Serbııanyń Novı-Sad qalasynda 23 jasqa deıingi jastar arasynda ótken jahandyq dodada Shuǵyla qarsylastarynyń bárin aıqyn jeńip, álemniń úzdigi bolyp tanyldy. 55 kg salmaq dárejesinde beldesýge túsken jerlesimiz aldymen moldovalyq Mıhaela Samoılovany daýsyz utty. Shırek fınalda rýmyn qyzy Aleksandra Volkýleskýdi de erkin eńserip, Germanııa balýany Amorı Olıvııa Andrıchti beldesýdiń alǵashqy mınýtynda-aq kilemge alyp urdy. Fınaldyq synda túrik qyzy, jastar arasynda Eýropanyń teńdessiz balýany atanǵan Týba Demırdi 12:8 esebimen jeńdi. Shuǵyla onyń aldynda, 2024 jyly jastar arasyndaǵy Azııa chempıonatynyń kúmis medalin ıelengen edi.
Birikken kúres álemi (UWW) 23 jasqa deıingi jastar arasyndaǵy álem chempıonatyn 2017 jyldan beri turaqty ótkizip keledi. Buǵan deıin arýlarymyz álem chempıonatynyń fınalyna shyqqan emes.
– Byltyr týra Respýblıka kúni qarsańynda álem chempıony atanyp, kók týymyzdy jelbiretkenime qýanyshym sheksiz. Bul jetistik – jeke bapkerim Nurjigit Sársenbekuly aǵaıym ekeýmizdiń birneshe jyldan bergi esepsiz eńbegimizdiń jemisi. Endigi mejemiz – 2028 jyly ótetin Los-Andjeles Olımpıadasy. Sol asýǵa at baılaý jolynda tynymsyz ter tógý qajet, – deıdi balýan qyz.
Shuǵyla otbasynda jeti aǵaıyndy. Aldynda ápkesi, úsh sińlisi, eki inisi bar. Kúresi úıirmesine kútpegen jerden qabyldanypty. 4-synypta oqyp júrgeninde mektepte kúreske baýlıtyn bapkeri talantty balalardy izdep keledi.
– Sáıkestikti qarańyz, dál sol sátte men bir oqýshymen shekisip qaldym. Bizdi baıqap qalǵan Nurjigit Erimbetov «qaısar minezdi ekensiń, kúrespen shuǵyldanǵyń kele me?» dedi. Birden kelisim berdim de, erteńine kilem ústinde jaqttyǵýdy bastadym, – deıdi keıipkerimiz.
Shuǵyla aldaǵy sáýir aıynda Qyrǵyzstanda eresekter arasynda ótetin Azııa chempıonatynda baq synaıdy.
