Sýretti túsirgen – Erlan OMAR, «EQ»
Áýelgi amandyqtan soń, aqyn Júrsin Ermannyń «Áıelge oda» jyryn ár jýrnalıst eki joldan aıtyp, bir-birinen ilip áketip oqyǵanda, óleń qulpyryp shyǵa keldi. «Qazaq gazetteri» seriktestiginiń bas dırektory Dıhan Qamzabekuly áriptes arýlardy merekesimen quttyqtady. «Bul merekeni analar men arýlar meıramy dep aıtqandy qup kóremin. Merekeniń syr-sıpaty osy sózge sııady dep oılaımyn. Biz aınalamyzǵa, ásirese áıelder qaýymyna, analarymyz ben apa-qaryndas, jeńgelerimizge asqan iltıpatpen qaraǵan saıyn álem de qulpyra túsedi. Sizderdiń otbasyndaǵy eńbekterińiz ben jaýapkershilikterińizdiń ózi jeńil emes. Al qalam ustaǵan jýrnalıstıka mamandyǵyn tizgindegende, bul jaýapkershilik eselene túseri belgili. Sondyqtan kúsh-qýattaryńyz arta bersin. Analar men arýlar meıramy qutty bolsyn!», dedi seriktestik basshysy. Qaptal sóılegen bas dırektordyń orynbasarlary Vıktor Prıanıkov pen Qambar Ahmet te osy mánde ún qatyp, qysqa qaıyrdy.
«Kazahstanskaıa pravda» gazetiniń bas redaktory Sábıt Maldybaev ájeptáýir án salatynyn basylym oqyrmandary bilmeıtin shyǵar. Qalam ustaǵandardyń bir qasıeti artyq shyǵatyny bar. Buryn gıtarmen án shyrqaıtyn Sábeń osy joly estrada janrynda áýeletti. «Egemen Qazaqstan» gazeti ınternet bóliminiń tilshileri Abzal Maqash pen Shyńǵys Muqaev salǵan jerden dýetpen bastap edi, toptasqan qyz-kelinshekter «jup bolsynǵa» basty. Shámshiniń «Ánim sen ediń» týyndysyn aıaqtaǵan ekeý «Sen sulýǵa» salǵanda áıelder qaýymy qosyla shyrqady. Qos redaksııadaǵy aqyn jigitter qazaq, orys tilderinde óleń oqyp tamashaǵa qaldyrdy. Merekelik saltanatty keshtiń sońy kópshilik bıge ulasty.
