Kollajdy jasaǵan – Almas MANAP, «EQ»
- Otandasymyz «Úlken dýlyǵa» sanatyndaǵy týrnırde ekinshi márte top jardy. Alǵash ret osydan tórt jyl buryn Londonda dástúrli túrde uıymdastyrylyp turatyn «Ýımbldon» dodasynda aldyna jan salǵan joq.
- Kúni búginge deıin kortta júrgen úsh tennısshige ǵana «Úlken dýlyǵanyń» eki birdeı tósenishinde – shóp pen harda bas júldeni ıelený baqyty buıyrdy. Olar – Vınýs Ýılıams, Iga Shvıontek, Elena Rybakına.
- Qazir óner kórsetip júrgender arasynan «Ýımbldon» men «Australian Open» ekeýinde de jeńiske jetken jalǵyz oıynshy bar. Ol – Rybakına.
- Keıingi segiz jylda WTA-nyń qorytyndy týrnıri men «Australian Open» dodasyn qatar utqan tek Elena. 2017, 2018 jyldary dál sondaı tabysqa danııalyq Karolına Voznıaskı qol jetkizgen edi.
- Melbýrnde óziniń 12-tıtýlyn oljalady. Osyǵan deıin «Úlken dýlyǵa», WTA 1000 men WTA 250 jarystarynda 2 ret, WTA-nyń qorytyndy týrnırinde 1 márte, WTA 500 básekesinde 5 ret teńdessiz dep tanyldy.
- WTA týrnırleriniń fınalynda qatarynan besinshi ret jeńiske jetti. Bul sátti serııa 2024 jyldyń sáýir aıynda Germanııada bastalǵan edi. Jalpy fınaldarda 12 ret basymdyq tanytyp, 11 ret ese jiberdi.
- Elena álemniń birinshi, ekinshi raketkalarymen túrli jarysta joldary jıi qıysyp júr. Iga Shventekpen 12 ret kezdesip, ázirge esep teń – 6:6. Arına Sobolenkonyń bir jeńisi artyq – 7:8.
- Sobolenko men Shventek álemniń birinshi raketkalary atanyp otyrǵan tusta da jerlesimiz olardy kóbine-kóp utty. Esep – 9:4.
- Joǵaryda esimderi atalǵan Belarýs pen Polsha tennısshileri WTA reıtınginde kósh bastap turǵanda olardyń ekeýin tek Rybakına ǵana jeńdi.
- 2023 jyldan beri A.Sobolenko jasyl qurlyqtaǵy jarysta tek Elenadan ǵana eki ret utyldy.
- Álemniń birinshi raketkalarymen joly 15 ret qıysqan jerlesimiz sonyń toǵyzynda jeńis toıyn toılady.
- Jer-jahannyń eń úzdik oıynshylarymen ótken kezdesýdegi jeńis koeffısenti 60%-dy quraıdy. Bul – WTA tarıhyndaǵy eń úzdik kórsetkish.
- Keıingi 17 jyl ishinde «Úlken dýlyǵanyń» bir týrnırde álemniń birinshi, ekinshi raketkalaryn qatarynan utqan eki oıynshy ǵana boldy. Solardyń biri – Rybakına.
- «Australian Open» jarysynda WTA reıtınginde kósh bastap turǵan qos myqtyny utý baqyty tórtkúl dúnıeniń tórt tennısshisine ǵana buıyrdy. Solardyń qatarynda Elena da bar.
- Búginde teńdessiz dep tanylǵan tennısshilerdi WTA deńgeıindegi dodalarda úsh ret jeńdi.
- TOP-10-dyqtyń qatarynda júrgen úzdikterdi qatarynan 10 kezdesýde utty.
- TOP týrnırlerdegi sońǵy 21 kezdesýdiń 20-synda jeńiske jetti.
- Byltyrǵy «Ýımbldon»-nan keıin 45 ret kortqa shyǵyp, 38 ret qarsylasyn qapy qaldyrdy.
- Bıylǵy maýsymda eıs jasaý jaǵynan jeke-dara kósh bastap tur. Onyń qaqyrata soqqan soqqylary 69 márte dittegen jerine dóp tústi. Sol eısterdiń 47-si Aýstralııanyń ashyq birinshiliginde jasaldy.
- Melbýrndegi jarqyn jeńisiniń arqasynda qaıta TOP-3 tennısshiniń qataryna qosyldy.
