdastyrylyp, tótenshe jaǵdaılar organdarymen jáne jergilikti atqarýshy organdarmen baılanys ornatylady. Janar-jaǵarmaı qory jasaqtalǵan, 11 arnaıy tehnıka daıyn tur. Fılıaldyń barlyq nysandary qanaǵattanarlyq jaǵdaıda dep baǵalanyp otyr jáne sý tasqyny kezeńinde eldi mekenderdi sý basý qaýpin týdyrmaıdy.
– Kanaldan sý bosatý sharalarynyń jalpy uzaqtyǵy eki aıǵa ulasyp, sý Shiderti ózeni arqyly keń dalaǵa jóńkilip, shabyndyq úshin paıdalanylatyn kóltabandardy, Aqkól-Jaıylmadaǵy Áýlıekól kólder júıesin (shamamen 9 kól bar) tolyqtyryp, balyq resýrsyn qalpyna keltirýge oń áserin tıgizedi. Ekinshi turǵydan bul aýmaqtardyń tabıǵı balansyn ustap turýǵa, ekologııalyq ahýaldy jaqsartýǵa negizdelgen, – dep qosty A.Ospanov.
Búginde «Qazsýshar» jergiliktiń fılıalynyń balansynda Shiderti lımandy sýarý júıesi men Maı toptyq sý qubyry, sondaı-aq Jelezın men Maı aýdandaryndaǵy turaqty sýarý boıynsha Prıırtysh, Maıtúbek óndiristik ýchaskeleri bar.
Atap óterligi, keıingi jyldary Ertis óńirindegi sý júıeleri aıtarlyqtaı damı túsken. 2024–2028 jyldarǵa arnalǵan sý salasyn damytý jónindegi keshendi jospar aıasynda óńirdegi lımandy jáne turaqty sýarý júıeleri kezeń-kezeńimen qaıta jańartylyp jatyr. О́ńir ekonomıkasynda aýyl sharýashylyǵy mańyzdy oryn alatyny eskerilip, sýarmaly jer kólemin ulǵaıtý – strategııalyq mindet retinde qoıylyp otyr. Osy baǵytta «Ertis–Ýspenka kanalynyń rekonstrýksııasy» jobasy iske asyrylýda. Sý kózi – Ertis ózeni. Jobanyń nátıjesinde sýarmaly alqaptar kólemi qosymsha 10 myń gektarǵa deıin ulǵaıady. Bul astyq, mal azyǵy jáne kókónis óndirisin arttyrýǵa múmkindik beredi. Sarapshylardyń pikirinshe, sýarmaly jerdiń ár gektary ónimdilikti birneshe ese ósiredi.
Keshendi jospar aıasynda Maı aýdanynyń gıdromelıoratıvtik júıesin rekonstrýksııalaý qarastyrylǵan. Bul júıege qarasty lımandardyń jalpy aýmaǵy – 14 597 gektar. Búginde úsh kezeń boıynsha jobalyq-smetalyq qujattama memlekettik saraptamadan ótken. Tórtinshi kezeń ázirlenip jatyr. 2026 jyly birinshi kezeńge qarjy bólinip, naqty jumystar bastalýǵa tıis. Sondaı-aq atalǵan aýdanda Qolybaı ózeni tazartylyp, 1, 2 jáne 3-seksııa lımandarynyń gıdrotehnıkalyq qurylystary jańartylady. Bul is-sharalar kóktemgi sýdy tıimdi ustap, jazǵy maýsymda jaıylym men shabyndyqty ylǵalmen qamtamasyz etýge múmkindik beredi. Al Ekibastuz qalasynyń aýyldyq aımaǵy men Aqtoǵaı aýdanyndaǵy lımandy sýarý júıesin rekonstrýksııalaý da josparǵa engizilgen. Bul júıege qarasty lımandardyń jalpy aýmaǵy – 21 036 gektar. Bul jobalar mal sharýashylyǵyn jem-shóppen turaqty qamtamasyz etýge baǵyttalǵan.
Jalpy alǵanda, Pavlodar oblysynda sý sharýashylyǵy ınfraqurylymyn jańartý birneshe baǵytta qatar júrgizilip jatyr: magıstraldy kanaldardy rekonstrýksııalaý, lımandardy qalpyna keltirý, jańa sýarý alqaptaryn iske qosý. Nátıjesinde, aldaǵy jyldary 45 myń gektardan astam alqap sý júıelerimen qamtylyp, aýyl sharýashylyǵynyń tıimdiligi artýǵa tıis.
Qazir «Qazsýshar» fılıaly qyzmetkerleriniń ortasha aılyq jalaqysy – 242 426 teńge. 2026 jylǵy 1 sáýirden bastap eńbekaqyny 15 paıyzǵa arttyrý josparlanǵan. Bul sala mamandaryn ustap qalý men kadrlyq turaqtylyqty qamtamasyz etýge baǵyttalǵan.
Pavlodar oblysy
